Den Bibel, Inhoudende dat Oude ende Nieuwe Testament (Biestkensbijbel)

¶ Dat .xx. Capittel.

¶ Pashur de ouerste prediker slaet Ieremiam, ende leyt hem inde geuanckenisse, Dien voorseyt de Propheet wat straffinghe hem aenstaende is van God den HEEre, De Propheet toont ooc wat hem de swacheyt zijns vlees, dick aen ghedaen heeft.

1

⁺ MAer als Pashur een sone Immers des Priesters die tot een Ouerste inden huyse des HEEren gheset was, Ieremiam hoorde sulcke woorden propheteren,

+ A vers 1

2

^† Soo sloech hy den Propheet Ieremiam, ende wierp hem inden stock, onder de bouenste poorte BenIamins, welcke aen dat huys des HEEREN is.

† Act. 23.a.2. Ioan. 18.c.22. Ierem. 32.a.2. 33.a.1.

3

Ende alst dach werdt, trock Pashur Ieremiam weder wt den stock. Doen seyde Ieremias tot hem: De HEEre en heet v niet Pashur, maer Magur rontom.

4

Want alsoo spreeckt de HEEre: Siet, ick wil v met alle uwe vrienden inder vreese gheuen, ende sy sullen vallen doort Sweert haerder Vianden, dat sult ghy met uwen oogen sien, Ende ick wil dat gantsche Iuda ouer geuen inde hant des Conincx tot Babel, die salse wech voeren na Babel, ende metten Sweerde dooden.

5

^+† Ooc wil ick alle dat goet van deser Stadt, met allen haren arbeyt ende alle Cleynodien ende alle Schatten der Coninghen Iuda, in haerder Vianden handt gheuen, dat sy de selue beroouen, nemen, ende na Babel brenghen.

+ B vers 5

† 4.Re. 20.c.17 Ierem. 15.c.13. 17.a.3.

6

Ende ghy Pashur sult met alle uwen huysghenooten gheuanghen gaen, ende tot Babel comen. Aldaer sult ghy steruen ende begrauen worden, met alle uwen vrienden, den welcken ghy lueghenen gepredict hebt.

7

HEEre ghy hebt my becout, ende ic hebbe my laten becouten. Ghy zijt my te sterck gheweest, ende hebt ghewonnen.^† Maer ick ben daerom daghelijckx tot eenen spot gheworden, ende alleman beghect my.

† Tren. 3.b.14. Psal. 44.b.14. 79.a.4.

8

Want sint dat ick ghesproken, gheroepen, ende ghepredickt hebbe van de plaghe ende verwoestinghe, soo is my dat woordt des HEEren tot een begheckinghe ende bespottinghe geworden daghelijcx.

[p. 31v]

9

Doen dacht ick: Welaen, Ick en wil zijnder niet meer ghedencken, ende niet meer in zijnen Naem prediken.⁺ Maer het wert in mijnder herten, ghelijck een bernende vyer in mijne ghebeenten, also dat ict niet ghelijden en conde, ende ware by na vergaen.

+ C vers 9

10

^* Wandt ick hoore, hoe dat my veel schelden, ende my ouer al verschricken, Huy, beclaecht hem. Wy willen hem aenbrenghen (segghen alle mijne vrienden ende ghesellen) oft wy hem ouerstrijden ende aen hem comen connen, ende ons aen hem wreken.

* Psal. 31.b.13.

11

Maer de HEEre is by my, als een sterck Heldt. Daeromme sullen mijn veruolghers vallen, ende niet ghewinnen: Maer sullen seer beschaemt worden, om dat sy soo sottelijcken handelen. De schande sal eewich zijn, datmense niet en sal vergheten.

12

Ende nv HEERE Sebaoth,^† ghy die de Rechtuaerdighe proeft, nieren ende^* herten siet. Laet my uwe wrake aen haer sien,^‡ Want ic hebbe v mijn sake beuolen.

† Iere. 11.d.20 Psalm. 11.a.6 Sapien. 3.a.5

* Iere. 17.b.10

‡ Iere. 11.d.20

13

⁺ Singet den HEERE, loeft den HEEre, die des Armen leuen, wt der boosachtighen handen verlost.

+ D vers 13

14

^* Veruloeckt sy den dach, daer ick in gheboren ben, Den dach moet ongheseghent zijn, daer in my mijn Moeder gebaert heeft.

* Iob. 3.a.1. Iere. 15.b.10.

15

Veruloect sy de ghene, die mijnen Vader goede bootschap bracht, ende sprack: Ghy hebt eenen Ionghen sone, dat hy hem vrolijck maken woude.

16

Die selue Man moet zijn ghelijck de Steden,^* die de HEEre omghekeert heeft, ende hem niet berout en heeft. Ende hy moet des Morgens hooren een geschrey, ende des Middaechs een huylinghe.

* Gen. 19.e.24.

17

Och dat ghy my niet ghedoot en hebt in Moeders Lichaem, dat mijn Moeder mijn gracht geweest, ende haer Lichaem eewich beurucht ghebleuen ware.

18

^‡ Waerom ben ick doch wt Moeders Lichaem voortghecomen, dat ick sulcken iammer ende hertseer sien moet, ende mijne daghen met schande toebrenghen.

‡ Iob. 10.c.18.