Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlix. Capittel.

¶ De Predikinge tegen de Ammoniten.

1

⁺ TEgen^† de kinderen Ammon, spreect de HEERE also: En heeft Israel dan gheen kinderen, oft en heeft hi gheenen Erfghenaem? Waerom besidt dan Malchon dat Lant Gad, Ende zijn volck woont in hare steden?

+ A vers 1

† Ezech. 21.d.32 25.a.2. Amos. 1.c.13.

2

Daeromme, Siet, den tijt coemt, seyt de HEEre, dat ic wil een crijsch gheschrey laten hooren, ouer Rabbath der kinderen Ammon, dat si sal op eenen hoope woest ligghen, Ende hare^† dochteren met viere aen ghesteken worden. Maer Israel sal de ghene besitten vanden welcken si beseten waren, seyt de HEERE.

† Omligghende vlecken.

3

Huylt O Hesbon, Want Ai is verstoort. Schreyt O ghy dochteren Rahbath,^† ende trect sacken aen, claecht ende loopt op de Mueren rontom, Want Malchon wort gheuangen wech geuoert, met sinen Priesteren ende Vorsten.

† Esaie. 16.a.3. Ezech. 7.c.18. Iere. 48.e.37.

4

Wat pocht ghy op uwe Beemden? Vwe Beemden zijn verdroncken, O ghy onghehoorsame dochter,^* ghy die v op uwe schatten verlaet, ende segt in dijnder herten: Wie is soo cloeck, die my derre ghenaken?

* Iere. 17.b.11.

5

Siet, spreect de HEEre HEEre Sebaoth: Ick wil een verschricken ouer v laten comen, van allen die rontom v woonachtich zijn, op dat een yeghelijck zijns weechs voor hem selfs wech verstooten worde, ende datter niemandt en sy die de veltuluchtighe vergadere.

6

Maer daer nae wil ick wederom weynden de gheuanckenisse der kinderen Ammon, seyt de HEERE.

¶ Teghen Edom.

7

^+† Alsoo seyt de HEERE Sebaoth: En isser dan gheen wijsheydt meer tot Theman? En isser dan geenen raet byden cloecken? Is hare wijsheyt gantsch wt?

+ B vers 7

† Esaie. 21.b.11. Ezech. 25.b.13 32.f.29. 35.a.2.

8

Vliet, weynt v, ende versteect v diepe ghy Borghers tot Dedan, Want ic laet een ongheual ouer Esau comen, den tijt zijnder besoeckinghen.

9

Daer sullen Wijnpluckers ouer v comen, die v gheen naelesen en laten, Ende daer sullen dieuen des nachts ouer v comen, die sullen hem ghenoech verderuen.

10

Want ick hebbe Esau bloot gemaect, ende zijn heymelijcke plaetsen gheopent, alsoo dat hy hem niet versteken en can. Sijn saet, sine broeders, ende sine naghebueren zijn verstoort, dat haerder gheen meer voorhanden en is.

11

Nochtans soo wat datter ouerblijft van uwen Weeskens, dien wil ick dat leuen gonnen, Ende uwe Weduwen sullen op my hopen.

12

Want also spreect de HEEre:^† Siet, de ghene diet niet verdient en hadden, den kelck te drincken, die moeten drincken, Ende sout ghy onghestraft blijuen? Ghy en sult niet onghestraft blijuen, Maer ghy moet ooc drincken.

† Iere. 25.d.29. Ezech. 9.b.6. 1.Pet. 4.c.17.

13

^* Want ick hebbe by my seluen gesworen, spreect de HEERE, dat Bazra tot eenen wonder, versmaetheyt, woestijne, ende vloec worden sal, Ende alle hare steden een eewighe woestheyt.

* Esai. 45.d.23 Ierem. 22.a.5. Hebre. 6.b.13

14

⁺ Ick hebbe vanden HEEre gehoort, datter een bootschappe onder de Heydenen gheseynt sy, Vergadert v, ende coemt herwaerts teghen haer, bereyt v totten strijde,

+ C vers 14

15

^* Want siet, ick hebbe v cleyn ghemaect onder de Heydenen, ende veracht onder den menschen.

* Abdi. 1.a.2.

16

Vwe^† dertelheyt, ende ws herten hoochmoet heeft v bedroghen, Want ghy inde steenclippen woont, ende hooge berghen in hebt.^† Al waert, dat ghy schoon uwen neste soo hooch maecte als den Arent, soo wil ick v nochtans daer af ter neder stooten, spreect de HEEre.

† Iere. 48.d.29 Esai. 47.b.10

† Abdia. 1.a.4. Amos. 9.a.2.

17

Edom sal soo verwoest worden,^† dat alle die daer voorby gaen, haer verwonderen, ende pijpen sullen, ouer alle hare plaghen.

† Tren. 4.c.19. Iere. 18.b.16. 19.b.8. 50.b.13

18

Ghelijck^* als Sodoma ende Gomorra met haren naghebueren omgekeert is, spreect de HEEre, also dat oock niemant aldaer woonen, noch geen Mensche daer in logeren en sal.

