Den Bibel, Inhoudende dat Oude ende Nieuwe Testament (Biestkensbijbel)

¶ Dat .xviij. Capittel.

¶ Godt seyndet den Propheet in des potbackers huys, daer toont hy hem zijn voornemen ende opset, wt den welcken de Propheet onderwesen, vermaent dat volck tot beteringhe, met een openbaringhe der straffinghen Gods.

1

⁺ DIt is dat woort dat vanden HEEre gheschiede tot Ieremiam, ende sprack:

+ A vers 1

2

Maect v op, ende gaet af in des potbackers huys, aldaer wil ick v mijne woorden laten hooren.

3

Ende ic ghinc henen af in des potbackers huys, Ende siet, hy arbeyde iuyst op de^‡ Schijue.

‡ Rat oft wiele

4

Ende den pot dien hy maecte wt leem, misuiel hem onder de handen. Doen maecte hy wederom eenen anderen pot, soo het hem behaechde.

5

Doen gheschiede des HEEren woort tot my, ende seyde:

6

En^† can ick oock alsoo met v niet omgaen, O ghy vanden huyse Israels, ghelijck als de potbacker, seyt de HEEre? Siet, ghelijck dat leem in des potbackers hant, also zijt ghy oock vanden huyse Israels in mijnder hant.

† Esaie. 45.b.9 Iere. 19.c.11. Rom. 9.c.20.

7

Onuersiens^† spreke ick tegen een volc ende Conincrijck, dat ickt wtroyen, verwoesten, ende verderuen wil:

† Ezech. 18.a.4 33.c.14. Luc. 15.a.7.

8

Maer indien dattet hem bekeert van zijnder boosheyt, waer tegen dat ick spreke, So sal my oock berouwen dat ongheluck dat ick hem dacht aen te doen.

9

^† Ende bottelijcken spreke ick van eenen volcke ende Coninckrijcke, dat ickt stichten ende planten wil:

† 1.Reg. 15. Ione. 3.

10

Maer indien dattet dan quaet doet voor mijnen oogen alsoo dattet mijnder stemme niet gehoorsaem en is, so sal my noch berouwen dat goet, dat ick hem toegheseyt hadde te doen.

11

Soo spreect nv tot dien in Iuda, ende tot den Borgheren te Ierusalem: Alsoo seyt de HEERE: Siet, ick bereyde v een ongheluck toe, ende ick heb ghedachten teghen v.^† Daerom keere een yeghelijc van zijnen boosen wesen, ende betert uwe wesen ende doen.

† Ierem. 25.a.5 35.c.15. 4.Re. 17.b.13

12

Maer sy spreken:^‡ Daer en wort niet wt,^* wy willen na onse ghedachten wandelen, ende een yegelijck doen na goetduncken zijns boosen herten.

‡ Of, dat laten wy.

* Iere. 7.c.23. 11.b.8. 13.b.10.

13

⁺ Daerom spreeckt de HEERE: Vraghet doch onder de Heydenen daer nae, wie heeft oyt des ghelijcken ghehoort?^† Dat de Maghet Israels soo seer grouwelijcke dingen doet?

+ B vers 13

† Hose. 5.b.15.

14

De sneeu blijft doch langer op de steenen int Velt, wanneert van Libanon af sneeut, ende dat reghenwater en verloopt

15

So gheringe niet als mijn volc mijnder vergheet. Sy wieroocken den Goden, ende richten arghernisse aen op hare weghen voort ende voort, ende gaen op onghebaende straten,

16

Op dat haer Lant tot eender woestijne worde, haer tot eewigher schande,^† also dat wie daer voorby gaet hem verwondere, ende dat hooft schudde.

† Iere. 19.b.8. 49.c.17. 50.b.13.

17

Want ick wilse door eenen Oosten windt verstroeyen, voor haren Vianden. Ick wil haer den rugghe ende niet dat aensicht wijsen, wanneer sy verderuen.

18

Maer sy segghen:^† Coemt ende laet ons teghen Ieremiam raet slaen. Want de Priesters en connen inder Wet niet dwalen, Ende de Wijsen en moghen niet faelgeren inden raet, Ende de Propheten en connen niet onrecht geleeren.⁺ Coemt herwaerts, laet ons hem metter tonghen doot slaen, ende geen acht hebben op alle zijne redenen.

† Iere. 11.d.19.

+ C vers 18

19

O HEEre, hebt acht op my, ende hoort de stemme mijnder wederpartijen.

20

^† Ist recht datmen goet met quaet verghelde? Want sy hebben mijnder sielen eenen Cuyl ghegrauen. Weest doch ghedachtich, hoe ick voor v ghestaen hebbe op dat ick voor haer ten besten sprake, ende uwe gramschap van hen keerde.

† Prou. 17.b.13

21

^* Daeromme straft nv haer kinderen met honger, ende laetse int sweert vallen dat hare Wijuen ende weduwen sonder kinderen zijn, ende haer Mannen doot gheslaghen, ende dat haer Ionghelingen inden strijt doort sweert vermoort worden.

* Iere. 11.d.22. Tren. 3.f.66.

22

Alsoo datter een ghecrijsch wt haren huysen gehoort worde, wanneer ghy onuersiens hebt Crijchsvolck ouer haer laten comen.^* Wandt sy hebben eenen Cuyl ghegrauen om my te vangen, ende mijnen voeten stricken gheleyt.

* Iere. 11.d.19. Psal. 7.b.16. 35.a.7. 140.a:6. 141.b.9. 142.a.4.

23

Ende aenghesien ghy O HEEre alle haer opsetten wetet tegen my, dat sy my dooden willen, Soo en vergheeft haer hare misdaet niet, ende en laet hare sonden voor v niet wtghedaen worden: Maer laetse voor v verdaen worden, ende gaet met haer om, na uwer gramschappen.