Den Bibel, Inhoudende dat Oude ende Nieuwe Testament (Biestkensbijbel)

¶ Dat .vj. Capittel.

¶ De Propheet beeldet haer voor den oogen, haer toecomende iammer, Ende toont haer daer mede, waerom dat sulcx gheschieden sal.

1

⁺ VErgadert v ghy kinderen BenIamin wt Ierusalem,^† ende blaest de Trompetten op de wachte Thekoa, ende steeckt op een vaenken, op de wachte BethCherem, wandt daer coemt een ongheluck vanden Noorden, ende een groot iammer.

+ A vers 1

† Ierem. 4.a.5.

2

De dochter Sion is, ghelijck eenen schoonen lustighen beemt,

3

Maer daer sullen Herders ouer haer comen met haren Cudden, die sullen Tenten rontom haer opslaen, ende een yegelijc sal weyden aen sinen cant (ende segghen)

4

Rustet v totten Crijch teghen haer. Wel op, laet ons henen optrecken, alst noch hooch dach is. Ach het gaet Auont worden, ende de schaduwen worden groot.

5

Welaen, soo laet ons optrecken, ende byden nacht op zijn, ende hare Palleysen verderuen.

6

Want alsoo seyt de HEEre Sebaoth:^† Hout boomen af, ende maect bolwercken teghen Ierusalem, Want si is een stadt die besocht sal worden. Daer is doch enckel onrecht in.

† Deut. 20.c.19.

7

Want ghelijck als wt eenen waterput water wt vloeyt, alsoo vloeyt ooc haer boosheyt wt, haer onrecht ende ghewelt crijscht ouer haer, ende haer moorden ende slaen bedrijuen si voor my daghelijcx.

8

O Ierusalem betert v, eer dat hem mijn herte van v keere, ende ick v tot eenen woesten lande make, daer niemant in gewoonen en can.

9

⁺ Also seyt de HEERE Sebaoth: So wat daer noch ouerghebleuen is van Israel, dat moet oock noch afghelesen worden, als aen den Wijnstock. De Wijnleser sal deen voor, ander nae inden Corf worpen.

+ B vers 9

10

Ach met wien sal ick doch spreken, ende ghetuyghen? Dattet doch yemant hooren woude:^† Maer haer ooren zijn onbesneden, Sy en moghens niet hooren. Siet, si houden des HEEren woort voor eenen spot, ende si en willen zijnder niet.

† Iere. 4.a.4. 9.d.25.

11

Daerom ben ick vanden dreygen des HEEren soo vol, dat ickt niet laten en can. Giet wt, beyde ouer de kinderen opter straten, ende ouer de Ionghelinghen inden Raet, deen metten anderen. Want daer sullen gheuanghen worden, beyde Man ende Wijf, beyde de oude ende de welbedaechde.

12

Haer huysen sullen den vreemden te deel worden, met den Ackeren ende Wijuen. Want ick wil mijn hant wt strecken, seyt de HEERE, ouer de Inwoonders des Lants.

13

^† Want si bedrijuen alle ghiericheyt, cleyn ende groot, ende beyde de Propheten ende de Priesters leeren alle gader valschen Godts dienst.

† Esaie. 56.c.11. Ierem. 8.b.7.

14

Ende si troosten mijn volc in haer ongheluck, op dat zijt cleyn achten souden, ende seggen:^† Vrede, Vrede, Ende het en is doch gheenen vrede.

† Ezech. 13.b.10

15

Daerom sullen si bescaemt blijuen, om dat si sulcken grouwel bedrijuen, Hoe wel dat si willen ongescheynt zijn, ende si en willen haer niet scamen.⁺ Daerom moeten si vallen op eenen hoope, Ende als icse besoecken sal, soo sullen si vallen, seyt de HEEre.

+ C vers 15

16

Also seyt de HEERE: Tredet op de weghen ende siet toe, ende vraecht na de voorgaende weghen, welck den goeden wech si, ende wandelt daer in,^† soo sult ghy uwer sielen ruste vinden. Maer si segghen: Wy en willens niet doen.

† Mat. 11.c.29.

17

^* Ick heb Wachters ouer v lieden geset, merct op de stemme der Trompetten. Maer sy segghen: Wy en willens niet doen.

* Esaie. 62.a.6. Ezech. 3.a.8. 33.b.7.

18

Daerom soo hoort ghy Heydenen, ende aenmerct tsamen met uwe lieden,

19

Ghy Aertrijcke hoort toe,^* siet, ic wil ouer dit volck een ongheluck brenghen, te weten, haren verdienden loon, om dat si op mijne woorden niet en achten, ende mijn Wet verwerpen.

* Iere. 19.a.3.

20

Wat vraghe ick na den Wierooc, die wt het Rijck Arabia, Ende nae den goeden Caneel, die wt verren lande comen?^† Vwe Brantofferen en zijn my niet aenghenaem, ende uwe offeren en behaghen my niet.

† Esaie. 1.b.11. Ierem. 7.c.20 Amos. 5.d.22

21

Daerom spreeckt de HEEre also: Siet, Ic wil desen volcke een ergernisse setten, Waer aen, haer beyde Vaders ende kinderen, deen metten anderen stooten sullen, Ende deen naghebuer metten anderen vergaen sullen.

22

⁺ Also seyt de HEEre:^† Siet, daer sal een volck comen vant Noorden, Ende een groot volck sal hem opheffen seer na aen onsen lande,

+ D vers 22

† Iere. 1.b.15. 5.c.15. Abac. 1.b.6.

23

Die bogen ende schilden voeren, Het is grousaem, ende sonder bermherticheyt.^† Sy ruysschen daer henen, gelijck een rasende zee, ende si rijden te peerde ghewapent, ghelijc als Crijschlieden, teghen v, O ghy dochter Sion.

† Esaie. 17.d.12

24

Als wy van haer hooren sullen, so sullen ons de vuysten ontsincken. Ons sal bange ende wee worden, ghelijck eener die baren sal.

25

^* Niemant en gae ymmers wt op den Acker, Niemant en ga ouer tvelt, Want het is ouer al onvry van het Sweert des Viants.

* Mat. 24.b.16 Luce. 21.c.19.

26

O dochter mijns volcx, trect Sacken aen, ende legt v inde Asschen,^* draecht rouwe, als ouer eenen eenighen sone, ende claecht, ghelijc als de ghene die hoochlijc bedroeft zijn. Want de verderuer coemt ouer ons gheheel snelle.

* Amo. 8.b.10. Sach. 12.c.10.

27

Ick hebbe v tot eenen^† Smelter geset

† Hier. 9.a.7.

[p. 26r]

onder mijn volck, dwelcke so hert is, dat ghy haer wesen ende ondersoecken ende proeuen sult.

28

Sy zijn al te samen afuallige, ende wandelen verraderlijcken. Sy zijn enckel verdoruen metael ende yseren.

29

Den blaes balck is verbrant, dat loot verdwijnt, het smelten is te vergheefs. Want dat quaet en is daer niet af ghescheyden.

30

Daerom heeten si oock een verworpen siluer, Want de HEERE heeftse verworpen.