Den Bibel, Inhoudende dat Oude ende Nieuwe Testament (Biestkensbijbel)

[p. 38v]

¶ Dat .xxxv. Capittel.

¶ De Propheet straft dat ongehoorsaem volck door een ghelijckenisse der Rechabiteren, Ende hy bewijst haer dattet schandelijck is, dat sy Godts haers HEEren wet niet en houden, hoe wel de Rechabiten haers vaders Ionadabs beuel, also scherp nochtans hielden.

1

⁺ DIt is dat woort dat vanden HEERE gheschiede tot Ieremiam, ter tijt Ioiakims, des soons Iosie, des Conincx Iuda, ende sprack:

+ A vers 1

2

Gaet henen inder^† Rechabiten huys, ende spreect met haer, ende brengtse in des HEEren huys, in een vanden Capellen, ende schenct haer wijn.

† 4.Re. 10.c.15.

3

Doen nam ick Iasaniam den sone Ieremia, des soons Habazinia, met zijnen broederen, ende alle sine sonen, ende dat gantsche huys der Rechabiten,

4

Ende brachtse in des HEEREN huys, inde Capelle der kinderen Hanan, des soons Iegdalie, des Mans Godts, de welcke neffens der Vorsten Capelle is, bouen de Capelle Maseia, des soons Sallum, des poortwachters.

5

Ende ick settede den kinderen vanden huyse der Rechabiten, Bekeren vol wijns voor, ende Schalen, ende sprac tot haer: Drinckt Wijn.

6

Maer si antwoorden: Wy en drincken gheenen Wijn, Wandt onse Vader Ionadab de sone Rechab, heeft ons gheboden ende gheseyt: Ghy, ende uwe kinderen en sult nemmermeer gheenen Wijn drincken,

7

^† Ende geen huys timmeren, gheen saet saeyen, gheenen Wijnberch planten, noch hebben. Maer ghy sult in Hutten woonen, alle uwe leuen lanck, op dat ghy langhe leuet inden lande daer ghy inne wandelt.

† Ierem. 29.a.5

8

⁺ Also zijn wy ghehoorsaem de stemme ons Vaders Ionadabs, des soons Rechabs, in alle dat hy ons geboden heeft. Alsoo dat wy gheenen wijn en drincken, onse leuen lanck, noch wy, noch onse wijuen, noch sonen, noch dochteren.

+ B vers 8

9

Ende en timmeren ooc gheen huysen, daer wy in woonen,

10

Ende en hebben, noch Wijnberghen, noch Ackers, noch saet, Maer wy woonen in Hutten, ende hooren ende doen alle dinck, ghelijck onse Vader Ionadab gheboden heeft.

11

Maer als NebucadNezer de Babyloonsche Coninck herwaerts op int Lant tooch, doen spraken wy: Coemt, laet ons nae Ierusalem trecken, voor dat heyr der Chaldeen, ende der Assyriers, ende wy zijn alsoo tot Ierusalem ghebleuen.

12

Doen geschiede dat woort des HEEren tot Ieremiam, ende sprack:

13

Alsoo seyt de HEERE Sebaoth, de God Israels: Gaet henen, ende spreeckt tot dien in Iuda, ende totten Borghers tot Ierusalem: En wilt ghy v dan niet beteren, dat ghy mijnen woorden hoort? Spreeckt de HEERE.

14

De woorden Ionadabs des soons Rechabs, die hy sinen kinderen gheboden heeft, dat si gheenen wijn en souden drincken, die worden ghehouden, ende sy en drincken geenen wijn, tot op desen dach, daerom dat si haers Vaders gebot hooren. Ende ick heb v^† ghestadelijck laten prediken, ende nochtans en hoort ghi my niet.

† Vroech.

15

⁺ Desghelijcx soo hebbe ick ooc ghestadelijc tot v gesonden alle mijne knechten de Propheten, ende laten seggen:^† Bekeert v, een yeghelijck van sinen boosen wesen, ende betert uwe wesen, Ende en volcht gheen andere Goden na, om haer te dienen, Soo sult ghy inden lande blijuen, dwelcke ick v, ende uwen Vooruaderen ghegheuen hebbe.^* Maer ghy en wout uwe ooren niet herwaerts neygen, noch my hooren.

+ C vers 15

† Iere. 18.a.11. 25.a.5. Ionas. 3.b.8. 4.Re. 17.c.13. Ezech. 18.e.30

* Prou. 1.b.24. Esai. 65.b.11. 66.a.4. Iere. 7.b.13.

16

Soo doch de kinderen Ionadabs des soons Rechabs haers Vaders ghebot ghehouden hebben, dat hy haer gheboden heeft. Maer dit volck en hoort my niet

17

Daerom soo spreect de HEERE de Godt Sebaoth, ende de Godt Israels: Siet, ick wil ouer Iuda, ende ouer alle Borgers tot Ierusalem laten comen, alle dat ongheluck dat ick teghen haer gesproken hebbe, Om dat ick tot haer ghesproken hebbe, ende si my niet en willen hooren, Ick hebbe geroepen, Ende si en willen my niet antwoorden.

18

Ende totten huyse der Rechabiten sprack Ieremias: Also spreect de HEEre Sebaoth, de Godt Israels: Daerom dat ghy den gebode ws Vaders Ionadabs hebt gehoort, ende alle sine gheboden ghehouden, ende al dat ghedaen wat hy v gheboden heeft,

19

Daerom spreect de HEEre Sebaoth de Godt Israels alsoo:^† Het en sal Ionadab den sone Rechabs nemmermeer faelgeren, of daer en sal yemant vanden sinen alle tijt voor my staen.

† Ierem. 33.c.18