Den Bibel, Inhoudende dat Oude ende Nieuwe Testament (Biestkensbijbel)

¶ Dat .xlvj. Capittel.

¶ In dit Capittel is de summa der predikinghen, die de Propheet Ieremias totten Heydenen gedaen heeft.

1

⁺ DIt is dat woort des HEEren, dat tot den Propheet Ieremiam gheschiet is, teghen alle Heydenen.

¶ Teghen^* Egipten.

+ A vers 1

* Esaie. 19.a.1. 30.a.3. Ezech. 29.a.2. 30.a.4. 31.a.2. 4.Re. 24.b.7

2

Teghen dat heyr Pharao Necho des Conincx in Egipten, dwelcke lach aen dat water Phrac tot Charcemis, dat de Babiloonische Coninck NebucadNezar sloech, inden vierden iare Ioiakim, des soons Iosie, des Conincx Iuda.

3

Rustet schilden ende tarschen toe, ende trect inden slach.

4

Spant peerden aen, ende laet de Ruyters opsitten. Settet de helmen op, ende scherpt de spiessen, ende treckt pansiers aen.

5

Maer hoe comet, dat ick sie, dat si versaecht zijn, ende de vlucht gheuen, ende hare Helden verslaghen zijn? Sy vlieden oock alsoo, dat sy niet om en sien, veruaernisse heeft haer rontom beuanghen, spreeckt de HEEre.

6

⁺ De snelle en can niet ontulieden, noch de stercke ontcomen. Teghent Noorden aen het water Phrat, zijn si geuallen, ende ter neder gheleyt.

+ B vers 6

7

Waer is nv de ghene, die daer op tooch ghelijc eenen stroome, ende zijn goluen haer verhieuen, ghelijc goluen des waters?

8

Egipten tooch op ghelijc eenen stroom, ende sine baren verhieuen haer ghelijc als baren des waters, ende sprack: Ick wil henen op trecken, dat Landt bedecken, ende de Stadt bederuen, met den ghenen die daer in woonen.

9

Wel aen, sit op de peerden, rollet daer henen met de waghens, Laet de Helden, de Mooren, ende wt Puth die den schilt voeren, schutters wt Lydia, wttrecken.

10

Want dit is den dach des HEEren HEEren Sebaoth, eenen dach der wraken, dat hi hem aen sine Vianden wreke, daer dat sweert verslinden, ende van haer bloet vol ende droncken worden sal. Want si moeten den HEEre HEEre Sebaoth een slachoffer worden, inden Lande teghent Noorden aenden water Phrat.

11

Gaet henen op nae Gilead, ende haelt salue Maghet, ghy dochter wt Egipten. Maer het is om niet, dat ghy v veel meestert, wandt ghy en wordt doch niet ghenesen.

12

Dijne schande is onder den Heydenen luytbaer geworden, dat Lant is vol van dijn huylen. Want deen Helt valt ouer den anderen, ende si liggen beyde met malcanderen ter neder.

13

⁺ Dit is dat woort des HEEREN, dat hy totten Propheet Ieremiam sprac,^† doen NebucadNezar de Babyloonsche Coninck daer henen tooch, om Egypten lant te slaen.

+ C vers 13

† Iere. 43.b.10.

14

Vercondighet in Egipten, ende bootschappet tot Migdal. Bootschappet tot Noph ende Tachpanhes, ende spreeckt: Stelt v ter weere. Wandt dat Sweert sal verslinden, soo wat daer rontsom v is.

15

Hoe comet, dat dijne gheweldighe ter Aerden vallen, ende en moghen niet blijuen staen? De HEERE heeftse soo

[p. 43r]

ter neder ghestooten,

16

Hy doetet dat haerder vele vallen, Ia dat deen met den anderen daer neder leyt. Doen spraken si: Wel op, Laet ons weder tot onsen volcke trecken, in ons vaders Lant voor dat sweert des Tyrannen.

17

Aldaer roepmen hem na, Pharao de Coninck in Egipten leghet, hy heeft zijn Tenten verlaten.

18

So warachtelijck als ick leue, spreect de Coninck,^* die daer HEEre Sebaoth heet. Hy sal daer henen trecken also hooch als den berch Thabor onder de berghen is, ende ghelijck als de Carmel aen de zee is.

* Esai. 48.a.2. 51.c.15. 54.a.5

19

^† Schict v, dat ghy wandelt, ghy Inwoonersche Dochter Egipten. Wandt Noph sal woest ende verbrant worden, datter niemant in woonen en sal.

† Neemt v wandel gereetscap

20

⁺ Egypten is een seer schoon calf: Mer de slagher coeme van dat Noorden.

+ D vers 20

21

Ende de dachlooners die daer inne woonen, zijn oock ghelijck als ghemeste Calueren: Maer si moeten haer nochtans keeren, veltvluchtich worden met malcanderen, ende en sullen niet bestaen. Want den dach haers ongheuals sal ouer haer comen,

22

Te weten, den tijt haerder versoeckinghen. Sy ruysschen daer henen, dattet harnasch clast, ende comen met heyrs cracht, ende si brenghen aeren met haer, ghelijck als de houthouwers.

23

Die selue sullen alsoo in hare woudt houwen (spreect de HEEre) dat het niet te tellen en is. Wandt haerder isser meer dan der sprinchanen, die niemant ghetellen en can.

24

De dochter Egipti staet met scanden. Want si is den volcke vanden Noorden in de handen ghegheuen.

25

De HEERE Sebaoth, de God Israels seyt: Siet, ic wil versoecken de Regenten te No, ende Pharao, ende Egipten, tsamen met sinen Goden ende Coninghen, Ia Pharao,^* met alle den ghenen die haer op hem verlaten,

* Ierem. 17.b.5

26

⁺ Op dat icse inden handen gheue, den genen, die haer nae haren leuen staen, ende inden handen NubucadNezars des Conincks tot Babel, ende zijnder knechten.^† Ende daer na suldy bewoont worden, ghelijck als van outs herwaerts, spreeckt de HEERE.

+ E vers 26

† Ezech. 29.b.13

27

^† Maer ghy mijn knecht Iacob, en veruaert v niet: Ende ghy Israel, en zijt niet versaecht. Want siet, Ick wil v wt verren Landen, ende dijn saet wt den Lande zijnder gheuanckenissen helpen. Dat Iacob sal weder comen, ende in vrede zijn, ende ghenoech hebben, Ende niemant en sal hem veruaren.

† Iere. 30.b.10. Agge. 2.a.6.

28

^* Daerom en vreest v niet, ghy Iacob mijn knecht, seyt de HEERE. Wandt ick ben by v.^† Ick wil een eynde maken met allen Heydenen, derwaerts ic v verstooten hebbe. Maer met v so en wil ick gheen eynde maken,^* Maer ic wil v castijen met mate, op dat ick v niet onghestraft en late.

* Esai. 41.b.10 43.a.1. 54.a.4.

† Iere. 30.b.11

* Iere. 10.d.24. Esaie. 27.b.8.