Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvij. Capittel.

¶ Wat straffinge dien ontmoeten sal, die den HEEre Godt verlaten, ende op de menschen betrouwen, Wat eynde sy hebben sullen, die de rijckdommen niet oorbaerlijc en verdoen, Hy ghebiet den Sabbath te houden.

1

⁺ DE sonde Iuda is^† met yseren griffien, ende met scherpe Diamanten gheschreuen, ende inde tafele haers herten ghegrauen, ende op de hoornen aen de Altaren.

+ A vers 1

† Iob. 19.c.24.

2

Op dat haer kinderen ghedencken souden, der seluer Altaren ende Bosschen, byden groenen boomen op de hooghe Berghen.

3

Maer ick wil uwe hoochten, beyde op Berghen ende Velden tsamen met uwe haue ende alle^† uwe schatten in eenen roof gheuen, om der sonden wille die in alle uwe Palen bedreuen zijn.

† Ierem. 15.c.13. 20.b.5.

4

Ende ghy sult wt dijn erue gestooten worden, dat ick v ghegheuen hebbe,^* ende ick wil v tot knechten dijner Vianden maken, in een Landt dat ghy niet en kent. Want ghy hebt een vyer mijnder gramschappen aenghesteken, dwelcke inder eewicheyt bernen sal.

* Iere. 25.b.9.

5

⁺ Alsoo spreect de HEEre:^* Veruloect is de Man^‡ die hem op menschen verlaet, ende vleesch voor zijnen arme hout, ende met zijnder herten vanden HEERE wijcket.

+ B vers 5

* Esaie. 30.a.2 31.a.1.

‡ Psal. 118.a.8 146.a.3.

6

Die sal zijn als de Heyde inder woestijnen,^* Ende hy en sal niet sien den toecomenden troost, maer hy sal blijuen inde dorre plaetse inder woestijnen, in eenen onuruchtbaren lande daer niemant en woont.

* Iob. 20.b.17.

7

Maer^‡ gheseghent is de Man die hem opten HEERE verlaet, ende wiens de HEEre zijn toeuerlaet is:

‡ Psal. 2.b.12. 118.a.8. 125.a.1

8

Die is^† gelijck als eenen boom aenden water geplant, ende aender beke gewortelt. Want ofter al een hitte coemt soo en vreeest hy nochtans niet, maer zijne bladeren blijuen groene. Noch en sorghet oock nyet al coemter een drooch Iaer, Maer hy brenghet sonder ophouden vruchten.

† Psalm. 1.a.3.

9

Een vermeten ende versaecht dinck is dat herte, wie cant gronderen?

10

^† Ic de HEEre can dat herte gronderen ende de nieren proeuen, Ende^* ic gheue eenen yeghelijcken na zijnen doen, na de vruchten zijnder wercken.

† 1.Re. 16.b.7 Psal. 7.b.10. Iere. 11.c.20. Apoc. 2.e.23.

* Rom. 2.a.6. Apoca. 2.d.23. Psal. 28.a.4. 62.b.13. Iob. 34.b.11. Iere. 25.b.14.

11

Wandt ghelijck als een Voghel die hem op eyer stelt, ende en broedetse niet wt,^‡ alsoo is de ghene die onrecht goet vergadert. Wandt hy moet daer af, als hijt alderminst vermoeyt, ende moet doch ten laetsten spot daer toe hebben.

‡ Pro. 11.d.28. Luc. 12.b.19.

12

Maer de plaetse ons heylichdoms, te weten, den throon der godlijcker eeren is altijt vast ghebleuen,

13

Wandt^* O HEEre ghy zijt de hope.^† Alle die v verlaten, die moeten beschaemt worden.^* Ende de afuallighe moeten inder Aerden gheschreuen worden,^+‡ Want sy verlaten den HEEre de fonteynader des leuenden waters.

* Psal. 115.a.9

† Esaie. 1.d.28

* Prou. 3.d.30

+ C vers 13

‡ Psal. 36.b.9 Ierem. 2.b.10 Ezec. 36.d.25. Ioan. 4.b.10.

14

O HEEre maect my ghesont, soo worde ick ghesont, helpt ghy my, soo is my geholpen, Want ghy mijnen roem zijt.

15

Siet, sy segghen tot my: Waer is dan des HEEren woordt? Lieue latet herwaerts gaen.

16

Maer ick en ben daerom niet van v gheuloden, mijn^† Herder, Oock en hebbe ick noyt menschen dach begheert, Dat weet ghy. So wat ick gepredickt heb, dat is recht voor v.

† Psal. 23.a.1. Esai. 40.b.11 Ioan. 10.a.11.

17

En weest ghy my slechts niet verschrickelijc,^* mijn toeuerlaet inder noot.

* Ierem. 14.a.8 16.c.19.

18

Laetse te schande worden die my veruolghen, ende niet my: Laetse verschricken, ende niet my: Laet den dach des onghelucx ouer haer gaen, ende slaetse in stucken tweeuoudich.

19

Alsoo spreeckt de HEERE tot my:^† Gaet henen, ende tredet onder de poorte des volcx, daer door de Coninghen Iuda wt ende in gaen, ende onder alle poorten tot Ierusalem,

† Ierem. 7.a.2. 26.a.2.

20

Ende segt tot haerlieden: Hoort des HEEren woort, ghy Coningen Iuda,⁺ ende gheheel Iuda, ende alle inwoonders tot Ierusalem, die tot deser poorten ingaet.

+ D vers 20

21

Alsoo seyt de HEERE: Wacht v, ende en draecht gheenen last opten Sabbaths dach door de poorte tot Ierusalem in,

22

Ende en voert gheenen last wt uwen huysen opten Sabbaths dach, ende en doet geenen arbeyt: Maer heiliget den

[p. 30v]

Sabbaths dach,^† gelijc ick uwen Vooruaderen gheboden hebbe.

† Exo. 20.b.10.

23

Maer sy en hooren niet, ende neygen haer ooren niet herwaerts. Maer sy blijuen hartneckich op dat sy ymmer my niet en hooren, noch haer onderrichten en laten.

24

Indien ghy my hooren sult, seyt de HEEre, dat ghy gheenen last en draget des Sabbaths dach door deser Stadt poorten in, maer den seluen heyliget, dat ghy gheen werck opten seluen dach en doet.

25

Soo sullen oock door deser stadt poorten wt ende ingaen, Coningen ende Vorsten (die opten stoel Dauids sitten) ende rijden, ende varen, beyde op wagens ende peerden, Sy ende hare Vorsten met alle die in Iuda ende tot Ierusalem woonen, Ende dese stadt sal eewelijc bewoont worden.

26

Ende daer sullen comen, wt den Steden Iuda, ende die rontom Ierusalem ligghen, ende wt den Lande BenIamin, wt den Valleyen, ende vanden gheberchten, ende vanden Suyden, die daer brengen sullen Brandtoffer, Offer, Spijsoffer, ende Wieroock totten huyse des HEEren.

27

Maer ist dat ghy my niet hooren en sult, dat ghy den Sabbaths dach heylicht ende gheenen last en draghet door de poorte tot Ierusalem in, opten Sabbaths dach, Soo wil ick een vyer onder haer poorten ontsteken, dat de huysen tot Ierusalem verteren, ende niet wtgebluscht worden en sal.