Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxvj. Capittel.

¶ Ieremias doet alle sine predikinghen in een boeck door Baruch schrijuen, op dat de Coninck ende de Vorsten die wt viantscap Ieremiam niet hooren en wouden, ten minsten de waerheyt souden hooren lesen. De Coninck verbernt dat boeck, Ende daer wort een ander gheschreuen, ende den Coninck zijn straffinghe vercondicht.

1

⁺ INden vierden iare Ioiakims des soons Iosie des Conincks Iuda, gheschiede dit woort tot Ieremiam vanden HEEre, ende sprack:

+ A vers 1

2

^* Neemt eenen boeck, ende schrijft daer in alle de woorden, die ick tot v ghesproken hebbe, ouer Israel, ouer Iuda, ende alle volcken, van die tijt aen, dat ick tot v ghesproken hebbe, Te weten, vander tijt Iosia aen, tot op desen dach toe.

* Ierem. 30.a.2.

3

Oft by auontueren dat huys Iuda, wanneer si hooren alle dat ongheluck dat ick haer dencke te doen,^† haer bekeeren wouden, een yeghelijc van sinen boosen wesen, op dat ick haer hare misdaet ende sonder vergheuen mochte.

† Ierem. 18.a.11

4

Doen riep Ieremias Baruch den sone Nerie,^† De selue Baruch screef in een boeck wt den Monde Ieremie alle de woorden des HEEren, die hy tot hem ghesproken hadde.

† Iere. 45.a.1.

5

Ende Ieremias gheboot Baruch, ende sprack: Ick ben gheuanghen, dat ick in des HEEren huys

[p. 39r]

niet gaen en mach.

6

Maer gaet ghy henen daer in, ende leest dit boeck, waer in ghy des HEEren woorden wt mijnen monde gheschreuen hebt, voor dat volck, inden huyse des HEEREN op eenen vasteldach, ende sultse oock lesen voor de ooren des gheheelen Iuda, die wt haren steden hier in comen,

7

Oft si misschien haer met ghebeden voor den HEERE verootmoedigen wouden, ende haer bekeeren, Een yeghelijck van sinen boosen wesen. Want den toorne ende gramschap is groot, waer af de HEEre teghen dit volck ghesproken heeft.

8

⁺ Ende Baruch de sone Nerie dede alle wat hem de Propheet Ieremias beuolen hadde, dat hy de woorden des HEEren wt den boecke las, inden huyse des HEEREN.

+ B vers 8

9

Maer het ghebuerde inden vijfsten iare Ioiakims des soons Iosie, des Conincx Iuda, inder negender maent,^† datmen eenen vasten vercondichde voor den HEEre, alle den volcke tot Ierusalem, ende alle den volcke dat wt den steden Iuda tot Ierusalem comet.

† Ione. 3.a.5.

10

^† Ende Baruch las wt den boecke de woorden Ieremie inden huyse des HEEren, inder Capellen Gemarie des soons Saphan des Cancelliers, inden oppersten voorhof^† voor de nieuwe poorte aent huys des HEEren, voor alle den volcke.

† Baruch. 1.a.3

† Iere. 26.b.11.

11

Als nv Michaia de sone Gemarie des soons Saphan alle de redenen des HEEren wt den boecke ghehoort hadde,

12

Soo ghinck hy henen af in des Conincx huys inde Cancelrie. Ende siet, aldaer saten alle de Vorsten, Elisama de Cancelier, Delaia de sone Semaia, Elnathan de sone Achbor, Gemaria de sone Saphan, ende Sedekias de sone Hananie, met alle de Vorsten.

13

Ende Michaia vercondichde haer alle de redenen die hy ghehoort hadde, Doen Baruch las wt den boecke voor de ooren des volcx.

14

Doen seynden alle de Vorsten, Iudi den sone Nathanie des soons Selemie, des soons Chusi nae Baruch, Ende deden hem segghen: Neemt dat boeck, daer ghy voor den volcke wt ghelesen hebt met v, ende coemt herwaerts. Ende Baruch de sone Nerie nam dat boeck met hem, ende quam tot haer.

15

⁺ Ende si spraken tot hem: Sit neder, ende leestet dat wijt hooren. Ende Baruch last haer voor haren ooren.

