Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxviij. Capittel.

¶ De Vorsten staen nae de doot des Propheten, daerom wordt hy in een swaerder geuanckenisse geleyt. Abdemelech dede hem versaechtinge. De Coninck vraecht hem ten tweedenmael.

1

⁺ MAer Saphatia de sone Mathan, ende Gedalia de sone Pashur, Iuchal de sone Selemia, ende Pashur de sone Malchie, hoorden de redenen die Ieremias tot al den volcke sprac: ende seyde:

+ A vers 1

2

Also spreect de HEEre:^† So wie in deser stadt blijft, die sal doort sweert, hongher, ende Pestilencie steruen moeten. Maer so wie wt gaet totten Chaldeen, die sal leuende blijuen, ende die sal zijn leuen als een buete daer af brengen.

† Ierem. 21.b.9 27.a.8.

3

Want also spreect de HEERE:^† Dese stadt sal ouergheleuert worden den heyre des Conincx tot Babel, ende die sullense ghewinnen.

† Ierem. 32.a.3.

4

Doe spraken de Vorsten totten Coninc: Laet doch desen man dooden, Want in deser manieren weyndet hy de selue Crijschlieden af, die noch ouer gebleuen zijn in deser stadt. Desghelijcx oock dat gantsche volck, aenghesien dat hy sulcke woorden tot haer seyt, want dese man en soect niet, wat desen volcke totten vrede, maer wat tot ongeluck dient.

5

De Coninc Sedekias sprac: Siet, hy is in uwen handen, want de Coninck en can niet tegen v.

6

^† Doen namen si Ieremiam, ende worpen hem inden Cuyl Malchie, des soons Hamelech die aenden voorhof der gheuanckenissen was. Ende si lieten hem met zeelen af inden Cuyl, daer gheen water, maer Modder in was, Ende Ieremias sonck inden Modder.

† Ierem. 20.a.2 26.b.8. 37.c.15

7

⁺ Maer als EbedMelech de Moor een Camerlinck in des Conincx huys, hoorde, datmen Ieremiam hadde inden Cuyl gheworpen. Ende de Coninc sat doen effen inder poorten BenIamin.

+ B vers 7

8

Doen ginc EbedMelech wt des Conincx huys, ende sprac metten Coninc, ende seyde:

9

Mijn heer Coninc, Die mannen handelen qualijc metten Propheet Ieremia, dat si hem

[p. 40r]

hebben inden Cuyl gheworpen, daer hy van hongher steruen moet. Wandt daer en is gheen broot meer inder stadt.

10

Doen beual de Coninc, EbedMelech den Moor, ende sprac:^† Neemt dertich mannen van desen met v, ende treckt den Propheet Ieremiam wt den Cuyl, eer hi sterue.

† Hist. vanden draeck. 21.

11

Ende EbedMelech nam de mannen met hem, ende ghinck in des Conincks huys, onder de Schatcamer, ende nam aldaer verschuerde, ende versleten oude^† vodden, Ende lietse aen een zeel af, tot Ieremiam inden Cuyl.

† Sletteren.

12

Ende EbedMelech de Moor sprack tot Ieremiam: Legt dese verschuerde ende versleten oude vodden onder uwe armen om dat zeel. Ende Ieremias dede also.

13

Ende si toghen Ieremiam opwaerts wt den Cuyle by de stricken. Ende Ieremias bleef also inden voorhof der gheuanckenissen.

14

^+† Ende de Coninc Sedekias sant henen, ende liet den Propheet Ieremiam tot hem halen onder den derden inganck aenden huyse des HEEREN. Ende de Coninck sprack tot Ieremiam: Ick wil v wat vraghen, Lieue, en verbercht doch voor my niet.

+ C vers 14

† Iere. 36.c.16.

15

Ieremias sprac tot Sedekiam: Segghe ick v wat, soo doot ghy my doch. Ende gheue ick v eenen raet, so en hoort ghy my niet.

16

Doen swoer de Coninck Sedekias Ieremie heymelijck, ende sprack: Soo warachtelijck als de HEERE leeft, die ons dese siele ghemaect heeft, soo en wil ick v niet dooden, noch den mannen inden handen geuen, die v nae uwen leuen staen.

17

Ende Ieremias sprac tot Sedekiam:^† Alsoo spreeckt de HEERE, de Godt Sebaoth, de Godt Israels: Ist sake dat ghy wt gaet totten Vorsten des Conincx tot Babel, Soo sult ghy leuendich blijuen, Ende dese stadt en sal niet verbrant worden, Maer ghy ende v huysghesinne sullen tleuen behouden.

† Iere. 27.b.12.

18

Maer indien dat ghy niet wt en gaet totten Vorsten des Babiloonischen Conincx, So sal dese stadt den Chaldeen inden handen worden ghegheuen, ende si sullense metten viere verbranden, Ende ghy en sult ooc haren handen niet ontcomen.

19

De Coninck Sedekias sprack tot Ieremiam: Maer ic sorghe, dat ic den Ioden, die totten Chaldeen gheuallen zijn, mocht ouer geleuert worden, dat si my bespotten.

20

Ieremias sprack: Men sal v niet ouer leueren, Lieue, weest doch der stemmen des HEEren ghehoorsaem, die ic v segghe, Soo salt v wel gaen, ende ghy sult leuendich blijuen.

21

Maer ist dat ghy niet wt en gaet, So is dit dat woort, dat my de HEERE gheopenbaert heeft:

22

⁺ Siet, alle de Wijuen die daer noch voor handen zijn inden huyse des Conincx Iuda, die sullen van hier wt moeten totten Vorsten des Conincx tot Babel. Die selue sullen dan segghen: Ach uwe troosters hebben v becout ende verleyt, ende inden Modder gheleyt, ende nv laten sy v daer in steken.

+ D vers 22

23

Alsoo sullen dat alle uwe Wijuen ende kinderen hier wt moeten totten Chaldeen, Ende ghi selue en sult haren handen niet ontgaen. Maer ghy sult vanden Coninck tot Babel ghegrepen,^* Ende dese stadt sal metten viere verbrant worden.

* 4.Re. 25.b.9.

24

Ende Sedekias sprac tot Ieremiam: Siet toe, dat dese redene niemant en verneme, so en sult ghi niet steruen.

25

Ende oftet de Vorsten vernamen, dat ic met v gesproken heb, ende quamen tot v, ende seyden: Segt op, wat hebt ghy metten Coninck gesproken? En versaectet ons niet, So en willen wy v niet dooden, Ende wat heeft de Coninck met v gesproken?

26

So segt: Ic hebbe den Coninc gebeden, dat hi my niet en soude wederom laten brengen inden huyse Ionathans, want ic mocht aldaer steruen.

27

Doen quamen alle de Vorsten tot Ieremiam, ende vraechden hem. Ende hy seyde, gelijc als hem de Coninc beuolen hadde. Doen lieten si van hem af, de wijle si niet van hem vernemen en conden.

28

Ende^† Ieremias bleef inden voorhof der gheuanckenissen, totten dage toe dat Ierusalem ghewonnen wert.

† Ierem. 39.c.11