Den Bibel, Inhoudende dat Oude ende Nieuwe Testament (Biestkensbijbel)

¶ Dat .lij. Capittel.

¶ Een verhalinghe, hoe dat Ierusalem beleghen, ghewonnen ende inghenomen is.

1

⁺ SEdekias^† was eenentwintich iaer out, doen hy Coninck wert, Ende regeerde elf Iaer tot Ierusalem. Sijn Moeder hiet Hamital, een dochter Ieremie tot Libna.

+ A vers 1

† 4.Reg. 24.d.18.

2

Ende hy dede dat den HEERE niet wel en behaechde, ghelijck als Ioiakim ghedaen hadde.

3

Wandt den thoorne des HEEren ghinck ouer Ierusalem ende Iuda, tot dat hijse van zijnen aensichte verworp. Ende Sedekias viel af vanden Coninc te Babel.

4

^† Maer inden neghenden Iare zijns Conincrijcx, inden thienden dage der thiender maent quam NebucadNezar de Babyloonsche Coninck met alle zijnen heyre, teghen Ierusalem, ende belegerdense, ende maecte een schantse daer rontom.

† 4.Re. 25.a.1. Iere. 39.a.1.

5

Ende de stadt bleef also beleghert tot inden elfsten Iare des Conincx Sedekie.

6

Maer inden negenden dage der vierder maent, nam den honger de ouerhant inder stadt, Ende dat volc en hadde niet meer vanden lande te eten.

7

Doen bracmen inde stadt, Ende alle de Crijchslieden gauen de vlucht ende togen snachts ter stadt wt, door den wech na der poorten, tusschen de twee mueren, na den Hof des Conincx.

8

⁺ Maer de Chaldeen laghen rontom de stadt. Ende doen dese henen togen des weechs doort velt, iaechde dat Chaldeesche heyr den Coninck na,^* Ende grepen Sedekiam int veldt by Iericho, Doen verstroyde alle zijn heyr van hem.

+ B vers 8

* 4.Re. 25.a.5.

9

Ende sy vinghen den Coninck, ende brachten hem op, totten Babyloonschen Coninck na Riblath, die inden lande Hemath leyt. Die sprack een oordeel ouer hem.

10

Ende de Babyloonsche Coninc dede aldaer de kinderen Sedekie voor zijnen ooghen verworgen, Ende hy verworchde alle Vorsten Iuda, tot Riblath.

11

Maer Sedekie dede hy de ooghen wtsteken, ende liet hem met twee ketenen binden, Ende also voerde hem de Baby-loonsche Coninck na Babel, Ende leyde hem inde gheuanckenisse tot dat hy sterf.

12

Inden thienden dach der vijfster maent, dwelcke is dat neghenthiende Iaer NebucadNezars des Babyloonschen Conincx, quam NebusarAdan de Hooftman, die alle tijt by den Coninck te Babel was, tot Ierusalem,

13

Ende^† verbrande dat huys des HEEren. Ende des Conincx huys, ende alle de huysen tot Ierusalem: Alle groote huysen verbernde hy met vyer.

† 3.Reg. 9.b.7. 4.Re. 25.b.9.

14

Ende dat gantsche heyr der Chaldeen dat byden Hooftman was, ruckten om, alle de mueren te Ierusalem rontom.

15

Maer dat arm volck, ende dander volc, dat noch ouergebleuen was, inder stadt, Ende totten Babyloonschen Coninc vielen,⁺ Ende dat ouerghebleuen Ambachts volck, voerde NebusarAdan de Hooftman gheuangen wech.

+ C vers 15

16

Ende vanden armen volcke op den lande, liet NebusarAdan de Hooftman wijngaerdeniers ende Ackerlieden, blijuen.

17

^* Maer de Metalen Columnen aenden huyse des HEEREN, ende dat gestoelte, ende de Metalen See aenden huyse des HEEren, braken de Chaldeen in stucken, Ende voerden alle dat Metael vanden selfden na Babel.

* 4.Re. 25.b.13.

18

Ende de Ketelen, Schupkens, Messen, Beckens, vleeschpotten, ende alle Metalen vaten, diemen inden dienste Gods placht te ghebruycken, namen sy wech.

19

Daer en bouen nam de Hooftman wech, al dat gulden ende silueren was, aen Bekeren, Roocpannen, Beckenen, Ketelen, Candelaren, Lepelen ende Schalen.

20

De twee Columnen, de eenighe See, de twelf metalen Runderen, die inder stede des ghestoelts stonden,^* welcke de Coninc Salomon hadde doen maken, tot den huyse des HEEREN, Des Metaels van alle dese ghereetschap was bouen maten veel.

* 3.Reg. 7.

21

⁺ Der tweer Columnen was een yeghelijc achthien ellen hooch, Ende een snoer twelf ellen lanck ghinck daer rontom, Ende was vier vingheren dick, ende binnen hol.

+ D vers 21

22

Ende daer stont op elcke eenen Metalen knoop, vijf ellen hooch, ende Reepen, ende granaetappelen waren aen elcken knoop, rontom, ende al van enckelen Metale, Ende die een Columne was als die andere, Ende de granaetappelen oock. Der granaetappelen waren ses ende tneghentich daer aen,

23

Ende alder granaetappelen waren hondert aen eenen Reep rontom.

24

Ende de Hooftman nam den Priester Seraia^† wt der eerster ordinantie, Ende den Priester Sephaniam, wt der anderder ordinantie, ende drie duerwachters,

† Den ouersten.

25

Ende eenen Camerlinck wt der stadt, die ouer de Crijchslieden gheset was, Ende seuen Mannen die byden Coninc zijn moesten, die inder Stadt geuonden werden. Daer toe Sopher den Heyrvorste, die dat Landtvolck plach te monsteren, Daer en bouen Tsestich Mannen Landtvolcx, die inder Stadt gheuonden

[p. 47r]

werden.

26

Dese nam NebusarAdan de Hooftman, ende brachtse den Coninck te Babel na Riblath.

27

Ende de Coninck te Babel sloechse doot tot Riblath, die inden Lande Hemath leyt, Alsoo wert Iuda wt zijnen lande wech gheuoert.

28

Dit is dat volck, dat NebucadNezar wech gheuoert heeft, te weten, inden seuenden Iare, drye duysent ende dryentwintich Ioden.

29

Maer inden achthiensten Iare NebucadNezars, acht hondert ende tweendertich sielen wt Ierusalem.

30

Ende inden dryentwintichsten Iare des Nebucadnezars, voerde NebusarAdan de Hooftman, seuenhondert ende vijfenveertich Sielen wech wt Iuda. Aller Sielen zijn, vier duysent ende ses hondert.

31

^* Maer inden seuenendertichsten Iare, na dien dat Ioiachim de Coninck Iuda wech gheuoert was, opten vijfentwintichsten dach der twelfster maent, verhief Euil^* Merodach de Coninck te Babel, inden Iare als hy Coninck werdt, dat hooft Ioiachin des Conincx Iuda, Ende liet hem wt der gheuanckenissen,

* 4.Re. 25.d.27

* Ierem. 50.a.2.

32

Ende sprack vriendelijck met hem, Ende stelde zijnen stoel bouen der Coninghen Stoelen die by hem tot Babel, waren.

33

Ende veranderde hem de cleederen zijnder geuanckenissen, dat hy voor hem at gestadelijck zijn leefdaghe. Ende hem wert ghestadelijcken zijn nootdruft, vanden Coninck te Babel ghegheuen, ghelijck alst hem geordineert was, zijn geheele leuen lanc tot aen zijnen eynde.

¶ Eynde des Propheten Ieremie.