Den Bibel, Inhoudende dat Oude ende Nieuwe Testament (Biestkensbijbel)

¶ Dat .xliij. Capittel.

¶ Sy en gheloouen den woorde des Propheten niet, Maer si trecken tegen Gods beuel in Egipten, De Propheet voorseyt haer wat haer ontmoeten sal.

1

⁺ DOen Ieremias alle de woorden des HEEren haers Gods wt hadde ghesproken, tot alle den volcke, ghelijck als hem de HEERE haren God, alle dese woorden aen haer beuolen hadde,

+ A vers 1

2

So sprack Asaria de sone Hosaia, ende Iohannan de sone Kareah, ende alle de vermeten mannen, tot Ieremiam:^† Ghy liecht, De HEERE onse Godt en heeft v niet tot ons ghesonden, noch gheseyt: Ghy en sult niet in Egipten trecken, om aldaer te woonen.

† Iere. 42.a.5.

3

Maer Baruch de sone Nerie die ruyt v op teghen ons, op dat wy den Chaldeen ouergegeuen werden, datse ons dooden, ende nae Babel wech voeren.

4

Alsoo en waren Iohanan de sone Kareah, ende alle de hooftlieden des heyrs metten gantschen volcke, der stemmen des HEEren niet ghehoorsaem, dat si inden lande Iuda ghebleuen waren.

5

Maer Iohannan de sone Kareah, ende alle de hooftlieden des heyrs, nam tot hem alle de ouerghebleuen wt Iuda, die van alle volcken, van daer si henen geuloden,^† wederomme ghecomen waren, op datse inden lande Iuda souden woonen,

† Iere. 41.c.12.

6

Te weten, mannen, wijuen ende kinderen, Daer toe ooc des Conincx dochteren, ende alle sielen, die NebusarAdan de hooftman bi Gedaliam den sone Ahikam, des soons Saphan ghelaten had. Oock den Propheet Ieremiam, den Baruch den sone Nerie,

7

Ende toghen in Egipten Lant. Wandt si en wouden der stemmen des HEEREN niet ghehoorsaem zijn, ende quamen tot^† Thachpanhes.

† Taphnis.

8

⁺ Ende des HEEREN woordt gheschiede tot Ieremiam, tot Thachpanhes, ende sprac:

+ B vers 8

9

Neemt groote steenen ende begraeftse inden tijchelouen, die voor der dueren is aenden huyse Pharaos tot Thachpanhes, dattet de mannen wt Iuda aensien.

10

Ende segt tot haer: Alsoo seyt de HEEre Sebaoth, de Godt Israels: Siet, Ick wil henen seynden, ende laten halen^† mijnen knecht NebucadNezar den Coninck tot Babel, ende wil zijnen stoele bouen op dese steenen setten, die ic begrauen hebbe, Ende hy sal sine tente daer ouer opslaen.

† Iere. 25.b.9. 46.c.13.

11

Ende hy sal comen ende Egipten Lant slaen, ende dooden soo wien het treft, gheuangen voeren, so wien het treft, met den sweerde slaen, so wien het treft.

12

Ende ick wil de huysen der goden in Egipten met vier aensteken, dat hijse verberne ende wech voere. Ende hy sal Egipten lant aen trecken, ghelijc als een herder zijn cleet aentrect, ende met vrede van daer trecken.

13

Hy sal de beelt columnen te BethSemes in Egipten Lant, in stucken breken, ende de Afgodenkercken in Egipten met viere verbranden.