* Genes. 19.e.24.

19

Want siet, Hy coemt herwaerts op, ghelijck eenen Leeuwe, van de stoute Iordane herwaerts, teghen de vaste Hutten, Want ick wil hem derwaerts snellijcken laten loopen. Ende wie weet, wie die Ionghelinck is, dien ick teghen haer toerusten sal?^* Wandt wie is mijns ghelijcke? Wie wil my meesteren? Ende wie is de Herder, die my wederstaen can?

* Esai. 44.b.7 Ier. 50.h.44 Sapi. 12.b.12

20

⁺ Daerom hoort nv den Raetslach des HEEREN,^† die hy ouer Edom heeft, ende sine ghedachten die hy ouer de Inwoonders in Theman heeft, Wat gheldet, oft de Herders knapen haer niet ter Aerden slichten en sullen, ende hare wooninghe verstooren?

+ D vers 20

† Psal. 137.a.7. Ezec. 25.b.13.

21

Alsoo oock dattet Aertrijck beuen sal, wanneert in malcanderen valt, ende haer ghecrijsch salmen op de^* Roode zee hooren.

* Schelpmeyr.

22

Siet,^† Hy vliecht herop, ghelijc eenen Arent, ende hy sal sine vloghelen wtspreyen ouer Bazra. Ter seluer tijt sal dat herte der Helden in Edom zijn, gelijc dat herte eender vrouwen in kintsnooden.

¶ Teghen Damascon.

† Ierem. 48.f.40. Deut. 28.c.49

23

^† Hemath ende Arphad staen iammerlijck, Sy zijn versaecht, want si hooren eenen quaden roep. Die aender zee woonen, Die zijn alsoo verschrickt, datse gheen ruste ghehebben en connen.

† Esaie. 17.a.1. Amos. 1.a.3.

24

Damascus is versaecht, ende gheeft de vlucht, Sy beeft, ende is in angste ende smerte ghelijck een vrouwe in kints noode.

25

Hoe? En is si nv niet verlaten, de vermaerde ende sorgheloose stadt?

26

Daerom sullen haer Ionghe mans persoonen op hare straten ter neder ligghen, ende alle haer Crijschlieden ondergaen, ter seluer tijt seyt de HEEre Seboath.

27

Ende ick wil de mueren tot Damasco met vier aensteken, dattet de Palleysen Benhadad verslinden sal.

[p. 44v]

Teghen Kedar ende de Conincrijcken Hazor, welcke NebucadNezar de Coninck tot Babel sloech.

28

^+† Also spreect de HEERE: Wel op, Trect op in Kedar, ende verstoort de kinderen tegen den Oosten.

+ E vers 28

† Esaie. 21.c.16.

29

Men sal haer, hare Hutten ende Cudden nemen, hare Tenten, alle hare ghereetschap, ende Kemelen sullen si wech voeren, Ende men sal veruaerliken ouer haer roepen rontom.

30

Vliet, schict v terstont wech, versteect v diepe, O ghy Inwoonders tot Hazor, seyt de HEEre: Wandt NebucadNezar de Coninck tot Babel heeft wat inden sinne, teghen v, ende hy meynt v.

31

Wel op, trect opwaerts, teghen een volck dat ghenoech heeft, ende sonder sorge woont, seyt de HEERE. Sy en hebben noch dueren, noch grendelen, ende woonen alleene.

32

Hare Kemelen sullen gherooft, ende de menichte haers Vees ghenomen worden. Ende ick wilse verstroyen in alle winden, die inde hoecken woonen, ende van alle plaetsen herwaerts, wil ic haer ongheluck ouer haer laten comen, seyt de HEERE,

33

Alsoo dat Hazor sal een draken wooninghe, ende een eewighe woestijne worden, dat niemandt aldaer en woone, ende gheen mensche daer in en logere.

34

⁺ Dit is dat woort des HEEren dwelc totten Propheet Ieremiam gheschiede, teghen^† Elam, inden beghinne des Conincrijcx Sedekie des Conincx Iuda, ende sprack:

+ F vers 34

† Ezec. 32.d.24 Danie. 8.a.2.

35

Alsoo seyt de HEEre Sebaoth: Siet, ick wil den Boghe Elam in stucken breken, haer principaelste gewelt,

36

Ende ick wil de vier winden wt de vier hoecken des Hemels ouer haer laten comen, ende ick wilse in alle de selue winden verstroyen, datter geen volc zijn en sal, derwaerts sommighe verdreuen wt Elam niet comen en sullen.

7[37]

Ende ick wil Elam versaecht maken voor hare Vianden, ende den genen die haer nae haren leuen staen, ende ongheluck ouer haer laten comen met mijnen grammighen toorne, spreect de HEEre. Ende ic wil dat sweert achter haer henen seynden, tot dat icse te niete make.

38

Mijnen stoel wil ick in Elam setten, ende wil beyde den Coninck ende de Vorsten aldaer vernielen, seyt de HEERE. Maer in toecomender tijt wil ick de gheuanckenisse Elam wederom weynden, seydt de HEERE.