Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvij. Capittel.

¶ Sedekias seynt tot Ieremiam, om

[p. 39v]

voor hem te bidden, Pharao trect wt Egipten den Coninc te helpen, Maer te vergheefs.

1

⁺ ENde Sedekias de sone Iosie wert^† Coninck inde plaetse Iechanie des soons Ioiakim. Wandt NebucadNezar de Babiloonische Coninc maecte hem Coninck inden Lande Iuda.

+ A vers 1

† 4.Regum. 24.d.17.

2

Maer hy ende sine knechten, ende dat volck inden lande en waren niet gehoorsaem den woorde des HEEREN, die hy door den Propheet Ieremiam sprac.

3

^† Dies niet te min soo seynde de Coninck Sedekias, Iuchal den sone Selemia, ende Sephania, den sone Maseia, den Priester totten Propheet Ieremia, ende dede hem segghen: Bidt doch den HEEre onsen Godt voor ons.

† Ierem. 21.a.1. 42.a.2.

4

Want Ieremias ghinc nv onder den volcke wt ende in, ende niemant en leyde hem inde geuanckenisse.^† Doen was dat heyr Pharaos wt Egipten getogen, Ende de Chaldeen, die voor Ierusalem gheleghen hadden, doen si sulcken gheruchte gehoort hadden,^† waren van Ierusalem af ghetoghen.

† Ezec. 17.b.12.

† Iere. 34.d.19.

5

Ende dat woordt des HEEren gheschiede totten Propheet Ieremiam, ende seyde:

6

⁺ Alsoo spreeckt de HEERE de Godt Israels: Segt den Coninck Iuda alsoo, die v tot my ghesonden heeft, om my te vragen: Siet, dat heyr Pharao, dat om v te helpen wt is getogen, dat sal wederom nae huys in Egipten trecken.

+ B vers 6

7

Ende de Chaldeen sullen wederom comen, ende dese stadt bestrijden, ende winnen, ende metten viere verbernen.

8

Daerom spreect de HEEre also: En bedriecht uwe siele niet, alsoo dat ghy denckt: De Chaldeen sullen van ons af trecken. Sy en sullen niet af trecken.

9

Ende oft ghi al dat gantsche heyr der Chaldeen sloecht, die teghen v strijden, Ende datter sommighe ghewonde ouerbleuen, so sullen si nochtans een yeghelijc in zijnder Tenten haer op maken, ende dese Stadt metten viere verbernen.

10

Als nv der Chaldeen heyr van Ierusalem was afghetoghen, om Pharaonis heyrs wille,

11

So ghinck Ieremias wt Ierusalem, ende woude int lant BenIamin gaen, om Ackeren te beschicken onder den volcke.

12

⁺ Als hy nv onder der poorten der BenIamiten quam, daer was ghestelt een poortwachter gheheeten Ieria, de sone Selemia, des soons^† Hanania.^* Die selue greep den Propheet Ieremia, ende sprack: Ghy wilt totten Chaldeen vallen.

+ C vers 12

† Iere. 28.b.5.

* Iere. 20.a.2. 26.b.8. 36.a.6

13

Ieremias seyde: Dat en is niet waer, Ick en wil totten Chaldeen niet vallen. Maer Ieria en woude hem niet hooren, maer greep Ieremiam, ende bracht hem totten Vorsten.

14

Ende de Vorsten werden toornich op Ieremiam, ende si deden hem slaen, ende werpen hem inde geuanckenisse inden huyse Ionathan des schrijuers. Ende si stelden den seluen tot eenen stocmeester.

15

^† Also ghinc Ieremias inden Cuyl ende kercker, ende lach aldaer eenen langhen tijt.

† Iere. 38.a.6.

16

^* Ende Sedekias de Coninc sant henen, ende liet hem halen, Ende vraechde hem heymelijck in sinen huyse, ende sprack: Isser oock eenich woordt vanden HEERE voorhanden? Ieremias sprack: Ia, want ghy sult den Coninc tot Babel inden handen gegeuen worden.

* Iere. 38.c.14.

17

⁺ Ende Ieremias sprack totten Coninck Sedekiam: Wat heb ick tegen v, teghen uwe knechten, ende tegen dit volc gesondicht, dat si my inden kercker geworpen hebben?

+ D vers 17

18

^† Waer zijn nv uwe Propheten, die v propheteerden, ende seyden: De Babyloonsche Coninck en sal niet ouer v, noch ouer dit lant comen?

† Ierem. 28. 29.

19

Ende nv mijn heer Coninck, hoort my, ende laet mijn bede voor v ghelden, Ende en laet my niet weder in Ionathans des schrijuers huys brengen, op dat ic aldaer niet en sterue.

20

Doen beual de Coninck Sedekias, datmen Ieremiam inden voorhof der gheuanckenissen verwaren soude. Ende dede hem alle dage een leefbroot geuen wt der backers strate, tot dat alle dat broot inder stadt op was. Also bleef Ieremias inden voorhof der geuanckenissen.