Den Bibel, Inhoudende dat Oude ende Nieuwe Testament (Biestkensbijbel)

¶ Dat .iiij. Capittel.

1

⁺ OCh, hoe is dat goudt soo gheheel verdonckert, ende dat fijn gout soo eyslijck gheworden? Ende de steenen des Heylichdoms liggen op alle straten verstroyt.

+ A vers 1

2

Die edele kinderen Sions, den goude ghelijck gheacht, Hoe zijn sy nv byden aerdenen potten gheleken, die de potmaker maect?

3

De draken geuen haren iongen de borsten, ende soogense: Maer de dochter mijns volcx moet onbermhertich zijn,^† ghelijck als een struysse inder woestijnen.

† Esaie. 34.c.13

4

^* Den suyghelinghe cleeft zijne tonge aen zijnen^‡ raecke van dorste. De ionge kinderen eysschen broot, ende daer en is niemant diet haer breke.

* Tren. 2.c.12. Amos. 8.b.13.

‡ Tgehemelte

5

Die voormaels dat alderleckerste aten, die versmachten nv opter straten. Die te voren in sijden opgeuoet zijn, die moeten nv inden dreck ligghen.

6

⁺ De misdaet der dochter mijns volcx is grooter, dan de sonde^† Sodoma, die bottelijck omghekeert wert, ende daer en quam gheen handt toe.

+ B vers 6

† Gene. 19.c.24

7

^* Hare Nazareen waren reynder dan de sneeu, ende claerder dan de melc. Haer gedaente was rooder dan Coralen, haer aensien was als Saphir.

* Num. 6.a.4.

8

Maer nv is haer ghedaente soo doncker van swerticheyt, datmense opter straten niet en kendt.^† Hare huyt hangt aen de beenen, ende zijn soo dorre als een hout.

† Psal. 102.a.6.

9

Den verslaghenen door tsweert gheschiede beter dan den genen die van hongher storuen, die versmachten ende verderuen moesten, om des gebrecx wille der vruchten des ackers.

10

^* De alderbarmhertichste wijuen hebben hare kinderen selue moeten coken, op dat sy te eten hadden, in den iammer des dochters mijns volcx.

* Deut. 28.e.53. 4.Re. 6.f.29. Tren. 2.e.20.

11

^† De HEEre heeft zijne gramschap volbracht. Hy heeft zijnen grammighen thoorne wt gegoten.^* Hy heeft tot Sion een vyer aenghesteken, dat oock hare fundamenten verteert heeft.

† Tren. 2.a.1.

* Tren. 2.a.3.

12

⁺ De Coningen op Aerden en haddens niet ghelooft, noch alle de Lieden inder werelt, dat de Wederpartye ende Viant totter Poorten Ierusalems soude in trecken.

+ C vers 12

13

Mer het is gheschiet om der sonden wille haerder Propheten, ende om der misdaet wille haerder Priesteren,^† die der rechtuaerdighen bloedt daer in verghoten.

† Gene. 9.a.6. Exod. 23.a.7.

14

Sy ghingen herwaerts ende ghints opter straten, ghelijck de blinden, ende waren met bloet besmet, ende en conden oock der ghener cleederen niet aengheroeren.

15

Maer sy riepense aen, wijct ghy onreyne, wijckt, wijckt, en roeres niet aen. Wandt sy schouden haer, ende vloden voor haer, Datmen oock onder de Heydenen seyde: Sy en sullen daer niet lange blijuen.

16

Daerom heeftse den thoorne des HEEren verstroyt, ende en wilse niet meer aensien, Wandt sy de Priesters niet en eerden, ende metten Ouders geen bermherticheyt en oeffenden.

17

⁺ Noch gaepten onse ooghen op de^† nietighe hulpe, tot dat sy iuyst moede werden, doen wy wachteden op een volck

+ D vers 17

† ydele.

[p. 49r]

dat ons doch niet ghehelpen en coste.

18

Men iaechde ons, dat wy op onse straten niet gaen en dorsten. Doen quam ooc onse eynde, onse dagen zijn wt, onse eynde is ghecomen.

19

^* Onse veruolghers waren snelder dan de Arents onder den Hemel. Op de berghen hebben sy ons veruolcht, ende inder woestijne op ons gheloert.

* Iere. 4.b.13. Abac. 1.a.4. Iere. 49.c.16.

20

De ghesalfde des HEEren, die onsen troost was, is gheuanghen gheworden, doen sy ons verstoorden, op wien wy ons verlieten, wy wouden onder zijne schaduwe leuen onder de Heydenen.

21

Verblijdt v ende weest vrolijck, ghy dochter Edom, die daer woonest inden lande^† Vz, Want den kelck sal oock ouer v comen. Ghy moet oock droncken ende ghebloot worden.

† Iob. 1.a.1.

22

Maer dijne misdaet heeft een eynde, du dochter Sion. Hy en sal v niet meer laten wech voeren.^* Maer dijne misdaet, du dochter Edom, sal hy besoecken, ende dijne sonden ontdecken.

* Esaie. 21.b.11. Iere. 49.a.7. Psal. 137.b.7.