Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxix. Capittel.

¶ Wat daer gheschiet is metten Coninck Sedekia, met de stadt Ierusalem, ende den Inwoonders, als de stadt inghenomen is gheweest.

1

⁺ ENde het geschiede dat Ierusalem gewonnen wert:^† Want inden negenden iare Sedekie des Conincx Iuda, inder thiender maent, quam NebucadNezar de Babilonische Coninc ende alle zijn heyr voor Ierusalem, ende belegerde de selue.

+ A vers 1

† Iere. 52.a.4. 4.Reg. 25.a.1

2

Ende inden elfsten iare Sedekie inden negensten dage der vierder maent brackmen inder stadt.

3

Ende alle de Vorsten des Conincx tot Babel toghen daer in, ende hielden onder de middelste poorte. Te weten, NergalSarEzar, Sanger Nebo, Sarssechim de ouerste Camerlinck, NergalSarEzar de Hofmeester, ende alle dander Vorsten des Conincx te Babel.

4

^† Alsse nv Sedekias de Coninc Iuda sach, met sine Crijschlieden, so vloden si by nacht ter stadt wt, by des Conincx hof door de poorte, tusschen twee mueren, ende togen door tvelt wech.

† 4.Re. 25.a.4 Ierem. 52.a.7

5

Mer dat Chaldeesce heyr iaechde hen na, ende grepen Sedekiam inden velde, by Iericho, ende vingen hem,⁺ Ende brachten hem tot NebucadNezar den Babiloniscen Coninc na Riblath, die inden lande Hemath leyt. Die sprac een oordeel ouer hem.

+ B vers 5

6

Ende de Coninc tot Babel liet de kinderen Sedekie dooden voor sinen oogen tot Riblath, Ende doode alle de Vorsten Iuda.

7

Mer Sedekia liet hy de oogen wtsteken, ende hem met ketenen binden, dat hy hem na Babel voerde.

8

^† Ende de Chaldeen verbranden beyde des Conincx huys, ende der borgers huysen ende braken in stucken de mueren tot Ierusalem.

† 4.Re. 25.b.9. Iere. 52.c.13.

9

Ende so wat noch vanden volcke inder stadt was, ende wat sus tot hem geuallen was, die voerde NebusarAdan de hofmeester al te samen geuangen nae Babel.

10

Maer van dat gemeyn slecht volc, dat niet en hadde, liet tot dier tijt NebusarAdan de hooftman, sommige inden Lande Iuda, ende gaf haer wijnbergen ende Dorpkens in.

11

⁺ Maer NebucadNezar de Coninck te Babel, had NebusarAdan den hooftman beuolen van^† Ieremia, ende geseyt:

+ C vers 11

† Iere. 38.d.28.

[p. 40v]

12

Neemt hem, ende laet hem v beuolen zijn, ende doet hem gheen leet. Maer ghelijc als hijt van v begheert, so maket met hem.

13

Doen seynde NebusarAdan de hooftman, Ende NebusaSban de de ouerste Camerlinc, NergalSarEzer de hoofmeester, ende alle de Vorsten des Conincx tot Babel henen,

14

Ende lieten Ieremiam halen wt den voorhof der geuangenissen. Ende beualen hem^† Gedalia, den sone Ahikam, des soons Saphan, dat hi hem wt in zijn huys soude brenghen, ende hy by den volcke soude blijuen.

† Iere. 40.b.6.

15

Dat woort des HEEren was oock gheschiet tot Ieremiam, doen hy noch in den voorhof des gheuanckenissen geuanghen lach, ende hadde ghesproken:

16

Gaet henen, ende segt EbedMelech den Moor: Also spreect de HEEre Sebaoth, de Godt Israels: Siet, Ick wil mijn woort laten comen, ouer dese Stadt, tot een ongheluck ende tot gheenen goede.

17

Ende ghy sultet sien ter seluer tijt. Maer v wil ick verlossen ter seluer tijt, spreeckt de HEERE, Ende ghy en sult dien Lieden niet te deele worden, voor den welcken ghy v veruaert.

18

Want ick wil v daer af helpen, alsoo dat ghy door tsweert niet vallen en sult.^† Maer ghy sult dijn leuen gelijc een buete daer af brenghen. Daerom dat ghy my betrout hebt, spreect de HEEre.

† Ierem. 21.c.9. 45.b.5.