Den Bibel, Inhoudende dat Oude ende Nieuwe Testament (Biestkensbijbel)

¶ Dat .ij. Capittel.

¶ De HEEre toont den volcke zijn trouwe, liefde, ende vrientschap.

1

⁺ HOort des HEEREN woort ghy vanden huyse Iacobs, ende alle gheslachten vanden huyse Israels.

+ A vers 1

2

Also seyt de HEEre:^† Wat gebreck hebben uwe Vaders aen my ghehadt, dat si van my weken, ende hingen aenden onnutten Afgoden, daer si nochtans niet en vercreghen?

† Miche. 6.a.3.

3

Ende en dachten noyt eenmael: Waer is de HEEre^* die ons leyde wt den Lande Egipti, ende bracht ons inde woestijne, inden woesten ongebaenden lande, inden dorren ende duysteren Lande, inden Lande daer niemandt en wandelde, noch eenich Mensche en woonde?

* Exo. 13. 14.

4

Ende^† ick bracht v in een goet lant, dat ghy eten sout zijn vruchten ende goeden: Ende doen ghy daer in quaemt, veronreynichde ghy mijn Landt, ende ghy maeckte my mijn erfdeel tot eenen grouwel.

† Deut. 6.b.11.

5

⁺ De Priesters en gedachten niet: Waer is de HEEre?^* Ende de geleerde en achteden my niet, ende de Herderen leyden de lieden van my, ende de Propheten propheteerden van Baal,^† ende hinghen aenden onnutten Afgoden.

+ B vers 5

* Ioan. 5.d.43.

† 3.Re. 18.d.26.

6

Ick moet my altoos met v ende met uwe kints kinderen schelden, seyt de HEEre.

7

Gaet henen inde Eylanden Chitim, ende siet toe, Ende seyndet in Kedar, ende merct neerstelijck, ende siet toe, oft oock alsoo daer toe gaet,

8

Oft ooc de Heydenen hare Goden veranderen, hoe^† wel dat si nochtans gheen Goden en zijn. Ende nochtans heeft mijn volc zijn heerlicheyt verandert, in eenen onnutten Afgodt.

† Psal. 96.a.5. Esa. 37.c.19.

9

O ghy Hemelen weest daerom verbaest, verschrict v, ende beeft, spreeckt de HEEre.

10

Want mijn volck doet een dubbel sonde:^† My, de leuende water Adere, verlaten sy, ende si maken haer hier ende daer wtghehouwen Fonteynen, die nochtans vuyle Holen zijn, ende en gheuen gheen water.

† Psal. 36.b.9. Ierem. 17.c.13 Ioan. 4.b.10. Baruc. 2.b.12.

11

Is^† Israel dan een knecht oft Lijfeyghen? Dat hy alle mans roof zijn moet?

† Exod. 4.d.23.

12

Want de Leeuwen brullen ouer hem, ende roepen, ende verwoesten zijn landt, ende verbernen sine steden, Ia datter ooc niemandt in en woont.

13

⁺ Daer toe soo slaen die van Noph ende Thahpanhes v den Cop in tween.

+ C vers 13

14

Sulcx maect ghy v seluen, dat ghy den HEERE uwen Godt verlaet, soo dickwils als hy v den rechten wech leyden wil.

15

Wat helpet v dat ghy in Egipten treckt, ende wilt van dat water Sihor drincken? Ende wat helpet v dat ghy na Assyrien reyst, ende wilt van dat water Phrat drincken?

16

^† Het is dijnre boosheyt schult, dat ghy also ghecastijt wort, Ende dijner ongehoorsaemheyt, dat ghy alsoo ghestraft wort.^† Also moet ghy bekennen ende beuinden, wat iammer ende hertenleyt dattet inbrengt den HEEre uwen God te verlaten, ende hem niet te vreesen, seyt de HEEre HEEre Sebaoth.

† Iob. 22.a.5.

† Baruc. 2.b.12.

17

Want ghy hebt altijt v^† Iock gebroken, ende uwe banden gheschuert, ende gheseyt: Ick en wil alsoo niet onderworpen zijn,^† maer op alle hooge Hueuelen, ende onder alle groene boomen loopt ghi de hoererije nae.

† Ierem. 5.a.5.

† Iere. 3.b.1.

18

Maer^† ick hadde v gheplant tot eenen soeten wijnstoc, ende tot een oprecht goet saet. Hoe zijt ghy dan my ghecomen tot eenen bitteren wilden Wijnstock?

† Esaie. 5.a.2. Mat. 21.d.33. Psal. 80.a.9.

19

^* Ende al wasschet ghy v met Looghe, ende neemt veel Sepe daer toe, so schijnt doch uwe onduecht dies te meer voor my, seyt de HEERE HEERE Sebaoth.

