Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxviij. Capittel.

¶ Hananias de valsce Propheet vercondicht vrijheyt, maer niet wt den HEEre, ende teghen hem spreect Ieremias, Hananias neemt de banden vanden hals Ieremie, ende breectse, hi wil daermede bewijsen, dat God den bant NebucadNezars oock alsoo breken wil, Maer de HEEre verthoont Ieremie, dat de gheuanckenisse veel herder worden sal.

1

⁺ ENde int selfde iaer, int aenbeghin des Conincrijcx Sedechie, des Conincx Iuda, in der vijfster Maent des vierden Iaers, sprack Hanania, de sone Assur een Propheet van Gibeon tot my, inden huyse des HEEREN, inder tegenwoordicheyt der Priesteren, ende des gantschen volcx, ende seyde:

+ A vers 1

2

Alsoo spreect de HEERE Sebaoth de Godt Israels: Ick hebbe dat iock des Conincx tot Babel, in stucken gebroken.

3

^* Ende eer twee iaer om zijn, wil ick de vaten des huys des HEEren, de welcke NebucadNezar de Coninck te Babel van dese plaetse wech ghenomen heeft, ende na Babel gheuoert, wederom op dese plaetse brenghen:

* Iere. 27.c.17.

4

Daer en bouen Iechaniam den sone Ioiakim, den Coninck Iuda, met alle de gheuanghenen wt Iuda, die na Babel geuoert zijn, wil ick oock weder op dese plaetse brengen, seyt de HEEre, Wandt ick wil dat iock des Conincx tot Babel in stucken breken.

5

⁺ Doen sprack de Propheet Ieremias totten Propheet Hanania, inder teghenwoordicheyt der Priesteren, ende des gantschen volcx, die inden huyse des HEEren stonden,^† ende seyde:

+ B vers 5

† Mich. 3.c.11.

6

Amen, De HEEre doe alsoo. De HEERE beuestige dijn woort, dat ghy ghepropheteert hebt, dat hy de vaten wt den huyse des HEEren van Babel weder brenghe, op dese plaetse, met alle de gheuanghene.

7

Maer hoort doch oock dit woort, dat ick voor dijnen ooren spreke, ende voor de ooren des gantschen volcx:

8

De Propheten die voor my ende dy geweest zijn van outs herwaerts, die hebben teghen veel landen, ende groote Coninckrijcken ghepropheteert, van Oorloghe, van ongeluck, ende van Pestilentie.

9

Maer wanneer een Propheet van vrede propheteert

[p. 35r]

dien salmen kennen, oft hem de HEEre warachtelijck gesonden heeft,^* wanneer zijn woort veruult wort.

* Deut. 18.d.22. Num. 16.a.5.

10

⁺ Doen nam de Propheet Hananias dat iock vanden halse des Propheets Ieremie, ende bract in stucken.

+ C vers 10

11

Ende Hananias sprack inder teghenwoordicheyt des gantschen volcx: Aldus seyt de HEEre: Effen alsoo wil ick in tween breken dat iock NebucadNezars des Conincx tos Babel, eer twee Iaer om comen vanden halse alder volcken.

12

Ende de Propheet Ieremia ghinck zijns weechs. Maer des HEEren woordt gheschiede tot Ieremiam, na dien dat de Propheet Hananias dat iock vanden halse des Propheten Ieremie in tween ghebroken hadde, ende sprack:

13

Gaet henen, ende segt Hananie: Also spreect de HEERE: Ghy hebt dat houten iock in stucken gebroken, Soo maect nv een yseren iock in gheens plaetse.

14

Wandt also spreect de HEERE Sebaoth, de Godt Israels: Een yseren iock heb ick allen desen volcken aenden hals ghehangen, daer sy mede dienen sullen NebucadNezar, den Coninck te Babel, Ende si moeten hem dienen, Wandt ick heb hem oock de wilde dieren ghegheuen.

15

Ende de Propheet Ieremias sprack totten Propheet Hanania: Hoort doch, Hanania,^† De HEEre en heeft v niet ghesonden, Ende ghy hebt ghemaect, dat dit volck hem op lueghenen verlaet.

† Iere. 29.e.31.

16

Daerom seyt de HEERE also: Siet, Ick wil v vanden Aertbodem nemen, van desen iare sult ghy steruen, wandt ghy hebtse met dijner reden vanden HEEre af ghekeert.

17

Alsoo^† sterf de Propheet Hanania inden seluen Iare, inder seuenster maent.

† Deut. 13.a.5. 18.d.20.