Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvij. Capittel.

¶ Godt de HEERE beueelt den Propheet eenen halsbant te maken, met den welcken hy den Heydenschen Coninghen haer gheuanckenisse soude bewijsen, ende te verstaen gheuen.

1

⁺ INden beghinne des Coninckrijcx Ioiakim, des soons Iosia, des Conincx Iuda, gheschiede dat woordt vanden HEERE tot Ieremiam, ende sprack:

+ A vers 1

2

Alsoo seyt de HEEre tot my: Maect v een iock, ende hanget aen dijnen hals,

3

Ende seyntet tot den Coninck in Edom, tot den Coninck in Moab, tot den Coninck der kinderen Ammon, tot den Coninck tot Tyro, ende tot den Coninck tot Sidon, by de boden, die tot Sedekiam den Coninck Iuda tot Ierusalem gecomen zijn.

4

Ende beueelt haer, dat sy haren Heeren segghen: Alsoo spreeckt de HEEre Sebaoth de Godt Israels. Aldus sult ghy uwen Heeren segghen:

5

Ick^* hebbe de Aerde ghemaect, ende de Menschen, ende dat Vee, die op Aerden zijn, door mijne groote cracht ende wtghestreckten arm, Ende ick gheefse wien ick wil.

* Deu. 10.c.14 Psa. 146.a.6 Act. 14.c.14.

6

^† Nv heb ick alle dese Landen ghege-

† Eccl. 10.a.10 Iudi. 11.d.24. Iere. 32.a.3. Dan. 4.c.24.

[p. 34v]

uen in de handen^* mijns knechts NebucadNezars, des Conincx te Babel. Ende ick hebbe hem ooc de wilde dieren opten velde ghegheuen dat sy hem dienen sullen.

* Iere. 21.b.10. 25.b.9. 38.a.3.

7

Ende alle volcken sullen hem, ende zijnen sone, ende zijns soons sonen dienen, tot dat den tijt zijns Landts oock coemt. Wandt veel volcken, ende groote Coninghen sullen hem dienen.

8

Maer soo wat volck ende Coninckrijck den Coninck te Babel, NebucadNezar niet dienen en wil, Ende so wie zijnen hals niet geuen en sal onder dat iock des Conincx tot Babel, soodanighen volck wil ick besoecken,^* met den sweerde, hongher ende Pestilentie, seyt de HEEre, tot dat icse door zijne hant verdoe.

* Iere. 24.b.10. 42.c.17. Ezech. 6.c.11. Eccl. 40.b.19

9

⁺ Daerom^† en hoort uwe Propheten, Propheteerders, Droombedieders, Dachverkiesers ende Toouenaers niet, die v segghen: Ghy en sult den Coninck te Babel niet dienen.

+ B vers 9

† Iere. 23.c.16. 29.b.9.

10

Wandt sy propheteren v valschelijck, op dat sy v verre wt uwen Lande brenghen, ende dat ick v wtstoote, ende ghy vergaet.

11

Wandt soo wat volck dat zijnen hals onder dat iock des Conincx te Babel gheeft, ende hem dient, dat wil ick zijnen lande laten, dattet dat selfde bouwe ende bewoone, spreect de HEERE.

12

Ende ick sprac sulcx al tot Sedekiam den Coninck Iuda, ende sprack:^† Gheeft uwen hals onder dat iock des Conincx tot Babel, ende dient hem ende zijnen volcke, soo sult ghy leuendich blijuen.

† Iere. 38.c.17.

13

Waerom wilt ghy steruen, ghy, ende dijn volck, door^* tsweert, hongher ende Pestilentie? Ghelijck dan de HEEre gesproken heeft ouer dat volck, dat den Coninck tot Babel niet dienen en wil.

* Ezec. 14.d.21.

14

^† Daerom en hoort de woorden der Propheten niet, die v segghen: Ghy en sult niet moeten dienen den Coninck tot Babel, Want sy propheteren v valschelijck.

† Iere. 23.c.16. 29.b.9.

15

Ende ick en hebse niet ghesonden, spreect de HEEre, Maer sy propheteren valschelijck in mijnen Name, op dat ick v wtstoote, ende dat ghy, tsamen metten Propheten die v propheteren, muecht vergaen.

16

⁺ Ende totten Priesteren ende tot allen desen volcke seyde ick, ende sprack: Aldus spreect de HEEre: En hoort de woorden uwer Propheten niet, die v propheteren ende segghen:^† Siet, de vaten wt den huyse des HEEren, sullen nv haest van Babel weder herwaerts comen. Wandt sy propheteren v valschelijcken.

+ C vers 16

† Iere. 28.a.2.

17

En hoort haer niet, Maer dient den Coninck tot Babel, soo sult ghy leuendich blijuen. Waerom sal doch dese stadt tot eender woestijnen worden?

18

Maer zijn sy Propheten, ende hebben sy des HEEREN woordt, soo laetse het den HEEre Sebaoth afbidden, dat de ouerghebleuen vaten inden huyse des HEEren, ende inden huyse des Conincx Iuda ende tot Ierusalem, oock niet na Babel gheuoert en worden.

19

Want also seyt de HEEre Sebaoth, vanden Columnen, ende vander See, ende vanden ghestoelte, ende vanden vaten die noch ouergebleuen zijn in deser stadt,

20

De welcke NebucadNezar de Coninc te Babel niet wech en nam,^* doen hy Iechaniam den sone Ioiakim den Coninc Iuda van Ierusalem wech voerde na Babel, met alle de Vorsten in Iuda ende Ierusalem.

* 4.Re. 24.c.15

21

Wandt aldus spreeckt de HEERE Sebaoth, de Godt Israels, vanden vaten die noch ouerghebleuen zijn inden huyse des HEEREN, ende inden huyse des Conincx Iuda, ende te Ierusalem:

22

Sy^* sullen na Babel gheuoert worden, ende aldaer blijuen, tot op den dach toe, dat ickse versoecke, seyt de HEERE,^† Ende ickse weder tot deser plaetsen laet brenghen.

* 4.Re. 25.b.15

† 1.Esd. 1.b.5.