Den Bibel, Inhoudende dat Oude ende Nieuwe Testament (Biestkensbijbel)

¶ Dat .xvj. Capittel.

¶ De HEEre verbiet den Propheet, dat hy op die plaetse gheen huysvrouwe en neme, noch oock nergens geen gheselschappe met haer en hebbe, Want hy wilse straffen, vande verstootinghe der Ioden, ende de roepinghe der Heydenen.

1

⁺ ENde des HEEren woort gheschiede tot my, ende sprack:

+ A vers 1

2

Ghy en sult geen wijf nemen ende noch sonen noch dochteren winnen, op dese plaetse.

3

Want de HEERE spreect alsoo vanden sonen ende dochteren, die in dese plaetse gheboren worden, daer toe van haren Moederen diese baren, ende van haren Vaderen diese opbrenghen in desen lande:

4

Sy sullen van crancheden steruen,^* ende noch beclaecht noch begrauen worden. Maer sy sulen mest worden opten lande: Ende daer en bouen doort Sweert, ende den honger vergaen,^* ende hare lichamen sullen de Voghelen des Hemels, ende de Dieren opter Aerden spijse zijn.

* Iere. 14.c.16. Psal. 79.a.2.

* Iere. 15.a.3. 19.b.7.

5

Want alsoo seyt de HEEre: Ghy en sult niet totten truerhuyse gaen, ende ghi en sult oock nergens henen gaen om rouwe te draghen, noch medelijden met haer hebben. Wandt ick hebbe mijnen vrede van desen volcke wech genomen, seyt de HEEre, tsamen met mijnder ghenaden ende barmherticheyt,

6

Alsoo dat oock beyde groot ende cleyne, in desen lande steruen sullen, ende niet begrauen noch beclaecht en sullen worden. Ende niemant en sal om haerlieden wille hem splijten, noch zijn hayr wt rucken.

7

Ende men en sal oock niet onder haer wt deylen duer de clage, om haer te troosten ouer de Lijcken, noch ooc wt den troostbeker te drincken gheuen, ouer Vader ende Moeder.

8

Daerom en sult ghy oock in geen herberghe gaen, om by haer te sitten,^* noch te eten noch te drincken.

* 1.Cor. 5.b.11.

9

⁺ Want alsoo spreect de HEEre Sebaoth, de Godt Israels: Siet,^† Ick wil op dese plaetse wech nemen, voor uwen oogen, ende by uwen leuen, de stemme der vruechden ende der genoechten, de^‡ stemme des Bruydegoms ende des Bruyts.

+ B vers 9

† Ierem. 7.d.33. 25.b.10. Ezech. 26.b.13

‡ Apoc. 18.e.23

10

Ende als ghy sulcx alle tot desen volcke gheseyt hebt, ende dat sy tot v spreken sullen:^‡ Waerom seyt de HEEre ouer ons alle dit groot ongheluck? Welck is de misdaet ende sonde, daer mede wy teghen den HEERE onsen Godt gesondicht hebben?

‡ Ierem. 5.d.19

11

So sult ghy hen seggen:^† Daerom dat uwe Vooruaders my verlaten (seyt de HEERE) ende ander goden ghevolcht, den seluen ghedient ende aengebeden, Maer my verlaten, ende mijne Wet niet ghehouden en hebben.

† Deut. 4.d.25.

12

^* En om dat ghy noch ergher doet dan uwe Vaders. Want siet, een yegelijck leeft na zijns boos herten goetduncken, op dat hi my niet en hoore.

* Ierem. 7.c.25.

13

Daerom wil ick v wt desen lande stooten, in een lant, daer af noch ghy noch uwe Vaders en wetet.

[p. 30r]

Aldaer sult ghy andere Goden dienen dach ende nacht, aldaer en wil ick v geen ghenade bewijsen.

14

^+† Daerom siet, de tijt coemt, seyt de HEEre, datmen niet meer segghen en sal, Soo warachtelijck als de HEEre leeft, die de kinderen Israels wt Egipten gheleyt heeft,

+ C vers 14

† Iere. 23.b.7.

15

Maer so warachtelijck als de HEEre leeft, die de kinderen Israels gheleyt heeft wt den lande vanden Noorden herwaerts, ende wt alle landen, derwaerts dat hijse verstooten hadde. Wandt ick wilse weder brenghen in dat lant, dat ick haren vooruaderen ghegheuen hebbe.

16

Siet, ick wil^† veel Visschers wt seynden, seyt de HEEre, die sullense visscen. Ende daer na wil ick veel Iaghers wt seynden, die sullense vangen, op alle Berghen ende op alle Hueuelen, ende in alle steenrootsen.

† Mat. 4.b.19. Marc. 1.b.17. Ezec. 47.a.10

17

^† Want mijne oogen sien op alle haer wegen, also dat sy haer voor my niet verbergen en connen, ende haer misdaet en is voor mijnen ooghen niet verborghen.

† 2.Par. 16.b.9 Psal. 33.b.13. Iob. 28.c.25. Eccle. 23.d.27 Prou. 15.a.3.

18

Maer hare misdaet ende sonde wil ick eerst dubbel betalen. Daerom dat sy mijn lant metten Lijken haerder afgoderije ontsuyuert, ende mijn erfdeel met haren grouwelen vuyl gemaect hebben.

19

^* O HEEre ghy zijt mijn stercte ende cracht, ende mijne toeulucht inder noot. De Heydenen sullen tot v comen vanden eynden der werelt, ende segghen: Onse Vaders hebben valsche ende ydel goden gehadt, die niet ghehelpen en connen.

* Iere. 14.a.8. 17.c.17.

20

Hoe can een mensche Goden ghemaken, die gheen Goden en zijn? Daerom siet, Nv wil ickse leeren, ende mijne hant ende ghewelt haer kennelijck maken, dat sy onderuinden sullen, dat ick heete de HEEre.