Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxiij. Capittel.

¶ Godt de HEEre bekijft door den Propheet de Godloose ouerheeren des volcx, Ende desgelijcx oock de valsche Propheten.

1

⁺ VVee v^* ghy Herders, ghy die de Cudde mijnder weyden verdoet ende verstroyt, seyt de HEEre.

+ A vers 1

* Ezech. 13.a.3. 34.a.2.

2

Daeromme spreeckt de HEEre, de Godt Israels vanden Herderen, die mijn volck weyden: Ghy hebt mijn Cudde verstroyt ende verstooten, ende niet besocht. Siet, Ick wil v besoecken om ws boosen wesens wille, spreeckt

[p. 32v]

de HEEre

3

Ende ick wil de ouerghebleuene van mijnder Cudde by een vergaderen wt alle landen, derwaerts ickse verstooten hebbe. Ende ick wilse weder brenghen tot haerder koyen, op dat sy moghen wassen ende haer vermenichfuldighen.

4

^† Ende ick wil Herders ouer haer setten, diese weyden sullen, dat sy haer niet meer en sullen vreesen, noch verschricken, noch besocht worden, spreect de HEERE.

† Hiere. 3.b.10.

5

^* Siet, de tijt coemt spreect de HEEre, dat ick dien Dauidt een rechte vrucht verwecken wil,^† ende het sal een Coninc zijn, die wel regeren sal, Ende recht ende gherechticheyt op Aerden aenrichten.

* Iere. 33.c.15.

† Esaie. 32.a.1.

6

⁺ Ter seluer tijt sal Iuda geholpen worden,^† Ende Israel seker woonen. Ende dit sal zijnen Naem zijn, datmen hem heeten sal HEEre,^* die onse rechtuaerdicheyt is.

+ B vers 6

† Deut. 33.e.28.

* 1.Cor. 1.d.29.

7

^† Daerom siet, de tijt sal comen, seyt de HEEre, datmen niet meer segghen en sal: Soo warachtelijck als de HEERE leeft, die de kinderen Israels wt Egipten Lande gheleyt heeft:

† Iere. 16.c.14.

8

Maer so warachtelijck als de HEEre leeft, die dat saet des huys Israels wt heeft gheleyt, ende ghebracht heeft wt den lande van Noorden, ende wt allen landen, derwaerts ickse verstooten hadde, dat sy in haren Lande woonen sullen.

TEGEN DE PROPHETEN.

9

Mijn herte wil in mijnen Lijue breken, Alle mijn ghebeenten beuen. My is recht als eenen dronckenen Man, ende als eenen die vanden Wijn tuymelt, voor den HEEre, ende van zijnen heylighen woorde.

10

^* Om dattet Landt so vol ouerspeelders is, dat dat Lant soo iammerlijcken staet, dattet soo veruloect is, Ende de Beemden inder woestijne verdorren. Ende haer leuen is boos, Ende haer Regiment en dooch niet.

* Ierem. 7.a.9. 9.a.2.

11

^† Want beyde Propheten ende Priesters zijn Schalcken. Ende ick vinde oock in mijnen huyse hare boosheyt, seyt de HEEre.

† Soph. 3.a.4.

12

Daeromme is haren wech, als eenen gladden wech int duyster, daer sy op slipperen ende vallen. Want ick wil ongheluck ouer haer laten comen, dat Iaer haerder besoeckinge, spreect de HEEre.

13

Tis waer, byden Propheten te Samaria sach ick dwaesheyt, dat sy door Baal propheteerden, ende mijn Volck Israel verleydden:

14

Maer byden Propheten te Ierusalem sie ick grouwelen, hoe sy ouerspel doen, ende gaen met lueghenen omme.^* Ende stercken de boosachtighe, op dat hem ymmer niemant en bekeere van zijnder boosheyt. Sy zijn alle voor my, ghelijck^† als Sodoma, ende haer Borghers ghelijck Gomorra.

* Ierem. 8.b.8. Ezech. 13.d.22

† Gen. 19.e.24.

15

⁺ Daeromme spreeckt de HEEre Sebaoth, vanden Propheten alsoo:^† Siet, Ick wilse met Alsen spijsen, ende met galle lauen. Wandt vanden Propheten tot Ierusalem, coemt huychelije wt int gantsche Landt.

+ C vers 15

† Iere. 9.b.14.

16

Alsoo spreeect de HEEre Sebaoth:^† En hoort de woorden der Propheten niet, die v propheteren.^* Sy bedrieghen v, want sy prediken haers herten ghesichte, ende niet wt den monde des HEEren.

† Iere. 27.b.9 29.b.9.

* Esaie. 9.d.15.

17

Sy segghen tot dien die my lasteren: De HEEre heuet ghesproken, Het sal v wel gaen. Ende allen die na haers herten goetduncken wandelen, segghen sy: Daer en sal gheen ongheluck ouer v comen.

