Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxxiij. Capittel.

¶ Dit Capittel is een openbare ende onwedersprekelijcke Prophecie vanden rijcke Christi.

1

⁺ ENde des HEEren woort geschiede tot Ieremiam ten anderen male,^† doen hy noch inden voorhof der gheuanckenissen besloten was, ende sprack:

+ A vers 1

† Ierem. 20.a.2 32.a.2.

2

Alsoo spreect de HEERE, die sulcx maect, doet, ende volbrengt, HEERE is sinen Naem:

3

Roept my, soo wil ick v antwoorden, Ende wil v condt doen groote ende machtighe dinghen, die ghy niet en weet.

4

Want alsoo seyt de HEEre de God Israels, vanden huysen deser stadt, ende vanden huysen der Coninghen Iuda. Welcke afghebroken zijn, om bolwerc te maken ter were,

5

Ende vanden genen die daer in ghecomen zijn, op dat si tegen de Chaldeen strijden moghen, dat si de selue vullen moeten met doode Lichamen, de welcke ick in mijnen toorne ende gramschappe verslaen wil. Wandt ick hebbe mijn aensicht van deser Stadt verborghen, om alle haerder boosheden wille.

6

Siet, ick wilse heelen, ende ghesont maken, ende wil hen des ghebets om vrede ende trouwe, ontwijden.

7

Wandt ick wil de gheuanckenisse Iuda, ende de geuanckenisse Israels weynden, ende wilse timmeren ghelijck van aenbeghin.

8

^+† Ende wilse reynighen van alle hare misdaet, daer si mede teghen my ghesondicht hebben,^* ende wil haer alle misdaet vergheuen, daer mede si teghen my ghesondicht, ende ouergetreden hebben.

+ B vers 8

† Esa. 43.d.25. Psal. 130.a.8.

* Col. 2.b.13.

9

Ende dat sal my eenen vrolijcken Naem, Roem, ende prijs zijn onder alle Heydenen opter Aerden. Als si sullen hooren alle dat goet dat ick haer doe. Ende sy sullen haer verwonderen, ende ontsetten, van allen den goeden, ende van alle den vrede, die ick hen gheuen wil.

10

Alsoo spreect de HEERE:^† Op dese plaetse, waer af ghy segt: Sy is woest, aengesien datter noch Lieden noch Vee, inden steden Iuda, ende op de straten te Ierusalem en blijft (die so verwoest zijn, datter noch Lieden, noch Borgers, noch Vee daer in en is)

† Ierem. 7.d.33

11

Salmen nochtans wederom hooren een geroep van vruechden ende ghenoechten, de stemme des Bruydegoms ende der Bruyt, Ende de stemme der gheender die daer segghen: Danct den HEEre Sebaoth, dat hy so ghenadich is, ende doet altoos wel, Ende der gheender die daer Drancoffer brenghen tot den huyse des HEEren.^* Want ick wil des Lants geuanckenisse weynden, ghelijck als van aenbeghinne, spreeckt de HEEre.

* Iere. 33.d.26.

12

⁺ Alsoo spreeckt de HEEre Sebaoth: Op dese plaetse, die soo woest is, datter noch Lieden noch Vee daer in en zijn, ende in alle sine steden,^* sullen nochtans wederom Herders Hutkens zijn, die de Cudde weyden,

+ C vers 12

* Esaie. 27.a.6

13

Beyde inden steden opten geberchten, ende inden steden inden Valleyen, ende inden steden tegent Suyden, inden Lande BenIamin, ende rontom Ierusalem, ende inden steden Iuda. Daer sullen nochtans wederom de Cudden getelt, wt ende in gaen, seyt de HEEre.

14

^† Siet, de tijt coemt, spreect de HEEre, dat ick dat ghenadige Woort verwecken wil, dat ick den huyse Israels ende den huyse Iuda ghesproken hebbe.

† Ierem. 23.a.5.

15

Inden seluen daghen, ende ter seluer tijt wil ick den^† Dauid een vrucht der gerechticheyt laten opgaen^* (Ende het sal een Coninck zijn, die wel regeren sal) Ende sal dat Recht ende gerechticheyt aenrichten op Aerden.

† Ezec. 37.d.24 Ierem. 23.a.5.

* Esaie. 32.a.1

16

Ter seluer tijt sal Iuda geholpen worden,^† ende Ierusalem seker woonen. Ende men sal hem noemen: De HEEre,^* die onse Rechtueerdicheyt is.

† Esaie. 32.c.18.

* 1.Cor. 1.d.29

17

Want also spreect de HEEre:^† Het en sal nemmermeer faelgeren, daer en sal een van Dauid sitten opten stoel des huys Israels.

† 2.Regum. 7.c.13

18

^* Desghelijcken en salt nemmermeer faelgeren, daer en sullen^† Priesters ende Leuiten zijn voor my, die daer Brantoffer doen ende Spijsoffer aensteken, ende offeren slaen eewelijck.

* 1.Reg. 2.g.35.

† Esai. 61.a.6 66.d.21. 1.Pet. 2.a.9.

19

⁺ Ende dat woordt des HEEren gheschiede tot Ieremiam, ende seyde:

+ D vers 19

20

Also seyt de HEERE:^† Als mijn verbondt op houden sal met den dach ende den nacht, dattet gheen dach ende nacht en si tot zijnder tijt,

† Genes. 8.d.22.

21

Dan sal oock mijn verbont ophouden met mijnen knecht Dauid, dat hy gheenen sone en hebbe tot eenen Coninck op sinen stoele, Ende metten Leuiten^* ende Priesteren mijne dienaers.

* Esaie. 61.a.6. 66.b.21. 1.Pet. 2.a.9.

22

^† Ghelijck alsmen dat heyr des Hemels niet getellen, noch dat sant aender zee niet ghemeten en can, alsoo wil ic vermeerderen dat saet Dauids mijns knechts ende de Leuiten die my dienen.

† Gene. 15.a.5 22.c.17.

23

Ende des HEEREN woordt gheschiede tot Ieremiam, ende seyde:

24

En hebt ghy niet gesien, wat dit volc spreect, ende seyt? De HEERE heeft doch ooc die twee gheslachten verworpen, die hy vercoren hadde, Ende lasteren mijn volck, recht oft si mijn volck niet meer zijn en

[p. 38r]

souden.

25

Alsoo spreeckt de HEERE: Indien dat ick mijn verbont niet en houde metten dach ende nacht, noch de ordinancie des Hemels ende der Aerden,

26

Soo wil ick oock dat saet Iacobs ende Dauids, mijns knechts verwerpen, dat ick wt haren sade niet en neme, die daer heerschappen ouer dat saet Abrahams, Isaacs ende Iacobs.^* Want ick wil hare gheuanckenisse weynden, ende my haerder ontfermen.

* Ierem. 33.b.11