Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxix. Capittel.

¶ Eenen brief die Ieremias den gheuanghenen tot Babilonien seynt, inden welcken hy haer heet huysen timmeren, planten, ende andere menschelijcke wercken te oeffenen, ende de geuanckenisse met alder ootmoedicheyt te lijden, wandt sy langhe dueren sal. Hoe dat die gestraft worden, die daer teghen leeren.

1

⁺ DIt zijn de woorden inden Brief, den welcken de Propheet Ieremias seynde van Ierusalem, totten ouerghebleuenen Outsten, die wech gheuoert waren, ende tot den Priesteren ende Propheten, ende allen den volcke, dat NebucadNezar van Ierusalem na Babel wech gheuoert hadde

+ A vers 1

2

(Na dien dat de Coninck Iechanias, ende de Coninghinne, metten Camerlinghen ende den Vorsten in Iuda ende Ierusalem, met den timmerlieden, ende smeden te Ierusalem

3

Wech waren) door Eleasan den sone Saphan, ende Gamaria, den sone Hilkia (die Sedekias de Coninck Iuda sant na Babel tot NebucadNezar, den Coninc tot Babel) ende sprack:

4

⁺ Aldus spreect de HEEre Sebaoth, de Godt Israels, tot allen gheuanghen, die ick van Ierusalem hebbe laten wech voeren, na Babel.

+ B vers 4

5

^† Timmert huysen, daer ghy inne woonen muecht, Plant houen, daer wt ghy de vruchten eten moecht.

† Ierem. 35.a.7

6

^† Neemt wijuen, ende wint sonen ende dochteren. Neemt uwen sonen wijuen, ende gheeft uwen dochteren mannen, dat sy sonen ende dochteren crijghen. Vermeerdert v aldaer, dat uwer niet weynich en sy.

† Gene. 1.d.28 9.a.1.

7

Soect der stadt^* beste, derwaerts ick v hebbe laten wech voeren,^* Ende biddet voor haer tot den HEEre: Wandt alst haer wel gaet, soo gatet v oock wel.

* Weluaert.

* Baruc. 1.c.11. 1.Tit. 2.a.1.

8

Want alsoo spreect de HEEre Sebaoth, de Godt Israels: En laet v de Propheten die by v zijn, ende de Waerseggers niet bedrieghen,^† Ende en hoort uwen droomen niet, die v droomen.

† Ierem. 23.c.16 27.b.9.

9

Want sy Propheteren v lueghenen, in mijnen Name, Ick en hebse niet gesonden, spreect de HEEre.

10

^* Want also spreect de HEEre: Wanneer tot Babel tseuentich Iaer wt zijn, so wil ick v besoecken, ende wil mijn genadich woort ouer v verwecken, dat ick v weder tot deser plaetsen brenghe.

* 2.Pa. 36.d.21 Iere. 25.b.12.

11

⁺ Want ick weet wel, wat ick voor gedachten ouer v hebbe spreeckt de HEEre, Te weten, ghedachten des vredes ende niet des leets, dat ick v gheue dat eynde, dat welcke ghy verwachtet.

+ C vers 11

12

^† Ende ghi sult my aenroepen, ende henen gaen ende my bidden, ende ick wil v verhooren.

† Deut. 4.c.29. 30.a.3. Iob. 22.c.27.

13

^* Ghy sult my soecken, ende vinden. Want als ghy my van gantscher herten sult soecken, soo wil ick my van v laten vinden, spreect de HEEre.

* Mat. 7.a.7. Luc. 11.a.9. Ioan. 7.d.34.

14

Ende wil uwe gheuanckenissen weynden, ende v vergaderen wt allen volcken, ende van allen plaetsen, derwaerts ick v verstooten hebbe, seyt de HEEre. Ende ick wil v wederom tot deser plaetsen brengen, van daer ick v hebbe laten wech voeren.

15

Wandt ghy meynt, dat v de HEEre tot Babel Propheten verwect heeft.

16

Wandt alsoo spreeckt de HEERE vanden Coninck, die op Dauidts stoele sit, ende van alle den volcke, dat in deser stadt woont, te weten, van uwen broederen,^* die met v niet gheuanckelijck wtghetoghen en zijn.