18

Wandt wie heeft inden raedt des HEEren ghestaen, die zijn woort ghesien ende ghehoort heeft? Wie heeft zijn Woort ghemerct ende ghehoort?

19

Siet,^* Een weder des HEEren sal met grammen toorne comen, ende een veruaerlijck onweder sal den Godloosen op den Cop vallen,

* Iere. 25.d.27. 30.d.23.

20

Ende des HEEren toorne en sal niet aflaten, tot dat hy doe ende volbrenghe wat hy inden sinne heeft. Hier namaels sult ghijt wel ghewaer worden.

21

^+† Ick en seynde de Propheten niet, nochtans liepen sy. Ick en sprack tot haer niet, nochtans propheteerden sy.

+ D vers 21

† Iere. 14.b.14

22

Wandt indien sy by mijnen raedt ghebleuen hadden, ende hadden mijnen Volcke mijn woort ghepredickt, soo hadse dat selfde van haren boosen wesen, ende van haren boosen leuen bekeert.

23

^* Ben ick niet een Godt die na by is, spreect de HEEre, ende niet een Godt die verre sy?

* Psal. 139.a.7. Ezech. 8.b.13.

24

Meynt^† ghy dat hem yemant soo heymelijc verberghen can, dat ick hem niet en sie? Spreect de HEEre. Ben ickt niet die daer^† veruulle den Hemel ende dat Aertrijck? Spreeckt de HEEre.

† Esa. 29.c.15.

† 3.Reg. 8.c.27.

25

Ick hoort wel, dat de Propheten prediken ende valsch propheteren in mijnen Naem, Ende segghen: My heeft ghedroomt, my heeft ghedroomt.

26

Wanneer willen doch de Propheten ophouden die valsch propheteren, ende haers herten bedriegherije propheteren,

27

Ende willen dat mijn volc mijns Naems verghete, met haren droomen, die deen den anderen predict.⁺ Ghelijc als hare Vooruaders mijnen Naem vergaten, om den Baal.

+ E vers 27

28

Een Propheet die droomen heeft, die predike droomen.^† Maer soo wie mijn woordt heeft, die predicke mijn woordt recht. Hoe accoorderen stroo ende Tarwe te samen? Spreect de HEEre.

† 1.Pet. 4.b.11. 1.Cor. 4.a.1.

29

En is mijn woordt niet ghelijck een vyer? Seyt de HEEre, Ende ghelijck eenen hamer die de steenrootsen in stucken slaet?

30

Daeromme siet, Ick wil aen de Propheten, spreect de HEERE, die mijnen woorde deen den anderen stelen.

31

Siet, Ick wil aen de Propheten, seyt de HEEre, die haer eyghen woort voeren, ende spreken: Hy heuet gheseyt.

32

Siet, Ick wil aen die, die valsche droomen propheteren, seyt de HEEre, ende prediken de selfde, ende verleyden mijn volck met hare lueghenen ende loose verandtwoordinghen.^† Hoe wel ickse nochtans niet ghesonden, ende haer niet beuolen en hebbe, ende die desen volcke ooc niet nut en zijn, spreect de HEEre.

† Iere. 14.b.14

33

⁺ Als nv dit volc, oft een Propheet, oft

+ F vers 33

[p. 33r]

een Priester, vraghen sal, ende spreken: Welck is den last des HEEren? Soo sult ghy tot haer segghen, Wat den last sy. Ick wil v wechwerpen, seyt de HEEre.

34

Ende als een Propheet oft Priester, oft volck sal seggen: Dat is den last des HEEREN, dien seluen wil ick besoecken, ende zijn huys daer toe.

35

Maer alsoo sal deen totten anderen spreken, ende onder malcanderen seggen: Wat andtwoort de HEEre, ende wat seyt de HEERE?

36

Ende en noemtet niet meer: Eenen last des HEEREN. Want eenen yegelijcken sal zijn eyghen woort eenen last zijn, Om dat ghy alsoo de woorden des leuendighen Gods, des HEEren Sebaoth, onses Gods, verkeert.

37

Daeromme sult ghy totten Propheten alsoo segghen: Wat antwoordet de HEERE, ende wat seyt de HEERE?

38

Maer om dat ghy segt: Eenen last des HEEren, Daerom seyt de HEEre also: Want ghy dit woort eenen last des HEEren noemet, ende ick tot v ghesonden hebbe, ende hebbe laten segghen, dat ghijt niet heeten en soudt eenen last des HEEren.

39

Siet, daeromme wil ick v wech nemen, ende v tsamen metter stadt die ick v Lieden ende uwen Vooruaderen ghegheuen hebbe, van mijnen aensicht wech worpen.

40

Ende ick wil v eewighe schande ende verachtinghe toe voeghen, die nemmermeer vergheten en sal worden.