Den Bibel, Inhoudende dat Oude ende Nieuwe Testament (Biestkensbijbel)

¶ Dat .xj. Capittel.

¶ Hy vermaent haer des verbonts, ende vercondicht haer wat iammer haer ghenaect, om dat zijt niet en houden, ende hy vertreckt haer de vrientschap ende weldaden Godts.

1

⁺ DIt is dat woort dat tot Ieremiam gheschiede vanden HEEre, ende sprack:

+ A vers 1

2

Hoort de woorden deses verbonts, dat ghyse dien in Iuda ende den borgeren te Ierusalem segt, ende segt tot haer:

3

Alsoo seyt de HEEre de Godt Israels:^† Veruloect moet zijn so wie niet gehoorsaem en is de woorden deses verbonts,

† Deut. 27.c.26 28.b.15. Galat. 3.b.10.

4

Dat ic uwen vooruaderen gheboot, op dien daghe, doen icse wt Egipten lant leyde, wt den ijseren ouen, ende seyde:^† Weest gehoorsaem mijnder stemmen, ende doet ghelijck als ick v gheboden hebbe. Soo sult ghy mijn volc zijn, ende ick wil uwe Godt zijn,

† Iere. 7.c.22. Exod. 19.a.5.

5

Op^† dat ick houden mach den Eedt, dien ic uwen vooruaders ghesworen hebbe, haer te geuen, een Lant daer melck ende honich in vloeyt, ghelijck alst opten dach van heden blijckt. Ick antwoorde, ende sprack: HEEre, Ia, het sy alsoo.

† Gene. 15.d.18. 26.a.3. 28.c.13.

6

Ende de HEEre seyde tot my: Predict alle dese woorden inde steden Iuda, ende op de straten te Ierusalem, en segt: Hoort de woorden deses verbonts, ende doet daer nae.

7

⁺ Want ic hebt betuycht uwen vaderen, van dien daghe aen, dat icse wt den lande Egypti leyde, tot op desen dach van heden. Ende ick betuychdet vroech ende seyde: Weest ghehoorsaem mijnder stemmen.

+ B vers 7

8

^* Maer si en waren niet ghehoorsaem, noch si en neychden ooc haer oore derwaerts niet. Maer een yeghelijck ghinck nae zijns booschs herten goetduncken. Daerom wil ic ooc ouer haer laten gaen, alle woorden deses verbonts, dat ick gheboden hebbe te doen, ende si en hebben nochtans daer niet nae ghedaen.

* Iere. 13.b.10.

9

Ende de HEEre seyde tot my: Ick wetet wel hoe si haer in Iuda ende te Ierusalem by een rotten.

10

Sy keeren haer effen ghelijc totten sonden haerder vooruaderen, die welcke oock niet en wouden ghehoorsaem zijn mijnen woorden. Ende volchden andere Goden nae, ende dienden haer. Also heeft dat huys Israels ende dat huys Iuda, [altoos] mijn verbondt ghebroken dat ick met haren vooruaders ghemaeckt heb.

11

Daerom siet, seyt die HEEre, Ick wil een ongheluc ouer haer laten comen, dien si niet en sullen mogen ontgaen.^† Ende als si tot my roepen, soo en wil icse niet verhooren.

† Sach. 7.b.13. Prou. 1.c.28. Esaie. 1.b.15.

12

⁺ Soo laet dan de Steden Iuda ende de Borghers te Ierusalem henen gaen,^* ende totten Goden roepen, dien sy ghewierooct hebben. Maer si en sullen haer

+ C vers 12

* Iere. 2.d.25.

[p. 28r]

niet helpen inder noot.

13

^† Want so menighe stadt, so menige Goden hebt ghy, O Iuda. Ende soo menighe alsser te Ierusalem straten zijn, soo menighe schandelijcke Altaers hebt ghy opgericht, om den Baal te wieroocken.

† Iere. 2.d.25.

14

Daerom en^† bidt voor dit volck niet. Ende en maect geen ghesmeeck noch ghebet voor haer. Want icse niet hooren en wil, al bidden si my inder noot.

† Ierem. 7.b.15 15.a.1.

15

Wat hebben mijne vrienden in mijnen huyse te doen? Sy bedrijuen allegader schalcheyt. Ende meynen als oft dat^† heylich vleesch haer dat soude afnemen. Ende als si quaet doen, soo zijn sy dies vrolijck.

† Hagg. 2.b.13.

16

^* De HEEre noemde v eenen groenen schoonen vruchtbaren Olijfboom. Maer nv heeft hy met een groot moortgheroep, een vier om den seluen aenghesteken, also dat sine tacken verderuen moeten.

* Ezech. 16.b.7

17

Want de HEERE Sebaoth die v gheplant heeft, die heeft v met een ongheluck ghedreycht om der boosheyts wil des huys Israels, ende des huys Iuda, die si bedrijuen, dat si my vertoornen, met haren wieroocken, dwelcke sy den Baal doen.

18

⁺ De HEEre heeftet mi geopenbaert, dat ict weet, ende wees my haer voornemen, te wetene,

+ D vers 18

19

Dat^† si my als een arm schaep ter slachbanc leyden willen.^* Want ick en wist niet, dat si teghen my eenen raet besloten hadden, ende gheseyt: Laet ons den boom met sinen vruchten bederuen, ende hem wt den lande der leuendiger wtroeyen, datmen zijns naems nemmermeer en ghedencke.

† Esaie. 53.b.10

* Iere. 18.b.18

20

Maer ghy O HEEre Sebaoth,^* ghy gerechte Richter, ghy die nieren ende herten beproeft, Laet my uwe wraecke ouer haer sien,^† Want ick hebbe v mijne sake beuolen.

* Iere. 17.b.10. 20.c.12. Psal. 7.b.12. 9.a.5. 2.Tim. 4.b.8.

† Psa. 10.b.14

21

Daeromme spreect de HEEre alsoo, teghen de mannen tot Anathoth, die v nae uwen leuen staen,^‡ ende seggen: En propheteert ons niet inden Name des HEEren, wilt ghy anders niet van onsen handen steruen.

‡ Esai. 30.b.10 Amos. 2.b.9. 7.b.16.

22

Daeromme seyt die HEEre Sebaoth alsoo: Siet, ick wilse besoecken, hare^† Ionghelinghen sullen metten sweerde gedoot werden, ende hare sonen ende dochteren van hongher steruen.

† Iere. 18.c.21.

23

Ia datter ooc van haer niet en sal ouerblijuen. Want ic ouer die mannen tot Anathoth een ongheluck wil laten gaen, int Iaer als si besocht sullen worden.