Den Bibel, Inhoudende dat Oude ende Nieuwe Testament (Biestkensbijbel)

[p. 31r]

¶ Dat .xix. Capittel.

De Propheet wort onderwesen in een ander maniere van dat voornemen des HEEREN, hoedanighen ongheluck dat ouer Ierusalem ende Topheth gaen sal.

1

⁺ ALsoo spreect de HEEre: Gaet henen, ende coopt v een aerden Cruycke vanden potbacker, met sommighe vanden Outsten des volcx, ende voor de Outste der Priesteren.

+ A vers 1

2

Ende gaet henen wt in dat dal BenHinnom, dat voor de Tyghelpoort leyt, ende predict aldaer de woorden die ick v segghe,

3

Ende segt: Hoort dat woordt des HEEREN, O ghy Coningen Iuda, ende ghy Borgers tot Ierusalem. Alsoo seyt de HEERE Sebaoth, de Godt Israels:^† Siet, Ick wil een alsulcken ongheluck ouer dese plaetse laten comen, dat soo wie dattet hooren sal, dien sullen zijn ooren^† clincken.

† 4.Re. 21.a.12. Ierem. 6.c.19

† Tuyten.

4

Daerom dat sy my verlaten, ende dese plaetse eenen vreemden Gode ghegheuen hebben, ende anderen goden daer in ghewierooct hebben, De welcke noch sy, noch haer Vooruaders, noch de Coninghen Iuda ghekent en hebben, ende dese stede vol onschuldichs bloets ghemaect.

5

^† Wandt sy hebben den Baal hoochten ghetimmert, om haer kinderen te verbernen, den Baal tot eenen Brantoffer, dwelcke ick haer noch gheboden, noch daer af ghesproken en hebbe, daer en bouen in mijn herte noyt ghecomen en is.

† Deut. 12.d.31. 18.b.9. Psa. 106.e.38. Ezec. 20.d.31. Iere. 7.d.30. 4.Re. 21.a.6.

6

⁺ Daerom^† siet, de tijt sal comen, seyt de HEEre, datmen dese plaetse niet meer Topheth, noch dat dal BenHinnom, maer worchdal heeten sal.

+ B vers 6

† Ierem. 7.d.31.

7

Want ick wil den Gods dienst Iuda ende Ierusalems van deser plaetsen verstooren, ende ick wilse doort Sweert laten vallen, voor haer Vianden, onder de hant vanden genen die na haren leuen staen.^* Ende ick wil hare lichamen den Vogelen des Hemels, ende den dieren opter Aerden te verslinden gheuen.

* Deut. 28.c.26. Ierem. 15.a.3. 16.a.4. Psal. 79.a.2.

8

Ende ick wil dese stadt woest maken, ende tot eenen spot,^† alsoo dat alle die daer voorby gaen, haer verwonderen van alle haer plagen, ende haer bespotten sullen.

† 3.Reg. 9.b.8. Iere. 18.b.16. 49.c.17. 50.b.13.

9

Ick wil oock haer laten^† eten haerder Sonen ende Dochteren vleesch, Ia deene sal des anderen vleesch eten, inder noot, ende ancxte, waermede hen haer Vianden, ende de ghene die na haren leuen staen, benauwen sullen.

† Leu. 26.e.29 4.Re. 6.f.29.

10

Ende ghy sult de Cruycke in stucken breken voor de mannen, die met v ghegaen zijn, ende segt tot haer:⁺ Aldus spreeckt de HEEre Sebaoth:

+ C vers 10

11

Effen also wil ick dit volck ende dese stadt verderuen,^† ghelijck als een potbacker eenen pot in tween breeckt, datmen hem niet weder heel en can gemaken. Ende sy sullen daer toe in^† Topheth begrauen worden, want daer anders gheen ruymte zijn en sal om te begrauen.

† Iere. 18.a.6.

† Iere. 7.d.31.

12

Alsoo wil ick met dese plaetse omgaen (seyt de HEEre) ende met den ghenen die daer in woonen, also dat dese stadt worden sal ghelijck Topheth.

13

Daer en bouen sullen de huysen tot Ierusalem, ende de huysen der Coningen Iuda, effen alsoo onreyn worden, als de stede Topheth. Ia alle huysen, daer sy op de Daken gerooct hebben den gantschen Hemelschen heyre, ende anderen Goden Dranckoffer gheoffert hebben.

14

Ende als Ieremias weder van Tophet quam, derwaerts hem de HEEre ghesonden hadde, te propheteren, doen tradt hy inden voorhof, aenden huyse des HEEren, ende sprack tot alle den volcke:

15

Also spreect de HEEre Sebaoth, de Godt Israels: Siet, Ick wil ouer dese stadt, ende ouer alle steden, alle dat ongheluck laten comen, dat ick teghen haer ghesproken hebbe.^† Daerom dat sy hertneckich zijn, ende mijne woorden niet hooren en willen.

† Ierem. 7.c.25.