Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxv. Capittel.

¶ Een prekinghe waer in de Propheet den Coninc ende alle tvolc straft. Daer en bouen bewijst hy oock hoe Godt de Heydenen straffen sal.

1

⁺ DIt is dat woort, dwelcke tot Ieremiam gheschiede ouer dat gantsche volck Iuda, inden vierden Iare Ioiakims des soons Iosia des Conincx Iuda (dwelcke is dat eerste Iaer NebucadNezars des Babiloonschen Conincx)

+ A vers 1

2

Dat welcke oock de Propheet Ieremias sprack totten gantschen volcke Iuda, ende tot alle borghers tot Ierusalem, ende seyde:

3

Vanden derthienden Iare Iosia des soons Amon, des Conincx tot Iuda aen, tot op desen dach toe, is dat woort des HEEREN tot my geschiet, Ende ick heb v nv dryentwintich Iaren^† met neersticheyt ghepredict: Maer ghy en hebt noyt willen hooren.

† Vroech.

4

Desghelijcx so heeft de HEEre oock tot v lieden ghesonden alle zijne knechten, de Propheten met grooter neersticheyt:^† Maer ghy en hebt noyt willen hooren, noch uwe ooren toeneyghen, dat ghy haddet gehoort,

† Iere. 29.c.19. 35.c.15. 44.c.16.

5

Doen hy sprack:^* Bekeert v, een yeghelijck van zijnen boosen wech, ende van uwen boosen wesen, soo sult ghy inden Lande, dat de HEEre v, ende uwen Vooruaders ghegheuen heeft, altoos ende eewelijck blijuen.

* Iere. 18.b.11 35.c.15. Ione. 3.b.8. Ezech. 18.e.30 4.Re. 17.c.13.

6

En volcht gheen vreemde Goden, dat ghy haer dient ende aenbedet, op dat ghy my niet en vertoornt, door de wercken uwer handen, ende ick v ongheluck toe voeghen moete.

7

Mer ghy en wildet my niet hooren, seyt de HEERE, op dat ghy my ymmers wel vertoornen soudt door de wercken uwer handen, tot uwen eyghen ongheluck.

8

⁺ Daerom seyt de HEEre Sebaoth: Om dat ghy dan mijne woorden niet hooren en wilt,

+ B vers 8

9

^* Siet so wil ick wtseynden, ende laten comen alle volcken tegent Noorden (spreect de HEEre) Ooc^† mijnen knecht Nebucadnezar den Babyloonschen Coninc, ende wilse brengen

* Iere. 1.b.14.

† Esai. 10.a.5. Iere. 17.a.4. 43.b.10.

[p. 33v]

ouer dit Lant, ende ouer de gene die daer in woonen, ende ouer alle dat volck, datter rontsomme leghet, ende ick wilse verbannen ende verstooren, ende tot eenen spot ende eewigher woestenie maken.

10

^† Ende ic wil daer wt nemen alle vrolijck ghesanck,^* de stemme des Bruydegoms ende der Bruydt, de stemme des Molenaers, ende dat licht der Lanternen,

† Iere. 7.d.33. 16.b.9.

* Apoc. 18.e.23

11

Alsoo dattet gantsche Landt verwoest ende verdestrueert ligghen sal. Ende dese volcken sullen den Coninck tot Babel dienen tseuentich iaer.

12

^† Mer wanneer de tseuentich iaer om zijn, dan wil ick den Coninck tot Babel besoecken, ende alle dit volc (seyt de HEEre) om haerder misdaets wille. Daer toe dat Lant der Chaldeen, ende ick wilt tot eender eewigher woestijne maken.

† 2.Pa. 36.d.21. 1.Esdr. 1.a.1. Iere. 29.b.10. Dan. 9.a.2. Sach. 1.b.12.

13

Alsoo wil ick ouer dit Lant brenghen alle mijne woorden, die ick teghen haer ghesproken hebbe, te weten, alle dat in desen Boeck gheschreuen staet, Dwelcke Ieremias ghepropheteert heeft ouer alle volcken.

14

Ende sy sullen oock dienen, hoe wel sy groote volcken ende Coninghen zijn.^* Alsoo wil ick haer verghelden, na haeren verdiensten, ende na de wercken haerder handen.

* Iere. 17.b.10. Psal. 62.b.13. Iob. 34.b.11. Roma. 2.a.6.

15

⁺ Want de HEERE de God Israels spreect tot my alsoo:^† Neemt desen beker wijns vol gramschappen van mijnder handt, ende schenct daer wt allen volcken, tot den welcken ick v seynde,

+ C vers 15

† Esai. 51.d.17 Psal. 60.a.5. 75.b.9.

16

Op dat sy drincken, tuymelen, ende dul worden, voor dat sweert, dwelcke ick onder haer seynden wil.