* Ierem. 4.e.30

20

Hoe dorst ghy dan seggen: Ick en ben niet onreyn? Ic en hange Baalim niet aen?⁺ Siet^† aen, wat ghy bedrijft inden dale, ende bedenct hoe ghijt beschickt hebt. Ghy loopt rontom ghelijck een Kemelinne inder Hitten:

+ D vers 20

† 4.Re. 17.b.10 Esai. 65.a.3. Ierem. 5.b.7. Ezec. 16.b.15.

21

Ende ghelijck een Wildt inder woestijnen plach, wanneert van grooter hitte snuyft, ende loopt, dattet niemant opgehouden en can. Diet weten wil, die en derf niet verre loopen, Op de vierdaghen sietmen wel.

22

Lieue hout doch, ende en loopt so woedentlijck niet. Maer ghy spreect: Dat laet ick. Ick moet met den vreemden boeleren, ende hen nae loopen.

23

Ghelijc als een dief ter scanden coemt, als hy begrepen wort, Alsoo sal oock dat huys Israels te schanden comen, tsamen met haren Coninghen ende Vorsten, Priesteren ende Propheten,

24

^† Die totten houte segghen: Ghy zijt mijn Vader, Ende tot eenen steen: Ghy hebt mi gebaert.^* Want si keeren my den rugge toe, ende niet dat aensicht.^† Maer als den noot coemt, soo segghen si: Wel op, ende helpt ons.

† Roma. 1.c.23.

* Iere. 32.d.33. Sacha. 7.b.11

† Deu. 31.d.17

[p. 24r]

25

Maer waer zijn dan uwe Goden die ghy v ghemaect hebt? Ghebiet haer dat si opstaen, Laet sien oft si v helpen connen inder noot.^† Want soo menige stadt [als ghy hebt] alsoo menighen God hebt ghy Iuda.

† Iere. 11.b.13.

26

⁺ Wat wilt ghy dan noch recht hebben teghen my? Ghy zijt doch alle van my af geuallen, seyt de HEEre.

+ E vers 26

27

Alle slagen zijn aen uwe kinderen verloren, si en laten haer doch niet castijen.^† Want uwe sweert verslint euenwel uwe Propheten, ghelijck eenen woedende Leeu.

† 1.Pa. 24.d.21 4.Esd. 1.e.32.

28

O ghy boose aert, merckt op des HEEREN woort, Ben ick dan Israel een woestijne oft een eensaem lant? Waerom spreect dan mijn volck: Wy zijn de Heeren, ende en moeten v niet nae loopen.

29

Een Ioncfrouwe en verghetet haer chieraet niet, noch een Bruyt haren Sluyer: Maer mijn volck verghetet my eewelijck.

30

Wat wilt ghy veel uwe wercken verschoonen, op dat ick v ghenadich sy? Onder sulcken schijn bedrijft ghy altijt meer ende meer boosheyts.

31

Bouen dien soo vintmen by v^† dat bloet der Armer ende onschuldiger sielen, aen allen hoecken, ende dat en is oock niet heymelijc, maer openbaer op de selue plaetse. Noch spreect ghi:

† Exod. 23.a.7.

32

Ick ben ontschuldich, Hi keerde sinen toorne van my. Siet, Ick wil met v te recht gaen, om dat ghy segt: Ick en hebbe niet ghesondicht.

33

Hoe wijct ghy doch soo gheerne, ende valt nv herwaerts nv ghintswaerts? Maer ghy sult aen Egipten te schande worden, ghelijc ghy aen Assyrien te scande gecomen zijt.

34

Want ghy moest van daer ooc wech trecken, ende uwe handen ouer thooft tsamen slaen. Want de HEEre sal dijnen hope laten faelgeren, ende het en sal v by hem niet ghelucken.

35

Ende ghy spreect:^† Wanneer hem een man van sinen wijue scheyden laet, ende si trect van hem, ende neemt eenen anderen man, derf hijse ooc weder aennemen? En ist niet alsoo, dat dat lant veronreynicht wert? Maer ghy hebt met veel boeleerders gehoereert: Maer nochtans coemt wederom tot my, spreect de HEERE.

† Deut. 24.a.4

36

Heft op uwe ooghen tot de hoochten, ende siet, hoe ghy ouer al hoererie bedrijuet. Ghy sit op de straten, ende wacht op haer, ghelijck als een Araber inder woestijne, ende ontreynicht dat Landt met dijnre hoererije ende boosheyt.

37

^† Daerom moet oock den vroegen reghen wtblijuen, ende den spaden reghen niet comen. Ghy heb eender Hoeren aensicht, Ghy en wilt v niet meer schamen.

† 3.Reg. 17.a.1.

38

Ende nochtans roept ghy tot my: Lieue Vader, ghy meester mijnder ioncheyt,

39

Wilt ghy dan inder eewicheyt gram zijn, ende vander gramscappen niet aflaten? Siet, ghy leert ende doet quaet, ende ghy en laet v niet bestieren.