Den Bibel, Inhoudende dat Oude ende Nieuwe Testament (Biestkensbijbel)

¶ Dat .ix. Capittel.

¶ Een claghe des Propheten ouer de boosheyt zijns volcx.

1

⁺ ACh,^† of ick waters genoech hadde in mijnen hoofde, ende mijne ooghen een fonteyne der tranen waren, op dat ick dach ende nacht beweenen mochte de verslaghene in mijnen volcke.

+ A vers 1

† Esaie. 22.a.4

2

Och oft ic een herberge hadde inder woestijnen, soo woude ick mijn volck verlaten

[p. 27r]

ende trecken van haer:^* Want het zijn enckel Ouerspeelders ende eenen wreeden hoope.

* Iere. 7.a.9. 23.b.10.

3

Sy schieten met haren tongen enckel lueghene ende gheen waerheydt, ende drijuent met gewelt inden Lande, Ende si gaen vander eender boosheydt totter ander, ende en achten my niet, seyt de HEERE.

4

^* Een yeghelijc hoede hem voor sinen vrient, ende en betrouwe ooc sinen broeder niet. Want deen broeder verdruct den anderen, Ende deen vrient verraet den anderen,

* Ierem. 12.b.6 Mat. 10.d.35. Mich. 7.a.5.

5

Deen vrient bedriecht den anderen, ende si en spreken niet een waer woort. Sy legghen daer op toe, hoe deene den anderen bedrieghe, ende tis haer leedt dat zijt niet ergher ghemaken en connen.

6

Daer is ouer al enckel bedroch onder haer, Ende om des bedrochs wille, soo en willen si my niet kennen, seyt de HEERE.

7

Daerom seyt de HEEre Sebaoth alsoo:^† Siet, ick wilse smelten ende proeuen, Want wat sal ic anders doen, dewijle dat mijn volc hem also verciert?

† Iere. 6.d.27. Ezech. 22.c.22

8

Haer valsche tongen dat zijn moordelijcke Pijlen,^* Met haren monde spreken si vriendeliken tegen den naesten:^† Maer inder herten loeren si op den seluen.

* Psal. 28.a.3.

† Psal. 37.c.32

9

^‡ En soude ick nv sulcx niet versoecken aen haer, seyt de HEERE, ende en soude mijn siele haer niet wreken aen sulcken volck als dit is?

‡ Iere. 5.b.9.

10

⁺ Ick moet op de berghen weenen ende huylen, ende byden Herders hutkens claghen inder woestijnen. Want si zijn soo gheheelijcken verheert, datter niemandt meer en wandelt, Iae datmen daer niet een beeste roepen en hoort. Beyde de voghelen des Hemels, ende de beesten zijn alle wech.

+ B vers 10

11

^† Ende ick wil Ierusalem tot eenen steenhoop, ende tot een Draken wooninghe maken, ende ick wil de Steden Iuda woest maken, dat daer niemant in woonen en sal. Die nv wijs waer, ende lietet hem ter herten gaen, ende vercondichde, wat des HEEren mont tot hem seyt, waerom dattet Lant verdoruen ende verheert wort, ghelijc als een woestijne daer niemant en wandelt.

† Psal. 79.a.1. Mich. 3.c.12. Iere. 51.f.37.

12

Ende de HEEre seyde: Daerom dat si mijn wet verlaten, die ick haer ghegeuen heb, ende en hooren mijne reden niet, noch daer niet na en leuen,

13

Maer^† volghen haerder herten goetduncken ende Baalim, ghelijck haer hare vooruaders gheleert hebben.

† Deut. 29.c.19. Iosu. 24.c.14

14

Daerom seyt de HEEre Sebaoth, de Godt Israels alsoo:^† Siet, ic wil dit volc met alsen spijsen, ende galle te drincken gheuen.

† Iere. 23.c.15.

15

Ick wilse onder de Heydenen verstroyen, de welcke noch si noch haer vaders en kennen. Ende ick wil dat sweert achter haer schicken tot dat het met haer wt sy.

16

⁺ Alsoo spreect de HEERE Sebaoth: Beschict ende bestelt claechwijuen, dat si comen, ende seynt nae dien, diet wel connen,

+ C vers 16

17

Ende ons haestelijcken beclagen, dat de tranen wt onsen oogen vloeyen, ende dattet water wt onsen oochschelen loope,

18

Datmen een claghelijc geschrey hoore tot Sion, te weten, alsoo: Och hoe zijn wy so gheheel ghedestrueert, ende te schanden gheworden? Wy moeten dat Lant ruymen, want si hebben onse wooninghen verdestrueert.

19

Daerom soo hoort nv, O ghy vrouwen, des HEEren woort, ende vattet metten ooren de redene zijns monts, Leert uwe dochteren weenen, ende die eene leere den anderen claghen, te weten, alsoo:

20

De doot is tot onsen vensteren in geuallen, ende in onsen palleysen gecomen, te dooden de kinderen op de stegen, ende de Ionghelinghen opter straten.

21

Soo seyt de HEEre: Segt,^† Der menschen lichamen sullen ligghen ghelijck als mest opten velde, ende ghelijck de schoouen achter den Mayer, die niemandt en vergadert.

† Iere. 7.d.31. 8.b.9.

22

⁺ Alsoo seyt de HEEre: Een wijse en beroeme hem niet van sine wijsheyt, Een stercke en beroeme hem niet van zijnder stercte, Een rijcke en gloriere niet in sinen rijckdom.

+ D vers 22

23

^† Maer soo wie beroemen wille, die beroeme hem dies, dat hy my wete ende kenne, dat ic de HEEre ben, die bermherticheyt, recht ende gerechticheyt oeffent opter Aerden,^* Want sulcx behaecht my, seyt de HEEre.

† Esai. 65.c.15. 1.Cor. 1.d.31. 2.Cor. 11.a.1.

* Matth. 9.b.13 12.b.7.

24

Siet den tijt coemt, dat ickse alle besoecken sal, de besneden met de onbesneden,

25

Te weten, Egipten, Iuda, Edom, de kinderen Ammon, Moab,^* ende alle die inde eynden der woestijnen woonen.^† Want alle Heydenen hebben een onbesneden voorhuyt.^‡ Maer dat gantsche huys Israels heeft een onbesneden herte.

* Iere. 25.c.21.

† Iere. 4.a.2. 6.b.10.

‡ Rom. 2.c.29.