Den Bibel, Inhoudende dat Oude ende Nieuwe Testament (Biestkensbijbel)

¶ Dat .xv. Capittel.

¶ De HEEre slaet den Prophete zijn bede af, die hy voor dat volck gedaen had. Ende hy andtwoort hem op zijn claghe.

1

⁺ ENde de HEERE sprack tot my:^† Oft schoon Moses ende Samuel voor my stonden, soo en hebbe ick nochtans gheen herte tot desen volcke: Drijftse wech van my ende laetse henen varen.

+ A vers 1

† Iere. 7.b.15. 11.c.14. 14.b.11. Ezec. 14.c.14

2

Ende als sy segghen: Waer sullen wy henen? So segt tot haer: Aldus seyt de HEEre:^† Wien de doot treft, dien treffe si. Wien dat sweert treft, dien treffet. Wien den honger treft, dien treffe hy. Wien de gheuanckenisse treft, dien treffe sy.

† Ezech. 5.c.12.

3

Wandt ick wilse besoecken, met vierderley plagen, seyt de HEEre.^‡ Met den sweerde, dat sy ghedoot worden, met honden diese verschueren sullen^* metten vogelen des Hemels, ende metten dieren opter Aerden, dat sy verslonden ende verdaen sullen worden.

‡ Iere. 16.a.4.

* Psal. 79.a.2. Deut. 28.c.26.

4

Ende ick wilse in alle Conincrijcken op aerden herwaerts ende ghintswaerts laten drijuen, om^† Manasses wille, des soons Iehiskia, des Conincx Iuda, om het ghene dat hy tot Ierusalem bedreuen heeft.

† 4.Reg. 21.a.1

5

Wie wil dan dijner ontfermen, O Ierusalem? Wie sal dan medelijden met v hebben? Wie sal dan henen gaen, ende v vrede verweruen?

6

⁺ Ghy hebt my verlaten, seyt de HEEre, ende ghy zijt my afgheuallen. Daerom heb ick mijn hant wtghestrect teghen v, dat ick v verderuen wil. Ick ben des ontfermens moede,

+ B vers 6

7

Ick wilse metten wanne ten lande wtwannen, Ende ick wil mijn volck, dat hem van zijnen wesen niet bekeeren en wil, tot enckel Weesen maken, ende verdoen.

8

My sullen onder haer meer weduwen worden dan sants aender See

[p. 29v]

is. Ick wil ouer de moeders der iongher ghesellen laten comen eenen openbaren verderuer,^* ende de stadt daer mede bottelijck ende onuersiens laten oueruallen.

* Prou. 6.b.15. 1.Thess. 5.a.3.

9

Ia dat oock die seuen kinderen heeft, sal ellendich zijn, ende van herten suchten.^* Want haer Sonne sal byden hooghen daghe onder gaen, soo dat beyde haren Roem ende vruechde een eynde hebben sal. Ende de ouerghebleuene wil ick int sweert gheuen voor hare vianden, seyt de HEEre.

* Amos. 8.b.9.

10

^† Och mijn moeder, dat ghy my ghebaert hebt, teghen den welcken alleman twist ende kijft in den gantschen Lande. Hoe wel ick nochtans niemanden op woecker gheleent en hebbe, noch van niemanden op woecker genomen en hebbe, nochtans vloect my alle man.

† Iere. 20.d.14.

11

⁺ De HEEre seyde: Welaen, Ick wil van v sommighe ouer behouden, wandt het sal weder goet worden. Ende ick wil v te hulpen comen inden noot ende ancxte, onder de vianden.

+ C vers 11

12

Meynt ghy niet, dat daer erghens een ijser sy, dat dat yser ende metael vant Noorden in stucken slaen conne?

13

^† Maer ick wil eerst uwe goet ende schatten tot eenen roof gheuen, dat ghy daer niet voor crijghen en sult:^* Ende dat om uwer aller sonden wille, die ghy in alle uwe Palen bedreuen hebt.

† Iere. 17.a.3. 20.b.5.

* Iere. 13.d.22

14

Ende ick wil v tot uwen vianden brengen, in een Lant dat ghy niet en kent.^† Wandt dat vyer is ouer v in mijnen toorne ontsteken.

† Deut. 32.c.22. Iere. 7.b.19.

15

Ock HEEre ghy wetet, gedenct onser, ende neemt ons ter herten, ende wreect ons aen onse Veruolghers. Neemt ons op, ende en vertrect uwen thoorne niet ouer haer: Wandt ghy wetet dat wy om dijnen wille versmaetheyt lijden.

16

^† Maer dijn woort onderhoudt ons na den mael dat wijt ghecregen hebben,^* ende dat selue dijne woort is onser herten vruechde ende troost. Want wy zijn ymmer na dijnen Name ghenoemt, O HEEre Godt Sebaoth.

† Mat. 4.a.4 Sap. 16.e.26.

* Psal. 119.m.92.x.163.

17

Wy^† en versellen ons niet metten Spotters, noch en verblyden ons niet met haer. Maer wy blijuen alleene, wt vreese dijner hant, Wandt ghy zijt seer ghestoort op ons.

† Psal. 2.a.1. 26 a.4.

18

Waerom duert doch onse smerte soo langhe? Sijn onse wonden so seer quaet, datse niemandt gheheelen en can? Ghy zijt ons gheworden, als een Fonteyne die niet meer loopen en wil.

19

Daerom seyt de HEEre also:^* Keert ghy v weder tot mywaerts, soo wil ick my tot uwaerts voeghen. Ende ghy sult mijn Predicant blijuen, Ende indien ghi de oprechte leert,^* dat sy haer vande boose Lieden afscheyden, soo sult ghy mijn Leeraer zijn. Ende eer ghy tot haer sout vallen soo moeten sy eer tot uwaerts vallen.

* Sacha. 1.a.3. Malac. 3.b.7.

* 2.Cor. 6.b.16.

20

Wandt^† ick hebbe v teghen dit volck tot eenen vasten metalen muere gemaect. Ende oft sy teghen v streden, so en hebben sy doch aen v niet. Want ick ben by v, dat ick v helpe, ende v verlosse spreeckt de HEEre.

† Ierem. 1.c.18.

21

^* Ende ick wil v ooc wt de hant der boosen verlossen, ende v ontsetten wt der hant der Tyrannen.

* Psal. 37.a.7.