Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvij. Capittel.

¶ De Predikinghe teghen de Philisteen, Tyrum, Sydon, Gazan, Ascalon, ende de andere Eylanden.

1

⁺ DIt^† is dat woort des HEEren, dat totten Propheet Ieremiam geschiede, tegen de Philisteen, eer dat Pharao Gazan sloech.

+ A vers 1

† Esaie. 15.a.2. Ezech. 25.c.15. Seph. 2.a.4.

2

Also spreect de HEERE: Siet, daer comen wateren herop vanden Noorden, die eenen vloet maken sullen, ende beyde dat Lant ende soo wat daer in is, de steden ende die daer in woonen, wech drijuen sullen. Dat de Lieden sullen screyen, ende alle inwoonders inden Lande, huylen,

3

Voor dat ghebries haerder stercker peerden, die daer henen drauen, ende voor dat ratelen haerder waghens, ende dat^† kerren haerder raderen. Dat de vaders niet nae de kinderen en sullen om sien. So versaecht sullen si zijn, voor den dach die daer coemt te verstooren alle Philistijnen, ende wt te roeyen^† Tyron ende Sidon, met haren anderen helpers.⁺ Want de HEERE sal de Philistijnen, die dat ouerblijfsel zijn wt dat Eylandt Caphthor, verstooren,

† Omloopen.

† Esaie. 23.a.1. Ezech. 26.a.3. 27. 28.

+ B vers 3

4

Gaza zal kael worden, ende Ascalon, met de ouerghebleuenen in haren valleyen, verdoruen. Hoe lange crabbet ghy v?

5

^† O ghy sweert des HEEren, wanneer wilt ghy doch ophouden? Vaert doch weder in dijn scheede, ende rust, ende weest stille.

† Iere. 48.b.10

6

Maer hoe cont ghy ophouden? Aenghesien de HEERE v beuel ghegeuen heeft teghen Ascalon, ende v teghen de Hauen aen de zee bestelt heeft.