Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxvj. Capittel.

¶ De Propheet dreycht dat volck wt Godts beuel, indien sy haer niet en beteren soo wil hy den Tempel doen gelijck Silo, Daerom wert hy gheuanghen vanden Priesters ende valsche Propheten. Nochtans werdt hy na langen tijt weder los door Ahikam.

1

⁺ INden beghinne des Conincrijcx Ioiakim des soons Iosia des Conincx Iuda, geschiede dit woort vanden HEE-

+ A vers 1

[p. 34r]

re, ende sprack:

2

Also^† spreect de HEEre: Treedt inden voorhof aen het huys des HEEren, ende predickt allen steden Iuda die daer in gaen om aen te beden inden huyse des HEEren, alle de woorden die ick v beuolen hebbe, haer te segghen,^† ende en doet daer niet af.

† Iere. 7.a.2. 17.d.19.

† Deut. 4.a.2. 12.d.32. Prou. 30.a.6.

3

Oft sy misschien hooren wouden, ende haer bekeeren, een yeghelijck van zijnen boosen wesen. Op dat my oock berouwen mochte dat quaet, dat ick haer dencke te doen, om haers boosen wesens wille.

4

Ende segt tot haer: Also seyt de HEEre: Ist sake dat ghy my niet ghehoorsaem en zijt, dat ghy in mijne wet wandelt, die ick v voorgheleyt hebbe,

5

Dat ghy hoort de woorden mijnder knechten der Propheten, die ick^† gestadelijck tot v gesonden hebbe. Ende indien ghy nochtans niet hooren en wilt,

† Vroech.

6

So^* wil ict met desen huyse maken, gelijck met Silo, Ende dese stadt allen Heydenen op Aerden tot eenen vloeck maken.

* 1.Reg. 4. Iere. 7.b.14.

7

⁺ Doen nv de Priesters, Propheten, ende alle dat volck Ieremiam hoorden, dat hy sulcke woorden sprack inden huyse des HEEren.

+ B vers 7

8

Ende als Ieremias wtgesproken hadde, alle dat hem de HEEre beuolen hadde allen volcke, te segghen.^* Doen grepen hem de Priesters, Propheten, ende dat gantsche volck, ende seyden: Ghy moet steruen.

* Iere. 20.a.2. 37.c.12. 38.a.6

9

Waerom derft ghy propheteren inden Name des HEEREN ende segghen: Het sal desen huyse gaen, ghelijck als Silo, ende dese stadt sal soo woest worden dat daer niemant meer inne woonen en sal? Ende dat gantsche volc vergaderde hem inden huyse des HEEren teghen Ieremiam.

10

Doen de Vorsten Iuda sulcx hoorden, ghinghen sy wt des Conincx huyse op, int huys des HEEren, ende setten haer^† voor de nieuwe poorte des HEEren.

† 4.Re. 15.g.35 Iere. 36.b.9.

11

Ende de Priesters ende Propheten spraken voor de Vorsten ende allen den volcke: Dese is des doots schuldich, wandt hy heeft ghepropheteert tegen dese stadt, ghelijck ghy met uwen ooren ghehoort hebt.

12

⁺ Maer Ieremias sprack tot allen den Vorsten ende tot alle den volcke: De HEEre heeft my herwaerts gesonden, dat ick sulcx, alle dat ghy ghehoort hebt, soude propheteren teghen dit huys ende tegen dese Stadt.

+ C vers 12

13

^* Daerom so betert nv uwe wesen ende handel, ende zijt ghehoorsaem der stemmen des HEEREN dijns Gods, so sal den HEEre oock berouwen dat quaet dat hy teghen v ghesproken heeft.

* Ierem. 7.a.3. Esaie. 1.c.16.

14

Siet, Ick ben in uwen handen, ghy mueget met my maken hoet v recht ende goet dunct.

15

Nochtans sult ghy weten, in dien ghy my doodet,^* soo sult ghy v seluen, ende dese stadt, ende hare Inwoonders, des ontschuldighen bloets schuldich maken. Wandt voorwaer de HEEre heeft my tot v lieden gesonden, dat ic sulcx al voor uwen ooren spreken soude.

* Mat. 23.e.34.

16

Doen spraken de Vorsten ende dat gantsche volck totten Priesteren ende Propheten: Dese en is des doots niet schul-dich, Want hy heeft tot ons ghesproken inden Name des HEEren onses Gods.

17

⁺ Ende sommighe der Oudtsten inden Lande stonden op, ende spraken totten gantschen hoope des volcx:

+ D vers 17

18

Ter tijt Hiskia des Conincx Iuda, was een Prophete^* Micha van Maresa, ende sprack totten gantschen volcke Iuda: Also spreect de HEERE Sebaoth:^† Sion sal ghelijck eenen acker gheploeghet worden, ende Ierusalem eenen steenhoope worden, Ende den berch des huys (des HEEren) tot eenen wilden woude.

* Mich. 1.a.1.

† Mich. 3.c.12. Iere. 9.b.11.

19

Nochtans en liet hem Hiskia de Coninck Iuda ende dat gantsche Iuda, daerom niet dooden. Ia sy vreesden veel meer den HEEre, ende aenbaden voor den HEEre. Doen beroude oock den HEERE dat quaet, dat hy teghen haer ghesproken hadde. Daerom doen wy seer qualijcken teghen onse sielen.

20

Alsoo was daer oock een, die inden Name des HEEren propheteerde, Vria de sone Semaia van KiriathIearim, die selfde propheteerde teghen dese stadt, ende teghen dit Landt, ghelijck als Ieremias.

21

^† Ende doen de Coninck Ioiakim ende alle zijne gheweldighe, ende de Vorsten zijne woorden hoorden, woude hem de Coninc laten dooden.^* Ende Vria vernam dat, vreesde, ende vloot, ende tooch in Egypten.

† 3.Re. 22.d.27.

* 3.Reg. 19.a.3. Mat. 2.c.13.

22

Maer de Coninck Ioiakim sant Lieden in Egipten, ElNathan den sone Achbor, ende andere met hem,

23

Die voerden hem wt Egipten, ende brochten hem totten Coninck Ioiakim, die liet hem metten sweerde dooden, ende zijn lichaem onder tghemeyn volck begrauen.

24

Alsoo was de hant Ahikam des soons Saphan met Ieremia, dat hy den volcke niet in de handen en quam, dat sy hem dooden.