Den Bibel, Inhoudende dat Oude ende Nieuwe Testament (Biestkensbijbel)

De Claechlieden Ieremie.

¶ Dat eerste Capittel.

1

⁺ HOE^† leyt de Stadt soo woeste, die vol volcx was? Sy is ghelijck een Weduwe. Die een Vorstinne onder de Heydenen, ende een Coninghinne inde landen was,^* die moet nv dienen.

+ A vers 1

† Ezech. 26.c.17

* 4.Re. 25.e.24

2

Sy weent des nachts, dat haer de tranen ouer de kinnebacken loopen, Daer en is niemandt onder allen hare vrien-den diese trooste.^* Alle hare naesten verachten haer, ende zijn hare Vianden geworden.

* Iob. 6.b.15.

3

Iuda is gheuanghen in ellendicheyt ende sware dienstbaerheyt, Sy woondt onder de Heydenen, ende en vint gheen ruste, alle haer veruolghers houdense qualijck.

4

⁺ De straten na Sion ligghen woest, om datter niemandt op gheen Feeste en coemt. Alle haer poorten staen eenelijck. Haer Priesters suchten, Hare Ionckfrouwen sien iammerlijcken, ende sy is bedroeft.

+ B vers 4

5

Hare wederpartijders sweuen inder hoochte, haren Vianden gatet wel. Want de HEERE heeftse vol iammers ghemaect, om haerder grooter sonden wille, Ende hare kinderen zijn geuangen voor den Viandt henen ghetoghen.

6

Alle chieraet is vander dochter Sion wech, Hare Vorsten zijn gelijc de Rammen, die gheen weyde en vinden, ende mat voor den drijuer henen gaen.

7

Ierusalem ghedenct in deser tijt, hoe ellendich ende verlaten dat sy is, ende hoe veel goets dat sy van oudts herwaerts ghehadt heeft, aenghesien dat alle haer Volck daer neder leyt, onder de Vianden, ende dat haer niemant en helpt. Hare Vianden sien haren lust aen haer, ende bespotten hare Sabbathen.

8

Ierusalem heeft haer besondicht, daerom moetse zijn ghelijck als een onreyn Wijf. Alle diese eerden, die versmadense nv, om dat sy hare schaemte sien, Maer sy sucht, ende is te rugghe ghekeert.

9

⁺ Haer vuylicheyt cleeft aen haren soom, Sy en hadde niet ghemeynt, dattet haer ten laetsten alsoo gaen soude. Sy is te grouwelijcken hier onder ghestooten, Ende daer toe en heeftse niemandt diese trooste. Ach HEERE, aensiet mijn ellendicheyt, Want de Viant praelt seer.

+ C vers 9

10

De Viandt heeft zijn handt aen alle haer Cleynodien gheslaghen, wandt sy moestet aensien, dat de Heydenen in hare Heylichdom ghinghen: Daer^* ghy af gheboden hebt, dat sy in uwe ghemeynte niet en souden comen.

* Deut. 23.a.3.

11

^* Alle haer Volck suchtet, ende gaet om broot, Sy gheuen hare Cleynodien om spijse, op dat sy de siele lauen. Ach HEEre siet doch ende aenschout, hoe iammerlijck dat ick gheworden ben.

* 4.Reg. 6.f.25 Treno. 2.e.20.

12

V segge ick, ghy alle die voorby gaet, aenschout doch, ende siet toe, oft daer eenige smerte sy, gelijck als mijne smerte, die my getreft heeft. Want de HEEre heeft my vol iammers ghemaect, inden daghe zijns grammighen thoorns.

13

⁺ Hy heeft een vyer wt der Hoochte in mijne beenen gheseynt, ende dat selue laten rasen. Mijnen voeten heeft hy een net ghestelt, ende my te rugghe ghestooten. Hy heeft my tot eender woestijne ghemaeckt, dat ick daghelijckx trueren moet.

+ D vers 13

14

Mijne sware sonden zijn door zijne straffinge ontwect, ende met hoopen my op den hals ghecomen, dat my alle mijne

[p. 47v]

cracht vergaet. De HEERE heeft my alsoo toebereyt, dat ick niet en can opgecomen.

15

De HEERE heeft vertreden alle mijne stercken, die ick had, Hy heeft een Feest ouer my laten wtroepen, om mijne Ionghe Mannen te verderuen. De HEERE heeft der Ionckfrouwen dochter Iuda, een Wijnpersse laten treden.

16

Daerom^† weene ick alsoo, ende beyde mijn ooghen vloeyen met water, om dat de vertrooster die mijne siele soude vermaken, verre van my is. Mijne kinderen zijn wech, Wandt de Viant heeft de ouerhant ghecreghen.

† Ierem. 13.c.17 14.c.17. Tren. 2.c.11. 3.e.49.

17

Sion streckt hare handen wt, ende daer en is nochtans niemandt, diese trooste. Want de HEEre heeft rontom Iacob zijnen Vianden gheboden, dat Ierusalem tusschen haer sal zijn, ghelijck een onreyn wijf.

18

^+* De HEEre is rechtuaerdich, want ick hebbe zijnen monde onghehoorsaem gheweest. Hoort alle volcken, ende siet mijne smerten. Mijn Ionghe maechden, ende Ionghe ghesellen zijn inder gheuanckenisse ghegaen.

+ E vers 18

* Dan. 9.a.7.

19

Ick riep mijne vrienden aen, maer sy hebben my bedrogen. Mijne Priesteren ende de Oudtsten inder Stadt zijn versmacht, want sy gaen om broot, op dat sy hare siele lauen.

20

Ach NHEERE, siet doch hoe banghe dat my is dattet my daer af inden^† lijue wee doet. Mijn herte slaet my in mijnen lijue, Want ick ben gants seer bedroeft. Buyten heeft my dat sweert, ende in huys heeft my de doot tot eender Weduwe ghemaect.

† Tren. 2.c.11.

21

Men hoort wel dat ick suchte maer nochtans en hebbe ick geenen Trooster. Alle mijn vianden hooren mijn ongeluc, ende verhueghen haer, dat maeckt ghy, Daerom laet doch den dach comen, dien ghy wtroept, dattet haer gaen sal, gelijck als my.

22

Laet alle haer boosheyt voor v comen, Ende bereytse toe, ghelijck ghy om mijnder misdaets willen toegericht hebt. Want mijns suchtens is veel, ende mijn herte is bedroeft.