Den Bibel, Inhoudende dat Oude ende Nieuwe Testament (Biestkensbijbel)

¶ Dat .viij. Capittel.

¶ Hy beclaecht haer hertneckicheyt, datse haer niet en willen bekeeren, Ende daerom vercondicht hy haer straffinge so verre si haer niet en beteren.

1

⁺ DAeromme segt tot haer: Alsoo seyt de HEERE: Waer isser yemant als hy valt, die niet gheerne weder op en stont? Waer is yemant als hi dwalende gaet, die niet geerne weder te recht en quame?

+ A vers 1

2

Nochtans so wil dit volck verdoolt gaen te Ierusalem, altijt voort ende voort. Sy houden haer so vast aen den valschen Godts dienst, dat sy haer niet en willen laten afkeeren.

3

Ic sie ende hoore, dat si niet rechts en leeren.^† Daer en is niemandt, dien zijn boosheydt leet ware, ende sprake: Wat maeck ic doch? Sy loopen alle haren loop, ghelijck eenen rasenden hengst in eenen strijt.

† Ezec. 20.f.43.

4

^† Een Oyuaer onder den Hemel weet sinen tijt, een Tortelduyue, Crane ende Swaluwe mercken op haren tijt, wanneer si weder comen sullen:⁺ Maer mijn volck en wil dat recht des HEEren niet weten.

† Esaie. 1.a.3.

+ B vers 4

5

Hoe cont ghy doch geseggen: Wy weten wat recht is, ende hebben de heylighe Schrift voor ons? Het is doch enckel lueghen soo wat de Schriftgeleerden setten.

6

Daerom moeten sulcke Leeraers te schanden, verschrict, ende gheuanghen worden.^† Wandt wat connen sy goets gheleeren, aengesien si des HEEren woort verworpen?

† Deut. 4.a.6. Psal. 19.a.8.

7

Daerom wil ic hare wijuen den vreemden geuen, ende hare Ackers, den genen die haer veriagen sullen.^† Want si ghieren alle gader, beyde cleyn ende groot, Ende beyde Priesters ende Propheten leeren valschen Gods dienst.

† Esaie. 56.c.11 Iere. 6.b.13.

8

^† Ende si troosten mijn volc in haer ongheluck, op dat zijt cleyn achten souden, ende seggen:^† Vrede, vrede, Ende het en is nochtans gheenen vrede.

† Iere. 23.b.14.

† Iere. 6.b.14. Ezech. 13.b.10

9

Daerom sullen si bescaemt blijuen, dat si sulcken grouwel bedrijuen. Hoe wel si nochtans ongescheynt willen zijn, ende en willen haer niet schamen,^* Daerom moeten si vallen op eenen hoope. Ende als icse versoecken sal, so sullen si vallen, seyt de HEEre.

* Ierem. 7.d.31

10

⁺ Ick wilse also aflesen, seyt de HEEre, datter niet een druyue aen den wijnstoc, noch niet een vijghe aen den vijgeboom blijuen en sal, Ia dat de bladeren ooc afuallen sullen, ende soo wat ick haer ghegheuen hebbe, dat sal haer ghenomen worden.

+ C vers 10

11

Waer sullen wy dan woonen? Ia vergadert v dan, ende laet ons in de vaste Steden trecken, ende aldaer hulpe verwachten. Want de HEEre onse Godt sal ons helpen met eenen bitteren dronc, om dat wy so sondigen tegen den HEERE.

12

Iae verlaet v daer op,^† Ten sal gheen noot zijn, hoe wel datter nochtans niet goets voorhanden en is, ende dat ghy sult ghesont worden, hoe wel datter niet dan enckel schade aenstaende en is.

† Iere. 14.d.19.

13

Men hoort dat hare peerden alreede snuyuen tot Dan waerts, ende hare guylen briesschen, dattet gantsche Lant daer af beeft. Ende si comen daer henen, ende sullen dat gheheele Lant op eten, met al tgheen datter in is, de stadt met allen den ghenen die daer in woonen.

14

^† Want siet, ick wil slanghen ende Baselisken onder v seynden, die niet besworen en zijn, die sullen v steken, seydt de HEERE,

† Leui. 26.d.22. Sapi. 11.c.18. Eccl. 40.b.20

15

So wil ick my aen mijnder moeyte ende aen mijn hertrouwe vermaken.

16

Siet, de dochter mijns volcx sal screyen, wt verren Lande herwaerts. En wil dan de HEERE gheen Godt meer zijn tot Sion? Oft en sal sy gheenen Coninck meer hebben? Iae waerom hebben si my alsoo vertoornt door hare beelden, ende vreemden onnutten Godts dienst?

17

Den Oogst is voorby, den Somer is wech, ende ons en is gheen hulpe ghecomen.

18

My iammert van herten seer, dat mijn volck alsoo verdoruen is, Ick ben verbaest, ende heb my seer qualijcken.

19

En isser dan gheen salue in Gilead? Oft en isser geen medecijnmeester? Waer om en is de dochter mijns volcx dan niet gheheelt?