17

Ende ick nam den beker van der hant des HEEren, ende schenckten allen volcken, totten welcken my de HEEre sandt,

18

Te weten, Ierusalem, den Steden, Iuda, haren Coninghen, ende Vorsten, dat sy woest ende verstoort ligghen, ende eenen spot ende vloeck zijn souden, ghelijck alst op desen dach van heden staet.

19

Oock Pharaoni den Egyptschen Coninc, met zijnen knechten, zijnen Vorsten ende zijnen gantschen volcke.

20

Allen Landen teghent Westen, Allen Coninghen inden Lande^† Vz. Allen Coningen in der Palestijnen Landt, met Ascalon, Gaza, Akaron, Ende den ouergebleuene tot Asdod.

† Gene. 22.d.21. Iob. 1.a.1.

21

Dien van Edom, dien van Moab. Den kinderen Ammon.

22

Allen Coninghen tot Tyro. Allen Coninghen tot Sidon, den Coninghen inden Eylanden, aen ghene syde der See.

23

Dien van Dedan, dien van Thema, dien van Bus, Ende allen Vorsten in de hoecken.

24

Allen Coninghen in Arabia. Allen Coninghen teghen dat Westen,^† die inder woestijnen woonen.

† Iere. 9.d.25.

25

Allen Coninghen in Simri. Allen Coninghen in Elam. Allen Coninghen in Meden.

26

Allen Coninghen tegen het Noorden beyde na ende verre, den eenen met den anderen. Ende allen Coninghen op Aerden, die opten Aertbodem zijn,⁺ Ende Coninck Sesach sal na dese drincken.

+ D vers 26

27

Ende spreeckt tot haer: Alsoo seyt de HEERE Sebaoth, de Godt Israels: Drinct, dat ghy droncken wort, spouwet, ende nedervallet, dat ghi niet opstaen en moghet, vanden sweerde, dat ick onder v seynden wil.

28

Ende in dien sy den beker van dijnder handt niet nemen ende drincken en willen, Soo segt tot haer: Alsoo spreect de HEEre Sebaoth: Nv sult ghy drincken.

29

Wandt siet,^† In de Stadt, die na mijnen Name ghenoemt is, beghin ick te plaghen: Ende sout ghy onghestraft blijuen? Ghy en sult niet onghestraft blijuen. Wandt ick roepe dat sweert ouer alle de ghene, die op Aerden woonen, spreect de HEEre Sebaoth.

† Iere. 25.e.29. 49.b.12. Ezech. 9.b.6. 1.Pet. 4.c.17.

30

Ende ghy sult haer alle dese woorden propheteren, ende spreeckt tot haer:^* De HEEre sal brullen wt der hoochte, ende zijn donderen laten hooren wt zijnder heyligher wooninghen. Hy sal brullen ouer zijne stallen. Hy sal een Liedt singen ghelijck de Wijntreders, ouer alle inwoonders des Landts.

* Ioel. 3.c.16. Amo. 1.a.2.

31

Wiens gheluyt clincken sal tot aen de eynden der werelt. De HEEre heeft te rechten metten Heydenen, Ende hy wil met allen vleesche Gherichte houden. De godloosen sal hy den sweerde ouer geuen, spreect de HEEre.

32

Alsoo spreect de HEEre Sebaoth: Siet, daer sal een plaghe comen vanden eenen volcke totten anderen,^† Ende een groot onweder sal verwect worden vander sijden des Landts.

† Iere. 23.c.19. 30.d.23.

33

Soo sullen de verslaghene des HEEREN ter seluer tijt ligghen van den eenen eynde der Aerden totten anderen eynde toe. Die en sullen niet beweent, noch wechghenomen, noch begrauen worden: Maer moeten opten velde ligghen, ende tot mest worden.

34

⁺ Huylt nv ghy Herders ende schreyt, wentelt v inder asschen, ghy gheweldige ouer de cudde. Want den tijt is gecomen dat ghy gheslaghen ende verstroyt worden, ende in stucken vallen moet, ghelijc als een costelijck vat.

+ E vers 34

35

^† Ende de Herders en sullen niet ontvlieden moghen, Ende de gheweldighe ouer der cudden en sullen niet ontcomen connen.

† Psa. 142.a.5.

36

Daer sullen de Herders crijsschen, ende de gheweldighe ouer der cudden sullen huylen, om dat de HEERE hare weyde so verwoestet heeft,

37

Ende hare beemden, die soo wel stonden, verdoruen zijn vanden grammigen thoorne des HEEren.

38

Hy heeft zijn hutte verlaten, ghelijck als een ionghe Leeuwe, ende haer Lant is also verdestrueert vanden toorne des Tyrannen, ende van zijnen grammighen thoorne.