* 4.Reg. 14.d.17.

17

Ia also spreect de HEEre Sebaoth: Siet, Ick wil dat sweert, hongher ende Pestilentie onder haer seynden, ende ick wil met haer omgaen,^† ghelijck als met de quade vijghen, daermen de walghinghe af crijghet om te eten.

† Iere. 24.a.3. Hose. 9.b.10.

18

Ende ick wil achter haer zijn, metten sweerde, hongher ende Pestilentie,^† Ende ick en wilse in gheen Coninckrijcke op Aerden laten blijuen, dat sy tot eenen vloeck ende wonder, tot eenen schimp ende spot, onder alle volcken worden sullen, daer ickse henen verstooten sal.

† Iere. 24.b.9.

19

Daerom dat sy mijne woorden niet en hooren, spreeckt de HEERE.^† Ick die mijne knechten de Propheten^* gestadelijck tot v gesonden hebbe: Maer ghy en wout niet hooren, spreect de HEEre.

† Ier: 7.c.24. 25 a.4. 44.a.4.

* Vroech.

20

⁺ Maer alle ghy, ghy die gheuanckelijc zijt wech geuoert, die ick van Ierusalem na Babel hebbe laten trecken, Hoort dat

+ D vers 20

[p. 35v]

woort des HEEREN:

21

Aldus seyt de HEEre Sebaoth, de Godt Israels, teghen Ahab, den sone Kolaia, ende teghen Sedekiam, den sone Maseia, die v in mijnen Name valschelijck propheteren: Siet, Ick wilse geuen in de handen NebucadNezars des Conincx te Babel, die salse laten slaen voor uwen ooghen,

22

Datmen wt den seluen eenen vloeck maken sal onder alle gheuangen wt Iuda, die tot Babel zijn, ende segghen: De HEEre doe v ghelijck als Sedekia ende Ahab, welcke de Coninck te Babel op dat vyer braden liet.

23

Om datse in Israel een dwaesheyt bedreuen, ende deden met ander [lieden] wijuen ouerspel, ende predicten valschelijck in mijnen Name, dat ic haer niet beuolen en hadde. Sulcx weet ick ende betuyghe het, seyt de HEEre.

24

Ende teghen Semaia van Nehalam suldy segghen, Aldus spreeckt de HEEre Sebaoth, de Godt Israels:

25

Daerom dat ghy onder dijnen name brieuen ghesonden hebt tot alle den volcke dat tot Ierusalem is,⁺ ende tot den Priester Sephaniam, den sone Maseia, ende tot allen Priesters, ende gheseyt:

+ E vers 25

26

De HEERE heeft v tot eenen Priester gheset, in de plaetse des^† Priesters Iehoiada. Op dat ghy opsienders soudt zijn inden huyse des HEEREN, ouer alle onsinnighe ende propheteerders dat ghyse inden kercker ende stock soudt setten.

† 4.Re. 11.a.4. 2.Par. 23.a.1.

27

Nv waerom en straft ghy dan Ieremiam van Anathoth niet, die v propheteert?

28

Daerom dat hy tot ons na Babel gesonden heeft, ende laten segghen: Het sal noch langhe dueren, Timmert huysen, daer ghy in woonen, ende plantet houen, dat ghy de vruchten daer af eten muecht.

29

Wandt Sephania de Priester had den seluen brief ghelesen, ende den Propheet Ieremiam laten toehooren.

30

Daerom gheschiede dat woordt des HEEren tot Ieremiam, ende seyde:

31

Seyndet henen tot allen geuangenen ende laet haer segghen: Alsoo spreeckt de HEERE, teghen Semaia van Nehalam:^† Daerom dat v Semaia propheteert, ende dat ick hem nochtans niet ghesonden en hebbe, ende maect dat ghy op lueghenen betrout,

† Ierem. 28.c.15

32

Daerom spreeckt de HEEre alsoo: Siet, Ick wil Semaiam van Nehalam besoecken, met zijnen sade, dat niemant vanden zijnen onder dit volc blijuen en sal, ende en sal dat goede niet sien, dat ic mijnen volcke doen wil, spreect de HEERE. Want hy heeftse met zijnder reden vanden HEEre afghekeert.