+ C vers 15

16

Ende doen si alle de woorden hoorden, soo waren sy verslaghen, deen teghen den anderen, Ende si spraken tot Baruch: Wy willen alle dese redenen den Coninck te kennen geuen.

17

Ende si vraechden den Baruch: Segt ons, hoe hebt ghy doch alle dese redenen wt sinen monde gheschreuen?

18

Baruch sprack tot haer: Hy las my alle dese redenen toe wt sinen monde, Ende ic screefse met inct inden boecke.

19

Doen seyden de Vorsten tot Baruch: Gaet henen, ende bercht v met Ieremia, dat niemandt en weet, waer dat ghy zijt.

20

Ende si ghingen henen totten Coninck inden voorhof, ende lieten dat boeck blijuen inder cameren Elisame des Cancelliers, Ende seyden voor den Coninc alle dese redenen.

21

Doen seynde de Coninc den Iudi henen, om dat boeck te halen. Die selue namt wt der Cameren Elisame des Cancelliers. Ende Iudi last voor den Coninck ende alle den Viorsten, die byden Coninck stonden.

22

Ende de Coninc sat int winterhuys inder neghender maent, voor den schoorsteen.

23

Als nv Iudi drie oft vier bladeren ghelesen hadde, soo sneedt hijt in stucken met eenen schrijfmesse,^† ende werpt int vier, dat voor den schoorsteen was, tot dat dat boeck gheheel verbernde inden viere.

† 1.Mac. 1.f.59. Act. 19.b.19.

24

Ende niemandt en^† versloech hem, noch en verschuerde sine cleederen, noch de Coninck, noch zijn knechten, die nochtans alle dese redenen gehoort hadden.

† Ontsettede.

25

Hoe wel nochtans Elnathan, Delaia, ende Gemaria den Coninck baden, dat hijt boeck doch niet en woude verbernen, Maer hi en hoorde haer niet.

26

Daer toe soo gheboot de Coninck Ierahmeel, den sone Hamelech, ende Sereia den sone Asriel, ende Selamia den sone Abdeel, dat si souden Baruch den schrijuer, ende Ieremiam den Propheet grijpen, Maer de HEEre hadse verborgen.

27

⁺ Doen gheschiede dat woort des HEEren tot Ieremiam, na dien dat de Coninc dat boeck, ende de redene (die Baruch hadde gheschreuen wt den monde Ieremie) verbrant hadde, ende sprack:

+ D vers 27

28

Neemt v wederom een ander boeck, Ende schrijft alle de voorseyde woorden daer inne, die inden eersten boeck stonden, dwelcke Ioiakim de Coninck Iuda verbrant heeft.

29

Ende segt van Ioiakim den Coninck Iuda, Alsoo spreeckt de HEERE: Ghy hebt dit boeck verbrandt, ende gheseyt: Waerom hebt ghy daer in gheschreuen, dat de Coninck van Babel sal comen, ende dit landt verderuen, ende makent alsoo, datter noch Lieden noch Vee meer in zijn en sullen?

30

Daerom spreeckt de HEERE van Ioiakim den Coninck Iuda:^† Daer en sal niemandt vanden sinen op den stoel Dauids sitten.^* Ende zijn Lichaem sal wech gheworpen des daechs inder hitte, ende des nachts inden vorste ligghen.

† 4.Regum. 24.b.17.

* Iere. 22.c.18.

31

Ende ick wil hem ende zijn saet, ende sine knechten besoecken, om haerder misdaets wille. Ende ick wil ouer haer, ende ouer de Borghers te Ierusalem, ende ouer die in Iuda laten comen, alle dat ongheluck, dat ick haer ghesproken hebbe, ende si doch niet en hooren.

32

Doen nam Ieremias een ander boec, ende gaft Baruch den sone Nerie den Schrijuer.^* Die schreef daer in wt den monde Ieremie, alle de redenen, die in dat boeck stonden, dat Ioiakim de Coninck Iuda hadde met vier laten verbernen. Ende tot den selfden werden der redenen noch veel meer, dan der andere waren.

* Ierem. 30.a.2. 36.a.2.