Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiiij. Capittel.

¶ Een Prekinghe die Ieremie vanden HEEre geopenbaert is, vanden dieren tijt, God verbiet ooc den Propheet, dat hy voort volck niet bidden en soude.

1

⁺ DIt is dat woort, dat de HEERE tot Ieremiam sprac vanden dieren tijt:

+ A vers 1

2

Iuda leghet^† iammerlijck, haer poorten staen ellendelijck, Het staet claghelijck opten Lande, Ende tot Ierusalem is een groote dorheyt.

† Iere. 12.a.4.

3

^* De groote seynden de cleyne om water, maer als si aen de Fonteynen comen, soo en vinden si gheen water, ende brenghen hare vaten ledich weder. Sy gaen truerich ende bedroeft, ende bewinden hare hoofden,

* Amos. 4.b.7

4

Daeromme dat de Aerde van malcanderen splijt, de wijle het

[p. 29r]

niet en reghent opter Aerden. De Ackerlieden gaen truerich henen ende bewinden hare hoofden.

5

Want de Hinden die opten velde werpen, verlaten oock de ionghen, om datter geen gras en wascht.

6

Dat wiltwerck staet op de berghen ende snact na de locht, gelijck de draken, ende versmachtet, want daer geen cruyt en wascht.

7

Och HEEre, onse misdaden hebbent emmer verdient, Maer helpt doch om dijns Naems wille, Wandt onse onghehoorsaemheyt is groot, daer wy tegen v mede ghesondicht hebben.

8

^† Ghy zijt den troost Israels, ende haren noothelper.

† Esai. 49.b.7. Iere. 16.c.19. 17.c.17.

9

Waerom ghelaet ghy v recht oft ghy een gast waert inden Lande, ende als een vreemt man die maer eenen nacht daer in en blijft? Waerom stelt ghy v als een Heldt die versaecht is, ende als een ruese die niet ghehelpen en can? Ghy zijt ymmers onder ons HEEre, ende wy heeten na uwen Name, en verlaet ons niet.

10

⁺ Also seyt de HEEre van desen volcke: Si loopen geerne herwaerts ende gints, ende en blijuen niet geerne thuys. Daerom en wil haer de HEEre niet: Mer hi wort haerder misdaet gedachtich, ende wil hare sonden besoecken.

+ B vers 10

11

Ende de HEERE seyde tot my:^† Ghy en sult voor dit volck om geen genade bidden,

† Iere. 7.b.15.

12

Want oft sy al schoon vasten, so en wil ic nochtans haer smeecken niet hooren.^‡ Ende oft sy al Brandtoffer, ende Spijsoffer brenghen, soo en behaghen sy my doch niet, Maer ic wilse metten sweerde, hongher ende pestilentie vernielen.

‡ Esaie. 1.b.11. Iere. 6.c.20. 7.c.20.

13

Doen sprac ick: Och HEEre HEEre, siet, De Propheten seggen haer:^† Ghi lieden en sult gheen sweert sien, ende geenen dieren tijt by v hebben, Maer ic wil v goeden vrede gheuen op dese plaetse.

† Iere. 5.b.12.

14

Ende de HEEre sprack tot my: De Propheten propheteren valsch in mijnen Name,^† Ick en hebse niet ghesonden, ende haer niet beuolen, ende niet met haer gesproken. Sy prediken v valsce visionen, wtlegghinghen, Afgoderije, ende haers herten bedriegherie.

† Iere. 23.d.21.e.32.

15

⁺ Daerom so seyt de HEEre, vanden Propheten, die in mijnen Name propheteren, hoe wel icse niet gheseynt en hebbe, ende sy nochtans prediken, daer en sal gheen sweert noch dieren tijt in dit Lant comen:^† Sulcke Propheten sullen steruen, doort sweert ende den hongher.

+ C vers 15

† Sach. 13.a.2.

16

Ende tvolck dien sy propheteren, die sullen vanden sweerde, ende den honger opter straten te Ierusalem hier ende daer ligghen,^† datse niemandt begrauen en sal. Ende hare wijuen oock also, haer sonen ende dochteren, Ende ick wil hare boosheyt ouer haer wtstorten.

† Iere. 16.a.4.

17

Ende ghy sult tot haer segghen dit woort:^† Mijn ooghen vloeyen met tranen dach ende nacht, ende sy en houden niet op. Want de Ionckfrouwe de dochter mijns volckx is deerlijck gheplaecht ende iammerlijck gheslaghen.

† Tren. 1.d.16. Iere. 13.c.17. Tren. 3.e.49.

18

Ga ick henen wt opt velt, Siet, so ligghen daer verslaghene met den sweerde: Come ick in de stadt so ligghen daer die van hongher zijn versmacht. Want de Propheten, ende daer toe oock de Priesters moeten in een Landt trecken, dat sy niet en kennen.

19

⁺ Hebt ghy dan Iuda verworpen? Oft heeft uwe siele een walghen aen Sion? Waerom hebt ghy ons dan alsoo geslaghen, dat ons niemant gehelpen en can?^† Wy hoepten dattet vrede soude worden, so en coemt daer niet goets. Wy hoepten wy souden heel worden, Maer siet, soo isser noch meer schadens.

+ D vers 19

† Iere. 8.c.12.

20

O HEERE wy bekennen ons godloos wesen, ende onser vooruaders misdaet.^† Want wy hebben teghen v ghesondicht:

† Baruc. 2.b.12.

21

Mer om dijns Naems wil en laet ons doch niet ghescheynt worden.^* En laet den Troone uwer heerlijcheyt niet bespot worden. Ghedenct doch, ende en laet dijn verbont met ons niet ophouden.

* Esai. 49.c.15.

22

Daer^‡ en is doch ymmers onder de Heydensche Afgoden niemandt diet can doen reghenen, Alsoo en can den Hemel oock niet regenen. Ghy zijt doch ymmer de HEEre onse Godt, op wien wy hopen, want du conste sulcx alle doen.

‡ Ierem. 5.d.23.