Den Bibel, Inhoudende dat Oude ende Nieuwe Testament (Biestkensbijbel)

¶ Dat .vij. Capittel.

¶ Hier wort bewesen wat straffinge ouer dat volck comen sal.

1

⁺ENde des HEEren woort gheschiede tot my, ende sprack:

+ A vers 1

2

Ghy menschen kindt, Also spreect de HEEre, vanden lande Israels: Dat eynde coemt, dat eynde ouer alle de vier hoecken des lants.

3

Nv coemt dat eynde ouer v, Want ick wil mijne gramschap ouer v seynden, ende wil v oordeelen ghelijck ghy verdient hebt, ende wil v gheuen, wat alle dijne grouwelen toebehoort.

4

Mijn^† ooge en sal v niet sparen, noch voorby gaen. Maer ick wil v geuen ghelijck ghy verdient hebt, ende dijne grouwelen sullen onder v comen, dat ghy beuinden sult, dat ick de HEERE sy.

† Ezech. 9.b.10

5

Alsoo spreeck de HEEre HEEre: Siet, dat een ongheluck coemt ouer dandere,

6

Dat eynde coemt, dat eynde coemt, Het is ontweckt ouer v.

7

Siet, Het coemt, het gaet alreede op, ende het breect voorwaerts ouer v, ghy Inwoonders des Lantds. De tijt coemt, den dach des iammers is na by^‡ datter geen singen op de bergen zijn en sal.

‡ Ezech. 7.a.3.

8

⁺Nv wil ic haest mijne gramschappe ouer v ghieten, ende mijnen thoorne aen v voleynden, ende wil v oordeelen, ghelijck ghy verdient hebt, ende v gheuen, wat alle dijne grouwelen toebehoort.

+ B vers 8

9

Mijn^* ooge en sal v niet sparen, ende en wil niet ghenadich zijn. Maer ick wil v gheuen ghelijc ghy verdient hebt, Ende uwe grouwelen sullen onder v comen, dat ghy beuinden sult, dat ick de HEERE sy, die v slaet.

* Ezech. 9.b.10.

10

Siet, den dach, Siet, hy coemt daer, Hy breect aen, De roede bloeyt, ende de stoute groeyt.

11

De Tyran heeft hem op gemaect, tot eender Roeden ouer de godloosen, alsoo dat niet van haer noch van haren volcke, noch van haren hoop, troost hebben en sal.

12

Daerom coemt de tijt, den dach ghenaket, De Cooper en verblijde hem niet, ende de vercooper en truere niet, Want den toorne coemt ouer alle hare hoopen.

13

Daerom en sal de vercooper na zijn vercocht goet niet weder dencken, wandt die daer leeft, die salt hebben, Wandt de Prophetie ouer alle hare hoopen, en sal niet te rugghe gaen, Niemant en sal zijn leuen behouden, om zijnder misdaets wille.

14

⁺Laetse de Basuyne slechs blasen, ende alle dinck toerusten, Daer en sal doch niemandt inden strijdt trecken, wandt mijn

+ C vers 14

[p. 51v]

gramschappe gaet ouer alle hare hoopen.

15

Op de straten gaet dat Sweert, Inden huysen gaet Pestilentie ende hongher. So wie opten velde is, die sal vanden sweerde steruen, Maer die inder stadt is dien sal de Pestilentie ende den hongher verslinden. Ende so wie onder haer ontulieden, die moeten opten gheberchten zijn,

16

Ende ghelijck als de duyuen inden dalen, die alle te samen onder malcanderen knorren, een yeghelijck om zijnder misdaet wille.

17

Alle handen sullen neder sincken, ende alle knien sullen soo onseker staen als water.

18

Ende sy^* sullen sacken om haer gorden, ende met vreese ouerghoten worden, ende alle aensichten sullen iammerlijcken sien,^† ende alle Hoofden sullen kael zijn.

* Esaie. 16.a.3.

† Esaie. 16.a.3. Iere. 48.e.37.

19

⁺Sy sullen haer siluer henen wt op de straet werpen, ende haer gout als een vuylnis achten.^* Want haer siluer ende gout en salse niet^† beurijen, inden daghe des thoorns des HEEren. Ende en sullen doch hare sielen daer af niet versaden, noch haren buyck daer af vullen, Want het is haer gheweest een erghernisse tot haerder misdaet.

+ D vers 19

* Seph. 1.c.18 Eccle. 5.b.10. Prou. 10.a.2. 11.a.4.

† Beschermen

20

^† Sy hebben van haren edelen Cleynodien, daermede sy hoouerdye bedreuen, beelden haerder grouwelen, ende schouselen gemaect.

† Ezec. 16.b.17. Oze. 2.b.10. 13.a.2.

21

Daerom wil ickse hen tot een vuylnis maken, ende wilse vreemden inde handen gheuen, dat sijse roouen, ende den Godloosen opter Aerden, tot eender buete, dat sijse ontheylighen sullen.

22

Ick wil mijn aensicht daer af keeren, op dat sy mijnen schat ymmer wel ontheylighen, Ia Roouers sullen daer ouer comen, ende sullense ontheylighen.

23

Maect ketenen, want dat lant si vol bloetschulden, ende de stadt vol vermetenheyts.

24

⁺So wil ick de alder erchste onder de Heydenen laten comen, dat sy hare huysen in sullen nemen, Ende ick wil de hoouerdie der gheweldigher een eynde maken, ende hare kercken ontheylighen.

+ E vers 24

25

De wtroeyer coemt, Dan sullen sy vrede soecken ende daer en sal geenen zijn.

26

Dat een ongheluck sal ouer dandere comen, Dat een gherucht ouer dandere,^† Soo sullen sy dan een gesichte byden Propheet soecken. Maer daer en sal noch Wet byden Priesters, noch raet byden Ouden meer zijn.

† Iere. 38.c.14.

27

De Coninck sal bedroeft zijn, ende de Vorsten sullen truerich gecleet zijn, ende de handen des volcx inden lande sullen versaecht zijn. Ick wil met hen omgaen also sy gheleeft hebben,^† Ende ick wilse oordeelen, nae dat sy verdient hebben, dat sy beuinden sullen, dat ick de HEEre sy.

† Iere. 17.b.10. Psal. 62.b.13. Eccles. 35.c.30. Mat. 16.d.27 Roma. 2.a.6. Apoca. 2.d.23.