Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ Den Propheet wordt ghetoont in een ghesichte, met wat straffinge dat Godt dat volck wil te niet maken.

1

⁺ENde du menschen kint^† Neemt een sweert soo scherp ghelijck een scheermes, ende scheert daer mede dijn hooft ende dijnen baert, Ende neemt een weech schale, ende deylt de hayren daer mede van malcanderen.

+ A vers 1

† Iere. 7.d.28.

2

Dat een derdendeel sult ghy met vyer verbranden midden inder stadt, als de daghen der belegheringhen omme zijn: Dat ander derdendeel neemt ende slatet metten sweerde rontsom: Dat laetste derdendeel stroyt inden wint, dat ic dat sweert achter haer wt trecke.

3

Maer neemt daer af een cleyn weynichsken, ende bintse inde slippen van uwen mantel,

4

Ende neemt wederom sommighe daer af, ende werptse in een vyer, ende verbrantse metten vyere. Daer af sal een vyer wt comen ouer dat gheheel huys Israels.

5

⁺Alsoo spreeckt de HEEre HEEre: Dat is Ierusalem, die ick onder de Heydenen ghesedt hebbe, ende de Landen rontsom haer.

+ B vers 5

6

Maer sy heeft mijn Wet verandert in een Godloose leere, meer dan de Heydenen, ende mijne rechten, meer dan de landen die rontsom haer ligghen. Want sy verworpen mijn wet, ende en willen na mijnen rechten niet leuen.

7

Daerom spreeckt de HEERE HEEre also,^* Aenghesien dat ghy dies meer maect dan de Heydenen die rontsomme v zijn, ende na mijnen gheboden niet en leeft, ende na mijne rechten niet en doet, Maer doet na der Heydenen wijse, die rontsomme v zijn. Daerom seyt de HEERE HEEre alsoo:

* Leui. 18.d.24

8

Siet, ick wil oock aen v, ende wil een recht ouer v laten gaen, dattet de Heydenen aensien sullen.

9

Ende ick wil alsoo met v om gaen, ghelijck ick noyt gedaen en hebbe, noch voort meer doen en sal, om alle dijnder grouwelen wille,

10

^* Dat in v, de vaders hare kinderen, ende de kinderen hare vaders verslinden sullen. Ende ick wil alsulcken recht ouer v laten gaen, dat alle dijne ouerghebleuen in alle winden verstroyt sullen worden.

* Deut. 28.e.53. Tren. 4.b.10. 4.Re. 6.f.29.

11

⁺Daeromme soo warachtelijck als ick leue, spreeckt de HEEre HEEre: Om dat ghy mijn Heylichdom met alderley dijne grouwelen, ende Afgoden veronreynicht hebt, so wil ick v oock ontstucken slaen, ende mijn ooghe en sal v niet sparen, ende ick en wil niet ghenadich zijn.

+ C vers 11

12

Dat^† derdendeel van v sal aender pestilentien steruen ende door hongher vergaen: Ende dat ander derdendeel sal door tsweert vallen, rontsom v: Ende dat laetste derdendeel wil ick in alle winden verstroyen, ende dat sweert achter haer wt trecken.

† Ierem. 15.a.2.

13

Also sal mijnen thoorne voleyndt, ende mijn verbolghentheyt ouer haer volbracht worden, dat ick mijnen moet coele. Ende sy sullen beuinden dat ick de HEERE in mijnen ijuer ghesproken hebbe, als ick mijnen thoorne aen haer volbracht hebbe.

14

Ick wil v tot eender woestijne, ende tot een versmaetheyt setten voor alle Heydenen die rontsom v zijn,⁺ voor de oogen aller die daer voorby gaen.

+ D vers 14

15

Ende ghy sult een verachtinge, spot, exempel ende wonder zijn allen Heydenen die rontsom v zijn, wanneer ick ouer v dat recht laet gaen, met thoorne, gramschappe, ende toornich kijuen (dat segghe ick de HEEre)

16

Ende als ick de boose pijlen des honghers onder haer

[p. 51r]

schieten sal, die daer schadelijcken zijn sullen, ende ickse wtschieten sal, v te verderuen, Ende den hongher ouer v altijt late grooter worden,^* ende den voorraet des broots wech neme,

* Ezec. 4.b.16. 14.b.13. 4.Reg. 25.a.3 Esaie. 3.a.1.

17

Ia hongher, ende boose wilde dieren wil ick onder v seynden, die sullen v sonder kinderen maken, Ende daer sal pestilentie ende bloet onder v omgaen, Ende ic wil dat sweert ouer v brenghen. Ick de HEEre hebt geseyt.