Den Bibel, Inhoudende dat Oude ende Nieuwe Testament (Biestkensbijbel)

¶ Dat .xl. Capittel.

¶ Hoe de Coninck te Babel met Ieremia gheleeft heeft, Gedolias wordt vanden Coninck te Babel tot eenen voocht des lants gheset.

1

⁺ DIt is dat woort dat vanden HEEre gheschiede tot Ieremiam,^* doen hem NebusarAdan de hooftman los liet, tot^† Rama. Want hy was oock met ketenen ghebonden, onder alle den ghenen die tot Ierusalem ende in Iuda gheuanghen waren, datmense nae Babel wech voeren soude.

+ A vers 1

* Iere. 43.a.6.

† Iosue. 18.d.25

2

Doen nv de hooftman Ieremiam tot hem hadde laten halen, sprack hy tot hem: De HEERE dijn Godt heeft dit ongheluck ouer dese plaetse ghesproken,

3

Ende hy heuet oock laten comen, ende ghedaen, ghelijc hy gheseyt heeft. Want ghy lieden hebt ghesondicht teghen den HEEre, Ende zijnder stemmen niet ghehoort, daerom is v sulcx gheschiet.

4

Nv siet, ick hebbe v huyden los ghemaect vanden ketenen daer uwe handen mede ghebonden waren. Ist sake dattet v belieft met my na Babel te trecken, so coemt, ghy sult my beuolen zijn. Ende en behaget v niet met my nae Babel te trecken, So latet staen.^† Siet, daer hebt ghi dat gantsche lant voor v, soo waer dattet v goet dunct, ende v belieft, daer treckt henen.

† Genes. 13.b.9. Tob. 1.b.12.

5

Want wijder henen wt en salder gheen wederkeeren zijn. Daerom soo muecht ghy wederkeeren tot^† Gedalia den sone Ahikam, des soons Saphan, den welcken de Coninck te Babel gheset heeft ouer die steden in Iuda. Ende by den seluen muecht ghy onder den volcke blijuen. Oft gaet henen, waer dat het v wel behaecht.⁺ Ende de Hooftman ghaf hem teerghelt, ende gheschencken, ende liet hem gaen.

† 4.Re. 25.c.22

+ B vers 5

6

^† Also quam Ieremias tot Gedalia den sone Ahikam tot Mizpa, ende bleef by hem onder den volcke, dwelcke inden lande noch ouer ghebleuen was.

† Iere. 39.c.14.

7

Als nv de Hooftlieden, die haer op den velden onthielden, met haren lieden, vernamen, dat de Babiloonsche Coninc Gedaliam den sone Ahikam ouer dat lant gheset hadde, ende beyde ouer mannen ende wijuen, kinderen, ende de minste inden lande, die welcke nae Babel niet geuoert en waren,

8

Soo quamen sy tot Gedalia tot Mizpa. Te weten, Ismael de sone Nethanie, Iohannan ende Ionathan, de sonen Kareah, ende Seraia de sone Thanhumeth, ende de sonen Ephai van Nethophat, ende Iesania de sone Maachati, met haren mannen.

9

^† Ende Gedalia de sone Ahikam des soons Saphan dede haer, ende haren ghesellen eenen eedt, ende sprac: En vreest v niet, dat ghi den Chaldeen onderdanich zijn sult. Blijft inden lande, ende weest den Coninck te Babel onderdanich, soo salt v wel gaen.

† 4.Re. 25.c.24

10

⁺ Siet, Ick woone hier tot Mizpa, dat ick den Chaldeen dienen soude, die tot ons comen. Daerom so vergadert in, den wijn, ende vijghen, ende olie, ende doetet in uwe vaten, ende woont in uwe steden, die ghy vercreghen hebt.

+ C vers 10

11

Oock alle de Ioden die inden Lande Moab, der kinderen Ammon, ende in Edom, ende in allen landen waren, Doen si hoorden dat de Coninck te Babel, sommighe in Iuda hadde laten ouerblijuen, ende Gedaliam den sone Ahikam, des soons Saphan ouer hen gheset,

12

Soo quamen si alle weder van allen hoecken, daer si henen verstooten waren, inden lande Iuda tot Gedalia, tot Mizpa, ende vergaderden in, seer veel wijns ende somervruchten.

13

Maer Iohannan de sone Kareah met alle den hooftlieden, die haer op de velden onthouden hadden, quamen tot Gedalia tot Mizpa,

14

Ende spraken tot hem: Weet ghy oock, dat Baelim de Coninc der kinderen Ammon, Ismael den sone Nethania, herwaerts ghesonden heeft, dat hy v sal verslaen? Maer Gedalia de sone Ahikam en woude haer dat niet gheloouen.

15

Doen sprack Iohannan de sone Kareah tot Gedalia heymelijck te Mizpa: Lieue, ick wil henen gaen, ende Ismael den sone Nethanie slaen, dattet niemant vernemen en sal. Waerom sal hy v verslaen, dat alle de Ioden die tot v vergadert zijn, verstroyt worden, ende de gene die noch van Iuda ouer ghebleuen zijn, vergaen?

16

Ende Gedalia de sone Ahikam, sprac tot Iohannan den sone Kareah: Ghy en sult dat niet doen, Het en is niet waer, dat ghy van Ismael segt.