Den Bibel, Inhoudende dat Oude ende Nieuwe Testament (Biestkensbijbel)

¶ Dat .xxj. Capittel.

¶ Sedekias de Coninck vraghet Ieremiam om bescheet, doen de Stadt vanden Vianden beleghert was, hy geeft Sedekie antwoort wt den mont des HEEREN.

1

⁺ DIt is dat woort dat vanden HEEre gheschiede tot Ieremiam,^* doen de Coninc Sedekias tot hem sant Pashur den sone Malchie, ende Sephaniam den Sone Maseia des Priesters, ende dede hem seggen:

+ A vers 1

* Iere. 37.a.3.

2

^* Vraecht doch den HEEre voor ons. Want NebucadNezar de Coninck tot Babel strijt tegen ons, dat de HEEre doch met ons doen wille na alle zijne wonderlijcke wercken, op dat hy van ons af trecke.

* 4.Re. 22.b.13 2.Pa. 18.a.14 Iere. 42.a.2.

3

Ieremias sprack tot haer: Segt Sedekie alsoo:

4

Dit seyt de HEERE de Godt Israels: Siet, Ick wil de wapenen te rugge keeren, die ghy in uwe handen hebt, waermede ghy strijdt teghen den Coninck te Babel, ende teghen de Chaldeen, die v daer buyten aender Mueren beleghert hebben, ende ick wilse te hoope vergaderen midden inder stadt.

5

Ende ick wil teghen v strijden, met wtghereckter handt, met stercken arme, met grooter gramschappen, verbolghentheyt, ende onbarmherticheyt.

6

Ende ick wil de Borgers deser stadt slaen, beyde Menschen ende Vee, alsoo dat sy steruen sullen, door een groote Pestilentie.

7

⁺ Ende daer na (seyt de HEERE) wil ick Sedekiam den Coninck Iuda met zijnen knechten ende den volcke, dwelcke in deser stadt vander Pestilentie, Sweerde, ende hongher ouerblijuen sal,^† gheuen inde handen NebucadNezars des Conincx tot Babel, ende inde handen haerder Vianden, ende inde handen der gheender die haer nae den leuen staen, dat hyse met de scherpte des sweerts alsoo slae, datter gheen sparen, noch ghenade, noch barmherticheyt mede en sy.

+ B vers 7

† Iere. 39.a.2.

8

Ende segt desen volcke: Alsoo spreect de HEERE: Siet,^* Ick legghe v voor den wech totten leuen, ende den wech totten doot.

* Deut. 30.c.15.

9

^† Soo wie in deser stadt blijft, die sal moeten steruen, door dat Sweert, hongher, ende Pestilentie. Maer wie hem wtgheeft totten Chaldeen, die v belegghen, die sal leuendich blijuen,^† ende hy sal zijn leuen als een buete behouden.

† Iere. 27.a.8. 38.a.2.

† Iere. 45.b.5.

10

⁺ Wandt ick hebbe mijn aensicht ouer dese Stadt gheuesticht tot ongheluck, ende tot gheen goet, seyt de HEEre.^† Sy sal den Coninck tot Babel ouerghegheuen worden, op dat hijse met vyer verberne.

+ C vers 10

† Ierem. 32.a.3.

11

Ende hoort des HEEREN woort vanden huyse des Conincx Iuda. Ghy huys Dauids, alsoo spreect de HEEre:

12

Hout^* des smorghens ghericht^‡ ende verlost den beroofden wt des gheweltdoenders handt,^† op dat mijn gramschappe niet wt en vare als een vyer, ende alsoo berne datse niemandt gheblusschen en can, om ws boosen wesens wille.

* Iere. 21.a.3.

‡ Esaie. 1.c.17. Psal. 82.a.4. Pro. 24.b.11. Eccle. 4.b.12.

† Iere. 4.a.4.

13

Siet, spreeckt de HEEre,^* Ick segghe v ghy die woonet inden dale, inde steenrootse, ende op den effenen Velde, ende spreket: Wie wil ons oueruallen, Oft in onse vaste wooninghen comen?

* Iere. 48.a.7

14

Ick wil v Lieden besoecken (seyt de HEERE) nae de vrucht ws doens. Ic wil een vyer aensteken in haer Wout, dat sal alle dinc rontomme verteren.