Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ Een prophetie ouer dat gheberchte Israels, van dat toecomende quaet dat ouer haer comen sal.

1

⁺ENde des HEEREN woort gheschiede tot my, ende sprack:

+ A vers 1

2

Ghy menschen kint, Keert dijn aensicht teghen de berghen Israels, Ende propheteert teghen haer,

3

Ende segt:^† Ghy berghen Israels, hoort dat woordt des HEEREN HEEren: Alsoo spreect de HEERE HEEre, beyde totten berghen ende hueuelen totten beken, ende dalen. Siet, ick wil dat sweert ouer v brenghen, ende uwe Hoochten te niet brenghen,

† Ezech. 36.a.1.

4

Also dat uwe Altaren verwoest, ende uwe Afgoden in stucken ghebroken sullen worden.

5

Ende ick wil uwe lichamen voor de beelden laten dootslaen, Ia ick wil de lichamen der kinderen Israels voor uwe beelden vellen, ende ick wil uwe ghebeenten rontsom uwe Altaren verstroyen.

6

Soo waer ghy woont, daer sullen de steden woest, ende de Hoochten tot eender wildernisse worden. Want men sal uwe Altaren woest ende tot eender wildernisse maken, ende uwe Afgoden in stucken breken, ende te niete maken, Ende uwe beelden in stucken slaen, ende uwe stichtinghen vernielen.

7

⁺Ende de verslaghene sullen onder v daer neder ligghen, also dat ghijt beuinden sult, dat ick de HEERE ben.

+ B vers 7

8

Maer ick wilder sommighe van v laten ouerblijuen, die tsweert ontgaen onder de Heydenen, wanneer ic v inde landen verstroyt hebbe.

9

Die selue uwe ouerghebleuen, die sullen dan aen my gedencken onder de Heydenen daer sy gheuanghen zijn moeten, als ick haer hoerachtich hert, dat van my gheweken is, ende haer hoerachtighe oogen, die na hare Afgoden gesien hebben, in stucken geslaghen hebbe. Ende de boosheyt sal haer berouwen, die sy door allerley hare grouwelen bedreuen hebben,

10

Ende sullen beuinden, dat ick de HEEre sy, ende niet te vergheefs ghesproken en hebbe, alsulcken ongheluck haer te doen.

11

⁺Also seyt de HEEre HEEre: Slaet dijne handen tsamen, ende stampt met dijne voeten, ende segt: Wee ouer alle grouwelen der boosheyt inden huyse Israels,^* waerom dat sy doort sweert, hongher, ende pestilentie vallen moeten.

+ C vers 11

* Iere. 21.b.9. 24.d.10. 27.a.8. 42.c.17.

12

Soo wie verre is, die sal aender pestilentie steruen, Ende soo wie na by is, die sal door tsweert vallen, Ende so wie ouer blijft, ende daer voor behoet is, die sal van hongher steruen. Alsoo wil ick mijn gramschappe onder haer voleyn-den,

13

Dat ghy vernemen sult, dat ic de HEEre ben. Als hare verslaghene onder hare Afgoden liggen sullen rontsomme hare Altaren, bouen op alle hueuelen, ende bouen alle berghen, ende onder alle groene boomen ende onder alle dicke eycken, op welcke plaetsen dat sy allerley Afgoden soeten Rueckoffer deden.

14

Ick wil mijn handt teghen haer wtstrecken, ende dat Landt woest ende eensaem maken, van de woestijne aen, tot Diblath toe, soo waer dat sy woonen, Ende sy sullen beuinden dat ick de HEEre ben.