Den Bibel, Inhoudende dat Oude ende Nieuwe Testament (Biestkensbijbel)

¶ Dat .v. Capittel.

¶ De Propheet bewijst de oorsake, waerom den toorne Godts ontsteken is ouer haer, want si alle Lasteraers zijn, ende niemant die dat recht beminnen, dien het onrecht mishaechde.

1

⁺ GAet door de straten te Ierusalem ende besiet, ende ondersoect, ende soeckt op hare straten, oft ghy yemandt vint, die recht doet, ende nae dat gelooue vraghet, so wil ick haerder genadich zijn.

+ A vers 1

2

Ende oft si al schoon seyden,^† Byden leuenden Godt, soo sweeren si nochtans valschelijck.

† Iere. 4.a.2. 12.c.16.

3

O HEEre uwe oogen sien,^† op dat ghelooue. Ghy slaetse maer si en gheuoelens niet, Ghy plaechtse, maer si en beteren haer niet. Sy hebben een herder aensicht dan eenen viersteen, ende si en willen haer niet bekeeren.

† Hebre. 11.b.6

4

Ick dacht: Welaen, Den armen hoope is onuerstandich, si en weten niet vanden wech des HEEren, noch van haers Godts recht.

5

^† Ick wil tot den geweldigen gaen, ende met haer spreken, die sullen emmer den wech des HEEREN ende haers Gods recht weten.^* Maer die alle gader hadden dat Iock ghebroken, ende de seelen in stucken gheschuert.

† Deut. 17.d.23

* Iere. 2.c.17.

6

^+† Daerom haer ooc de Leeuwe, die wt dat wout coemt, verschueren sal, ende de Wolf wt der woestijnen salse verderuen, Ende den Lupaert sal op hare steden loeren. Alle die daer wt gaen, die sal hy verslinden. Wandt haerder sonden zijn te veel, ende si blijuen verstockt in haerder onghehoorsaemheyt.

+ B vers 6

† 3.Re. 13.e.24. Deut. 32.d.24

7

Hoe soude ick v dan ghenadich zijn? Aenghesien uwe kinderen my verlaten, ende^† sweeren by dien, die gheen Godt en is. En nv icse geuult heb, bedrijuen si ouerspel, ende loopen int Hoerenhuys,

† Seph. 1.a.5.

8

^† Een yeghelijck briest zijns naesten huysvrouwe aen, ghelijck de weeldighe Hengsten.

† Ezech. 22.b.11

9

En^* soude ickse om sulcx wil niet besoecken, seyt de HEEre, Ende en soude mijn siele haer niet wreken aen sulcken volck als dit is?

* Iere. 5.d.27. 9.a.9.

10

Bestormt hare mueren, ende werptse om, ende en doetse nochtans niet heel te niet. Voert hare wijngaertrancken wech, Wandt si en zijn des HEEREN niet,

11

Mer si verachten my, beyde dat huys Israels, ende dat huys Iuda, seydt de HEERE.

12

Sy versaken den HEERE, ende seggen: Dat en is hy niet,^† Ende het en sal ons alsoo qualijcken niet gaen, sweert ende hongher en sullen ouer ons niet comen.

† Iere. 14.b.13.

13

⁺ Ia de Propheten zijn clappaerts, Ende en hebben oock Gods woort niet. Het gae ouer haer seluen alsoo.

+ C vers 13

14

Daerom spreect de HEEre de Godt Sebaoth: Wandt ghy alsulcke woorden segt, Siet,^† daerom wil ic mijn woorden in uwen mont tot vier maken, ende dit volck tot hout, ende het salse verteren.

† Esaie. 33.b.11.

15

^† Siet, Ick wil ouer v vanden huyse Israels (seyt de HEERE) een volc van verre brengen, een machtich volc, die dat eerste volck geweest zijn, een volc wiens sprake ghi niet en verstaet, ende niet vernemen en cont, wat si spreken.

† Deu. 28.c.49. Baru. 4.c.11.

16

Haer Kokeren zijn open grauen, het zijn enckel Ruesen.

17

Sy sullen uwen oogst ende v broot verteren. Sy sullen uwe sonen ende dochteren verslinden. Sy sullen uwe Schapen ende Runderen verslinden. Sy sullen uwe wijnstocken ende vijgheboomen vernielen. Vwe vaste steden daer ghi v op verlaet, die sullen si metten sweerde verderuen.

18

Ende ick en wilt, seyt de HEERE, ter seluer tijt niet heel te niet doen.

19

Ende^† oft si segghen wouden: Waerom doet ons de HEERE onse Godt sulcx allegader? Soo sult ghy haer antwoorden: Ghelijc als ghy mi verlaet, ende vreemde Goden dient in v eyghen Lant,^† Alsoo sult ghy oock vreemde dienen, in een Lant dat v niet en is.

† Iere. 16.b.10.

† Deu. 28.g.48

20

⁺ Sulcx sult ghy inden huyse Iacobs vercondighen ende prediken in Iuda, ende segghen: Hoort toe ghy dulle volck, dat gheen verstant en heeft,^† Die oogen hebben, ende en sien niet, ooren hebben, ende en hooren niet.

+ D vers 20

† Esaie. 6.b.10.

21

En wilt ghy my niet vreesen, seyt de HEEre, ende voor my niet verschricken? My,^* die de zee dat sant tot eenen Oeuer sette, Waer binnen dattet altijt blijuen moet, daert niet ouer gaen en moet: En oftet al schoon stormt, soo en vermacht nochtans niet, Ende oft zijne goluen heel rasen, soo en moeten si nochtans daer niet ouer loopen.

* Iob. 26.b.10. 28.c.26. Prou. 8.c.29. Genes. 1.a.9.

22

Maer dit volck heeft een afuallich, ongehoorsaem herte, blijuen afuallich, ende gaen altoos voort wech,

23

Ende en segghen niet eens in haren herten: Laet ons doch den HEEre onsen Godt vreesen, die ons vroeghen reghen ende spaden regen ter rechter tijt gheeft,^† ende ons den oogste trouwelijc ende iaerlijck bewaert.

† Genes. 8.d.22.

24

Maer uwe misdaden beletten sulcx, Ende uwe sonden keeren sulcken goet van v.^† Want men vint onder mijnen volcke Godloosen, die den lieden laghen leggen, ende vallen bereyden, om haer te vanghen, ghelijc de Vincuanghers doen met

† Abac. 1.c.15.

[p. 25v]

de slachnetten.

25

Ende hare huysen zijn vol rancken, ghelijc een voghelkenie vol locuoghelen is. Daer af worden si geweldich ende rijck, vet ende gladt.

26

Sy gaen met boose stucken om, Sy en houden geen recht,^* Den Weesen en voorderen si sine saken niet, ende het gheluct hem, ende en helpen den armen niet totten rechte.

* Esaie. 1.c.23. Ezech. 22.a.7. Malac. 3.a.5.

27

^† Soude ick dan sulcx niet versoecken spreect de HEEre, Ende en soude mijn siele haer niet wreken aen sulcken volck, als dit is?

† Iere. 5.b.9. 9.a.9.

28

Het^* staet grouwelijcken ende veruaerlijcken inden lande.

* Esai. 24.a.4. 33.a.9.

29

De^† Propheten leeren valsch. Ende de Priesters heerschappen in haer officie, ende mijn volc heeftet gheerne also. Hoe wilt v ten laetsten daer ouer gaen.

† Iere. 8.b.7.