Den Bibel, Inhoudende dat Oude ende Nieuwe Testament (Biestkensbijbel)

¶ De Propheet Ieremia.

¶ Dat eerste Capittel.

¶ Na de verclaringhe der Coningen ende des tijts inden Tijtel begrepen, soo bewijst de Propheet hoe hy gheroepen ende wt ghesonden is.

1

⁺ DIt zijn de gheschiedenissen Ieremie des soons Hilkie, wt den Priesteren tot^† Anathot, inden Lande BenIamin.

+ A vers 1

† Iere. 11.d.23.

2

Tot den welcken gheschiede dat woordt des HEEren, ter tijdt^† Iosie des soons Amon des Conincks Iuda, inden derthiensten Iare zijns Conincrijcx.

† 4.Reg. 22.a.1 2.Par. 34.a.1

3

Ende daer nae totten tijden des Conincx Iuda, Ioiakim des soons Iosie, tot aen dat eynde des^* elfsten Iaers Sedekie, des soons Iosie des Conincks Iuda, tot op de gheuanckenisse Ierusalems, inder vijfster Maent.

* Iere. 39.a.2. 4.Re. 25.a.2.

4

Ende des HEEren woort geschiede tot my, ende sprack:

5

Ick kende v,^† eer ick v in des moeders Lichaem bereyde, ende scheydede v wt, eer ghy vander Moeder gheboren werdet, ende settede v tot eenen Propheet onder de Volcken.

† Esai. 46.a.2. Psal. 71.a.6. 139.c.16.

6

Maer ic seyde:^* Och HEEre HEEre, ick en dooch niet om te prediken, want ick ben te Ionck.

* Exod. 4.c.10. Act. 9.b.13.

7

Maer de HEEre sprack tot my: En segt niet: Ick ben te Ionck.^† Maer ghy sult henen gaen, soo werwaerts ick v seynde, ende prediken wat ick v beuele.

† Mat. 10.b.16

8

^† En weest van haer niet veruaert, want ick ben by v, ende wil v verlossen, spreect de HEEre.

† Luce. 12.a.4.

9

Ende de HEEre stack zijn hant wt,^† ende roerde mijnen mont aen, ende seyde tot my:^* Siet, ick legghe mijne woorden in uwen mont.

† Esai. 6.a.7.

* Esai. 51.c.16. 59.c.21.

10

Siet, ick sette v heden op desen dach ouer volcken ende Conincrijcken,^† dat ghy wtroeden, in stucken breken, verstooren ende verderuen sult, ende stichten ende planten.

† 2.Tim. 4.a.2.

11

Ende des HEEren woort geschiede tot mi, ende sprac: Ieremia, wat siet ghy? Ic seyde: Ic sie eenen wackeren staf.

12

⁺ Ende de HEEre seyde tot mi: Ghy hebt recht ghesien, want ick wil wacker zijn ouer mijn woort, dat ict doe.

+ B vers 12

13

Ende des HEEren woort geschiede anderwerf tot mi, ende seyde: Wat siet ghi? Ick seyde: Ick sie eenen heet^† siedende pot vanden Noorden herwaerts.

† Iob. 41.b.11.

14

Ende de HEEre seyde tot my:^† Vanden Noorden sal dat ongheluck wtbreken ouer alle die inden lande woonen.

† Iere. 4.a.6. 25.b.9.

15

^* Want siet, ick wil roepen alle Vorsten inde Conincrijcken Noortwaerts seyt de HEEre, dat si comen sullen, ende haer stoelen setten voor de poorten te Ierusalem, ende rontom de

* Abac. 1.b.6.

[p. 23v]

mueren henen, ende voor alle steden Iuda.

16

⁺ Ende ick wil dat recht ouer haer laten gaen, om alle haerder boosheydts wille, datse my verlaten, ende roocken andere goden,^† ende dat si aenbidden dwerck haerder handen.

+ C vers 16

† Eaie. 2.b.8.

17

^* Daerom gordet uwe lendenen, ende maect v op, ende prediket haer, al wat ic v beuele.^† En vreest v niet voor haer, als oft ick v soude afschricken.

* Ezech. 2.b.14

† Esai. 41.b.10

18

^‡ Want ick wil v heden tot een vaste stadt, tot een ijseren Pilaerne, ende tot eenen metalen muere maken, inden gantschen lande, teghen de Coninghen Iuda, teghen hare Vorsten, tegen hare Priesters, tegen dat volck inden lande.

‡ Iere. 15.d.20

19

Alsoo oock, al streden si alle tsamen teghen v, soo en sullen si nochtans v niet verwinnen. Want ick ben by v, seyt de HEERE, dat ick v verlosse.

20

Ende des HEEren woort geschiede tot my, ende seyde:

21

Gaet henen, ende predict openbaerlijck te Ierusalem, ende segt: Alsoo spreeckt de HEEre: Ick ghedencke, doen ghi een vriendelijcke Ionge Deerne, ende een lieue Bruyt waert, doen ghy my volchdet inde woestijne, inden lande, daermen niet en saeyt.

22

Doen Israel des HEEren eyghen was,^* ende zijn eerste vrucht.^† Wiese verslinden wilde, die moeste schult hebben, ende ongheluc ouer hem comen, seyt de HEERE.

* Exod. 13.a.1.

† Iere. 10.d.25 30.c.16. Sacha. 2.b.8.