Den Bibel, Inhoudende dat Oude ende Nieuwe Testament (Biestkensbijbel)

¶ Dat .xiij. Capittel.

¶ Godt de HEERE vertoont den Propheet als in eenen beeldenaer hoe hy dat volck Iuda straffen wil, vanden hoochsten aen totten nedersten.

1

⁺ ALsoo spreect de HEERE tot my: Gaet henen, ende coopt v eenen lindenen gordel, ende gordet dijn lendenen daer mede, ende en maeckten niet nat.

+ A vers 1

2

Ende ick cocht eenen gordel nae tbeuel des HEEren, ende ick bant hem om mijn lendenen.

3

Doen geschiede anderwerf dat woordt des HEEren tot my, ende seyde:

4

Neemt den gordel dien ghy ghecocht, ende om dijne lendenen gegordet hebt, ende maect v op, ende gaet henen aen de Phrat, ende versteect hem aldaer in een steenrootse.

5

Ick ghinc henen, ende verstack hem aen de Phrat, ghelijck my de HEERE gheboden hadde.

6

Maer nae eenen langhen tijt sprac de HEEre tot my: Maect v op, ende gaet henen aen de Phrat, ende haelt den gordel weder dien ick v gheboot dat ghy aldaer sout versteken.

7

Ick ghinc henen aen de Phrat, ende groef hem op, ende ick nam den gordel van de plaetse, daer ick hem versteken had.⁺ Ende siet, de gordel was verdoruen, alsoo dat hy niewaers meer toe en docht.

+ B vers 7

8

Doen gheschiede des HEEREN woort tot my, ende seyde:

9

Also seyt de HEERE: Effen alsoo wil ick oock verderuen de groote hoouaerdie Iuda ende Ierusalems,

10

Dat boose volc^† dat mijne woorden niet hooren en wil. Maer sy gaen henen nae het goetduncken haers herten, ende si volghen andere goden, op dat si die selue souden dienen ende aenbeden. Sy sullen worden ghelijck de gordel die niet meer en dooch.

† Iere. 7.c.23. 11.b.8. 18.a.12.

11

Want ghelijc een man den gordel vast aen zijn lendenen bindt, alsoo hebbe ic, seyt de HEERE, dat gantsche huys Israels ende dat gantsche huys Iuda om my ghegort,^* dat sy mijn volck souden zijn,^† tot eenen Name, lof ende eere, Maer si en willen niet hooren.

* Deut. 4.c.20. 26.d.18.

† Iere. 30.d.19

12

Daeromme segt haer dit woort: Also seyt de HEERE de Godt Israels: Alle flesschen sullen met wijn gheuult worden. Dan sullen si tot v segghen: Wie en weet dat niet, datmen de flesschen met wijn vullen sal?

13

Dan segt tot haer: Also seyt de HEEre: Siet, Ic wil alle die in desen Lande woonen, de Coninghen die opten stoele Dauids sitten, de Priesters ende Propheten,⁺ ende alle inwoonders te Ierusalem vullen, dat sy droncken worden sullen.

+ C vers 13

14

Ende ick wil den eenen met den anderen, de vaders metten kinderen verstroyen, seyt de HEERE, Ende ick en wil noch sparen, noch ouersien, noch bermhertich zijn in haer verderuinghe.

15

Daerom hoort nv ende merct aen, ende en tortet niet. Want de HEERE heuet ghesproken.

16

^† Gheuet den HEERE uwen Gode de eere, eer dant duyster wort, ende eer uwe voeten haer aen de donckere berghen stooten, Dat ghy op dat licht wacht, soo hijt doch gheheel duyster ende doncker maken sal.

† Iosue. 7.c.19.

17

Maer en wilt ghy sulcx niet hooren, so moet mijn siele doch heymelijck weenen, om sulcker hoouerdijen wil.^† Mijne oogen moeten met tranen vlieten, om dat de cudde des HEEren gheuanghen wort.

† Iere. 14.c.17. Tren. 1.d.16. 3.e.49.

18

⁺ Segt den Coninck ende der Coninghinnen: Sit hier beneden, want de croone der heerlijcheyt is v van uwen hoofde gheuallen.

+ D vers 18

19

De steden Suytwaerts zijn gesloten, ende daer en is niemant diese op doe, Dat gantsche Iuda is reyn wech gheuoert.

20

Heft op uwe ooghen ende siet, hoe dat si vanden Noorden herwaerts comen. Waer is nv de cudde, die v beuolen was, dijn heerlijcke cudde?

21

Wat wilt ghy segghen, als hy v soo besoecken sal? Want ghy hebtse alsoo ghewent, teghen v, dat si Vorsten ende hoofden zijn willen. Wat geldet,^† v sal angst aen comen, ghelijck eenen wijue in kints noode?

† Iere. 30.a.6.

22

Ende oft ghy dan in dijnre herten segghen woudet: Waerom coemt doch sulcx ouer my?^† Om de menichte dijnre misdaets wille, zijn v uwe^* soomen ontdect, ende uwe beenen (met gewelt) gebloot.

† Iere. 15.b.13. 30.c.15.

* Gheeren.

23

Kan oock een Moor zijn huyt veranderen, oft een Lupaert sine vlecken? Soo cont ghy oock wat goets doen, de wijle ghy totten boose ghewent zijt.

24

Daerom wil icse verstroyen als stoppelen, die vanden wint wt der woestinen verweystert worden.

25

Dat sal uwen loon zijn, ende dijn deel dat ick v toe gemeten hebbe, seyt de HEERE. Om dat ghy mijnder vergheten hebt, ende v verlaet op lueghenen.

26

Daerom^† wil ick ooc uwe soomen hooch ontdecken tegen v, datmen uwe schamelheyt wel sien moet. Want ic heb ghesien dijn ouerspel, dijne brootdronckenschap, dijn schandelijcke hoerderije,

† Hose. 2.b.12. Ezec. 16.d.37. Nahu. 3.a.5.

27

Iae dijne grouwelen, beyde op berghen ende op Ackeren. Wee v Ierusalem, Wanneer wilt ghy doch emmermeer ghereynicht worden?