Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

¶ Hier wort voorder den Propheet in een ghesichte een beuel ghegheuen.

1

⁺ENde du menschen kint, neemt eenen tychelsteen, dien legt voor v, ende ontwerpet daer op de Stadt Ierusalem.

+ A vers 1

2

Ende maect een belech daer om ende timmert een Bolwerck daer om, ende trect eenen Wal daer omme, ende maect een Heyr daer om, ende set Bocken rontsomme haer.

3

Maer voor v neemt een yseren panne, die laet een yseren muere zijn tusschen v ende der Stadt, ende richt dijn aensicht teghen haer, ende belegtse. Dat sy een teecken den huyse Israels.

4

Ghy sult v oock op dijnder slincker sijden leggen, ende leggen de misdaet des huys Israels op de selue. So vele dagen

[p. 50v]

als ghy daer op ligt, soo langhe sult ghy oock haere misdaet dragen.

5

^* Maer ick wil v de iaren haerder misdaet na tghetal der daghen maken, te weten, drie hondert ende tneghentich daghen. So langhe sult ghy de misdaet des huys Israels draghen.

* Dan. 9.d.25.

6

Ende als ghy sulcx volbracht hebt, soo sult ghy v daer na op dijne rechte sijde legghen, ende sult de misdaet des huys Iuda dragen veertich dagen lanc,^† want ick geue v hier oock elcken dach, voor een iaer.

† Nu. 14.e.34.

7

⁺Ende stelt dijn aensicht ende uwen blooten arm teghen dat belegherde Ierusalem, ende propheteert teghen haer.

+ B vers 7

8

Ende siet, Ic wil v stricken aen doen, alsoo dat ghy v niet weynden en moghest vander eender sijden tot de ander, tot dat ghy de daghen dijnre belegghinghe volbracht hebt.

9

Daerom neemt nv tot v, tarwe, gherst, boonen, wicken, hers ende spelt, ende doetet al tsamen in een vat, ende maeckt v soo veel broots daer van, soo veel dagen als ghy op dijnre syden ligghen sult, dat ghy dryehondert ende tneghentich dagen daer af te eten hebt.

10

Alsoo dat dijne spijse, die ghy daghelijcx eten moet, twintich sikel swaer sy: Alsulcx sult ghy vander eender tijt totter ander eten.

11

Dat water sult ghy oock na der mate drincken, te weten, dat sestendeel van een Hin, Ende ghy sult sulcx oock vander eender tijt totter ander drincken.

12

Gersten coecken sult ghy eten, die ghy voor haren ooghen by menschen dreck backen sult.

13

⁺Ende de HEEre sprack: Alsoo moeten de kinderen Israels haer^† onreyn broot eten, onder de Heydenen, derwaerts icse verstooten hebbe.

+ C vers 13

† Hose. 9.a.3.

14

Maer ick sprac: Ach HEERE HEEre, Siet, mijn siele en is noch noyt onreyn gheworden. Want ick en hebbe van mijnder iuecht op, tot deser tijt toe, gheen aes, noch wat verschuert was, gheten, ende daer en is noyt gheen onreyn vleesch in mijnen mont ghecomen.

15

Maer hy sprack tot my: Siet, Ick wil v koeyen dreck voor menschen dreck toe laten, daer ghy dijn broot mede maken sult.

16

Ende hy sprack tot my: Du menscen kint, Siet, ick wil den^* voorraet des broots tot Ierusalem, wech nemen, alsoo datse dat broot eten moeten na dat ghewichte ende met commer, ende dat water na der maten met commer drincken.

* Ezech. 5.d.16. 4.Re. 25.a.3. Ezec. 14.b.13.

17

Daeromme dattet aent broodt ende water faelgeren sal, Ende deene metten anderen trueren, ende in haerder misdaet versmachten sullen.