Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxij. Capittel.

¶ De Propheet vermaent den Coninck ende alle tvolck totter gherechticheyt, Ende hy betoont wat hem vercondicht is van Sallum den sone Iosie. Desghelijcx wat Chonenia den sone Iehoiakim ontmoeten sal.

1

⁺ ALsoo spreeckt de HEERE: Gaet af int huys des Conincx Iuda, ende segt aldaer dit woordt, ende spreect:

+ A vers 1

2

Ghy Coninck Iuda hoort dat woordt des HEEren, ghy die opten stoele Dauidts sittet, beyde ghy ende uwe knechten, ende dijn volck, die tot deser poorten ingaet.

3

So spreect de HEEre:^* Hout Recht

* Esaie. 56.a.1.

[p. 32r]

ende gherechticheyt,^† Ende verlost den beroofden vander handt des fortseerders, Ende en scheyndet niet de Vreemdelinghen, Weesen, ende Weduwen. Ende en doet niemanden ghewelt,^* Ende en stort gheen ontschuldich bloet op dese plaetse.

† Esai. 1.c.17. Ierem. 21.c.12 Psal. 82.a.4. Eccle. 4.b.12.

* Iere. 7.a.6.

4

Indien ghy sulcx doet, soo sullen door de poorten deses huys intrecken, Coninghen die op Dauidts stoel sitten, beyde te waghen ende te peerde, met haren knechten ende volc.

5

Maer ist dat ghy sulcx niet en hoort,^† soo hebbe ick by my seluen ghesworen (seyt de HEEre) dit huys sal verdestrueert worden.

† Iere. 51.c.14. Esai. 45.c.23. Heb. 6.b.13.

6

Wandt alsoo spreect de HEEre vanden huyse des Conincx Iuda. Gilead ghy zijt my dat hooft in Libanon, wat gheldet,⁺ Ick wil v tot een woestijne, ende de steden sonder Inwoonders maken.

+ B vers 6

7

Want ick hebbe verderuers ouer v^† bestelt, eenen yeghelijcken met zijne wapene, die sullen uwe wtuercoren Cederboomen afhouwen, ende int vyer worpen.

† Geheylicht.

8

Soo sullen vele Heydenen voor dese stadt voorby gaen, ende onder malcanderen segghen:^† Waeromme heeft de HEEre met deser grooter Stadt alsoo ghehandelt?

† Deut. 29.d.14 3.Reg. 9.b.8.

9

Dan salmen antwoorden: Om dat sy dat verbondt des HEEren haers Godts verlaten, ende andere goden aenghebeden, ende den seluen ghedient hebben.

10

En weent ouer de dooden niet, noch en weest niet droeuich daer om:^* Maer weent ouer den ghenen, die daer henen treckt. Want hy en sal nemmermeer weder comen, dat hy zijn Vaderlant sien mochte.

* 4.Re. 23.g.34

11

Wandt alsoo spreeckt de HEERE van^† Sallum den Sone Iosie, des Coninckx Iuda, de welcke Coninck is in zijns Vaders Iosia plaetse: Die van deser plaetse wtghetrocken is. Hy en sal niet weder herwaerts comen,

† 1.Par. 3.b.15.

12

Maer hy moet steruen, op die plaetse, derwaerts hy gheuanghen gheuoert is, ende hy en sal dit Landt niet meer sien.

13

^* Wee den ghenen die zijn huys met sonden timmert, ende zijn somerhuysen met onrechte. Die zijnen naesten om niet laet arbeyden, ende en gheeft hem zijnen loon niet.

* Hagg. 1.a.4.

14

⁺ Ende denct: Welaen ick wil my een groot huys timmeren, ende wijde Palleysen, Ende laet hem vensteren daer in houwen, ende met Cederen beschieten, ende root schilderen.

+ C vers 14

15

Meynt ghy dat ghy wilt Coninck zijn, om dat ghy met Cederen praelt? En heeft dijn Vader oock niet gheten ende ghedroncken, ende onderhielt nochtans dat oordeel ende gherechticheyt, ende het ghinck hem wel?

16

^* Hy halp den ellendighen ende Armen te rechte, ende het ghinck hem wel. Ist niet alsoo, dat sulcx heet, my recht kennen, seyt de HEEre?

* Esaie. 1.c.16.

17

Maer dijne ooghen, ende v herte en staen niet also, maer op uwe ghiericheyt,^‡ op onschuldich bloet storten, op vermetenheyt ende op neder te stooten.

‡ Esa. 59.a.7.

18

^* Daeromme spreect de HEEre van Ioiakim den Sone Iosie den Coninck tot Iuda: Men en sal hem niet beweenen, Och broeder, Och suster, Men sal hem niet beclaghen, Och HEEre, Och edele.

* 4.Reg. 23.f.34. 24.a.2. Iere. 36.d.30.

19

Hy sal ghelijck een Ezel begrauen worden, ghesleypt, ende buyten der poorten Ierusalems gheworpen worden.

20

⁺ Ia dan gaet henen op, op den Libanon, ende roept, ende laet v hooren tot Basan, ende crijscht van Abarim. Want alle uwe Liefhebbers zijn iammerlijck verdaen,

+ D vers 20

21

Ich hebt v te voren gheseyt, doent noch met v al wel ghinck, maer ghy spraect: Ick en wil niet hooren. Alsoo hebt ghy alle uwe leuedaghe ghedaen, dat ghy mijnder stemmen niet ghehoorsaem en waert.

22

De windt weydet alle uwe Herders, Ende uwe Liefhebbers trecken geuanckelijck van daer. Daer moet ghy doch tot spotte ende te schanden worden, om alle uwer boosheyt wille.

23

Ghy die nv in Libano woonet, ende in Cederen nestelt: Hoe schoone sult ghy sien, wanneer v smerte ende weedaghen comen sullen, als eener in kints nooden.

24

^* So warachtelijc als ick leue (spreect de HEERE) Al waer schoon^† Chania de Sone Ioiakim de Coninck Iuda, eenen seghelrinc aen mijnder rechter hant, soo woude ick v nochtans daer af rucken,

* 4.Re. 24.b.6

† Iechania.

25

Ende inden handen gheuen der gheender die nae uwen leuen staen, ende voor den welcken dat ghy v vreest, te weten, inde handen NebucadNezars des Conincx te Babel, Ende der Chaldeen.

26

Ende ick wil v ende uwe Moeder, die v voortghebracht heeft, in een ander Landt drijuen, dat uwe Vaders Lant niet en is, ende ghy sult aldaer steruen.

27

Ende in dat Landt, daer sy van herten gheerne weder henen varen, daer en sullen sy niet weder comen.

28

Hoe allendighen, verachten, ende verstooten Man is doch Chania? Een onweert Vat. Och hoe is hy doch met zijnen saet alsoo verdreuen, ende in een onbekent Landt gheworpen?

29

O Lant, Lant, Lant, hoort des HEEren woort. Alsoo spreect de HEEre:

30

Schrijft desen man aen voor eenen verdoruen, Eenen man, die zijn leuedaghe gheen gheluck en heeft. Wandt hy en sal dat gheluck niet hebben, dat yemandt van zijnen sade op den Stoele Dauidts sitte, ende voort aen in Iuda heerschappe.