Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

1

⁺ ACh,^* hoe heeft de HEERE de dochter Sion met zijnen thoorne ouerschuddet? Hy heeft de heerlijcheyt Israels vanden Hemel op de Aerde gheworpen. Hy en heeft inden daghe zijns thoorns niet ghedachtich gheweest op zijne^* voetbancke.

+ A vers 1

* Tren. 4.b.11.

* 1.Par. 29.a.2. Psal. 99.a.5.

2

De HEEre heeft alle de wooningen Iacobs sonder bermherticheyt vernielt, hy heeft de vesten der dochter Iuda afghebroken in zijnen thoorne, ende ter Aerden gheslicht. Hy heeft ontwijdet beyde haer Conincrijcke ende hare Vorsten.

3

Hy heeft alle hoornen Israel in zijnen grammighen thoorne in stucken ghebroken. Hy heeft zijn rechter handt achter hem getogen, doen de viant quam,^* Ende heeft in Iacob een vyer aen ghestooct, dwelck rontom verteert.

* Tren. 4.b.11.

4

Hy heeft zijnen boghe gespannen als een viant, zijne rechter handt heeft hy geuoert als een Tegenpartijder, ende heeft verworcht al wat lieffelijck aen te sien was. Ende zijn gramschap ghelijck als een vyer, wtghegoten, inde Hutte der dochter Sion.

5

De HEERE is ghelijck als een viant, Hy heeft Israel vernielt. Hy heeft vernielt alle hare Palleysen, ende heeft zijne vesten verdoruen. Hy heeft der dochter Iuda veel claghens ende rous ghemaect.

6

⁺ Hy heeft zijne Tenten omghewoelt, ghelijck eenen hof,^* ende zijne wooninghe verdoruen. De HEERE heeft tot Sion beyde Vierdach ende Sabbath laten vergheten, Ende in zijnen grammighen thoorne beyde den Coninc ende Priester laten scheynden.

+ B vers 6

* Iere. 7.b.14.

7

De HEERE heeft zijnen Altaer verworpen, ende zijn Heylichdom verbannen. Hy heeft de mueren haerder Palleysen in des Viants handen ghegheuen, alsoo dat sy in den huyse des HEEren ghecrijst hebben, alsmen op eenen Vierdach plach.

8

De HEEre heeft ghedacht de mueren der dochter Sion te verderuen, Hy heeft dat richtsnoer daer ouer ghetogen, ende zijn handt niet afghekeert, tot dat hyse vernielde. De Bolwercken staen claghelijcken, ende de muere leghet iammerlijcken.

9

Hare poorten ligghen diep inder Aerden, Hy heeft haer grendelen in stucken ghebroken, ende te niet ghemaect.^* Hare Coninghen ende Vorsten zijn onder de Heydenen, daer sy dat gheset niet oeffenen en connen, Ende hare Propheten geen gesicht vanden HEEre en hebben.

* Iere. 25.b.9.

10

⁺ De Oudtsten der dochter Sion, ligghen opter Aerden, ende zijn stille, Sy werpen stof op hare hoofden, ende hebben sacken aenghetoghen. De maechden van Ierusalem hanghen haer hoofden ter Aerden.

+ C vers 10

11

^† Ick hebbe mijn ooghen schier wt gheweent, dat my mijn^* Lijf wee daer af doet. Mijn leuer is op de Aerde wtgheschut, ouer den iammer der dochter mijns volcx, doen de suyghelinghen ende onmondige kinderen opter straten, inder stadt versmachten.

† Tren. 1.c.16.

* Tren. 1.e.20.

12

Doen sy tot haren moederen spraken:^* Waer is broot ende Wijn? Doen si opter straten inde stadt versmachten, gelijc als de dootlijcke ghewonde, ende inde armen haerder moederen den gheest op gauen.

* Tren. 4.a.4.

13

Och ghy dochter Ierusalem, by wien sal ick v ghelijcken, ende waer voor sal ick v houden, ghy Maghet, ghy dochter Sion? Wien sal ick v ghelijcken, daer mede ick v troosten mochte? Want dijne schade is groot, gelijck als een See, wie can v gheheelen?

14

^* Dijne Propheten hebben v ydele ende sotte ghesichten ghepredict, ende en hebben

* Ierem. 5.b.12. 14.b.13. 23.c.16 27.b.9. 29.b.9

[p. 48r]

v dijne misdaet niet gheopenbaert, daer mede sy dijne gheuanghenisse ghekeert hadden. Maer sy hebben v ydele sermonen ghepredict, op dat sy v henen ten lande wt preecten.

15

⁺ Alle die voorby gaen, slaen de handen tsamen, pijpen v aen^* ende schudden den cop ouer de dochter Ierusalem. Is dat de Stadt, daermen af seyt: Sy is de alder schoonste: Waer af hem dat gantsche Lant verblijt?

+ D vers 15

* Psal. 22.a.8.

16

^* Alle dijne vianden sperren haren mont op teghen v, pijpen v aen, wijsen de tanden, ende segghen: Hey, Wy hebbense vernielt. Dat is den dach, dien wy hebben begeert, wy hebbent vercregen, wy hebbent beleeft.

* Psal. 22.a.8. Tren. 3.d.46.

17

^* De HEEre heuet gedaen, wat hy inden sin hadde, Hy heeft zijn woort veruult, dat hy langhe te voren gheboden heeft, Hy heeft sonder bermherticheyt verdestrueert. Hy heeft den viant ouer v verblijt, ende uwer teghenpartijders hoorn verhoocht.

* Leui. 26.c.25.

18

^* Haer herte riep tot den HEEre, O du muere der dochter Sion, laet dach ende nacht tranen hier af vlieten, ghelijck een beke, ende en houdt oock niet op, Ende dijnen ooghen appel en late niet af.

* Deut. 4.c.29.

19

⁺ Staet des nachts op, ende roept, Scuddet dijn herte wt inder eerster wake teghen den HEEre, ghelijck als water. Heft dijn handen teghen hem op, om der sielen wille dijner iongher kinderen, die van hongher versmachten, voor aen alle straten.

+ E vers 19

20

O HEEre aenschout ende siet doch toe, wien ghy also verdoruen hebt,^* Sullen dan de wijuen haers lijfs vrucht eten, de ionge kinderkens eender spannen lanc? Sullen dan de Propheten ende Priesters in dat Heylichdom des HEEren so vermoort worden?

* 4.Re. 6.f.29. Tren. 4.b.10. Deut. 28.e.53.

21

Daer laghen in de straten op der Aerden, ionghen ende ouden, Mijne ionghe maechden ende Ionghelinghen zijn door dat sweert geuallen. Ghy hebt geworcht inden dach dijns thoorns, Ghy hebt sonder bermherticheyt gheslaghen.

22

Ghy hebt mijne vianden rontomme gheroepen, als op eenen vierdach, alsoo dat opten dach des thoorns des HEEren niemandt ontloopen noch ouerghebleuen en is. Die ick ghehouden ende opgheuoedt hebbe, die heeft de Viant verdaen.