Den Bibel, Inhoudende dat Oude ende Nieuwe Testament (Biestkensbijbel)

¶ Dat .x. Capittel.

¶ Hy waerschouwet dat volck, dat si de Heydensche insettingen niet aenhangen en souden, Ende bewijst hoe ydel dattet sy beelden te maken, ende die te eeren inde stede des warachtighen leuenden Godts.

1

⁺ HOort wat de HEEre tot v vanden huyse Israels spreect.

+ A vers 1

2

Alsoo seyt de HEEre:^† Ghy en sult der Heydenen wijse niet leeren, ende ghy en sult v niet vreesen voor de teeckenen des Hemels, ghelijck als de Heydenen haer vreesen.

† Esai. 47.c.13. Leuit. 18.a.3.

3

Want der Heydenen goden en zijn niet dan ydelheyt.^† Sy houwen int wout eenen boome, ende de wercmeester maectse metter bijlen,

† Esai. 44.b.9 46.a.4. Sapi. 13.b.11. 14.a.8. Psal. 115.a.4

4

Ende verchiertse met siluer ende gout,^* ende hy maectse vast aen met naghelen ende hameren, op dat si niet om en vallen.

* Sap. 13.c.15

5

Het en zijn anders niet dan pilaernen ouertoghen, Sy en connen niet spreken.^† Men moetse ooc dragen, want sy en connen niet gaen.^* Daerom en sult ghi voor haer niet vreesen. Want si en connen noch helpen noch schade doen.

† Esai. 46.a.6. Baruch. 6.a.3

* 4.Regum. 17.g.35.

6

^‡ Maer de HEERE en is niemanden ghelijck. Ghy zijt groot, ende dijnen Naem is groot, ende ghy contet metter daet bewijsen.

‡ Esa. 40.c.25 44.b.7. Iere. 49.d.19

7

^† Wie en soude v niet vreesen, ghy Coninck der Heydenen? V soudemen ymmers ghehoorsaem zijn.

† Apo. 15.a.4

[p. 27v]

Want onder alle Wijsen der Heydenen ende in alle Conincrijcken en is dijns niemant ghelijck.

8

Sy zijn altemael Narren ende dwasen, Want een hout moet ymmer eenen ydelen Godts dienst zijn.

9

⁺ Silueren platen brengtmen van op de zee herwaerts,^† gout wt Vphas, worden meester ende goutsmit toe bereydt, Gheele zijde ende purpur trectmen haer aen, Ende is alle der Wijsen werck.

+ B vers 9

† 3.Reg. 9.e.28.

10

Maer de HEEre is een recht God, een leuendighe Godt, een eewighe Coninc.^† Van sinen thoorne beeft de Aerde, ende de Heydenen en connen zijn dreygen niet verdraghen.

† Nahu. 1.a.5. Psal. 18.a.8. 4.esd. 16.a.12

11

Daerom segt nv tot haer alsoo: De goden die den Hemel ende de Aerde niet ghemaeckt en hebben, die moeten vernielt worden vander Aerden ende onder den Hemel.

12

^† Maer hy heeft de Aerde door sine cracht ghemaeckt, ende des werelts omganck bereydt door zijne wijsheyt, ende den Hemel wt ghebreydt door zijn verstant.

† Genes. 1.a.1. Iere. 51.c.15. Psal. 146.a.6 Acto. 14.c.14 Esai. 45.b.12

13

⁺ Wanneer hy dondert, so coemt daer een groot water te samen onder den Hemel,^† ende treckt den neuel op vanden eynde der Aerden. Hy maect den blixem inden regen,^* Ende hy doet den wint comen wt heymelijcke plaetsen.

+ C vers 13

† Psal. 135.b.7.

* Amos. 4.c.13.

14

^* Alle menscen zijn Sotten met haerder const: Ende alle goutsmeden blijuen beschaemt met haren beelden. Want hare beelden zijn bedroch, ende si en hebben gheen leuen.

* Esai. 44.b.9 45.b.16.

15

Het is enckel ydelheyt, ende een bedrieghelijck werck, Sy moeten vergaen als si versocht worden.

16

Maer alsoo en is hy niet, die Iacobs schat is: Maer hy ist, die alle dingen gheschapen heeft,^† ende Israel is zijn erfdeel,^* Hy heet HEEre Sebaoth.

† Deut. 32.a.9. Esai. 19.e.25.

* Esa. 48.a.2. 54.a.5. Amos. 4.c.13 Iere. 31.f.35. 46.c.18. 48.c.15.

17

Doet dijnen handel wech wt den Lande, ghy die woont in de vaste [Stadt.]

18

Want also seyt de HEERE: Siet, Ick wil de Inwoonders des Lants, teenen mael verstooten, ende wilse beangsten, dat zijt voelen sullen.

19

Ach mijns iammers ende herten leets. Maer ick dencke: Tis mijne plaghe, ick moetse lijden.

20

Mijn Hutte is verwoest, ende alle mijne seelen zijn ghebroken, Mijn kinderen zijn wech ende niet meer voorhanden.⁺ Niemandt en richt mijn Hutte weder op, ende mijn Tenten en slaet niemant weder op.

+ D vers 20

21

Want de Herders zijn Sotten gheworden, ende sy en vraghen nae den HEEre niet. Daerom en connen si oock niet rechts gheleeren, Maer alle cudden zijn verstroyt.

22

Siet, daer coemt een ghecrijsch herwaerts, ende een groot beuen wt den Lande vant Noorden, dat de steden Iuda verwoest, ende tot wooninghen der Draken worden sullen.

23

^† Ick wetet HEEre dat des menscen doen niet en staet in zijnder ghewelt, Ende ten staet in niemants macht, hoe hy wandele oft sinen ganck richte.

† Pro. 20.d.24

24

^* Castijt my O HEEre, nochtans met mate, ende niet in dijner gramschappen, op dat ghy my niet te niete en maect.

* Psal. 6.a.1. Iere. 30.b.11.

25

Maer^† stort dijnen thoorne wt ouer de Heydenen, die v niet en kennen, ende ouer de geslachten, die dijnen Name niet aen en roepen.^* Want si hebben Iacob op ghegeten ende verslonden, si hebben hem wech gheruymt, ende zijn wooninghe verwoest.

† Esai. 64.d.22 Psal. 79.a.6. Eccle. 36.a.3.

* Iere. 30.c.16 50.b.11.