Den Bibel, Inhoudende dat Oude ende Nieuwe Testament (Biestkensbijbel)

¶ Dat .lxvj. Capittel.

¶ Hier worden alle wtwendige Ceremonien der Ioden verworpen, Ende den gherechten ende warachtigen Gods dienst beschreuen.

1

⁺ALso seyt de HEEre:^† Den Hemel is mijnen stoel, ende de Aerde mijne voetbanc, Wat ist dan voor een huys, dat ghy my timmeren wilt? Oft welcke is de plaetse daer ick rusten sal?

+ A vers 1

† Actu. 7.f.49. 17.d.24. 3.Reg. 8.d.27 2.Par. 6.d.18.

2

Mijn hant heuet al ghemaect, so wat daer is, seyt de HEEre. Maer ick sie aen den ellendighen,^† ende die van eenen gebrokenen gheest is, ende die hem vreest voor mijnen woorde.

† Esaie. 57.c.13. 61.a.1. Psal. 34.c.19. 51.c.19.

3

Want soo wie eenen Ossche slaghet, die is effen als die eenen Man versloeghe: Wie een Schaep offert, die is als die eenen hont den hals brake: Wie Spijsoffer brengt, die is, als oft hy Verckens bloet offerde: Wie des wieroockens ghedenct, die is als die dat onrecht prijst. Alsulcx verkiesen si in hare weghen, ende haer siele heeft aen hare grouwelen een welbehaghen.

4

Daerom wil ick oock verkiesen dat si bespotten,^† ende tgene dat si vreesen, dat wil ick ouer haer laten comen.^‡ Daerom dat ick riep, ende niemant en antwoorde: Dat ick sprack, ende si en hoorden niet. Ende deden dat my qualijck beuiel, ende vercoren dat my mishaechde.

† Prou. 10.c.24

‡ Pro. 1.b.24. Esaie. 65.b.11

5

⁺Hoort des HEEREN woort, ghy die zijn woort ontsiet.^† Vwe broederen die v haten ende die v van haer afsonderen om mijns Naems wille, segghen (laet sien hoe heerlijc de HEEre sy: Laet hem verschijnen tot uwer vruechden) die sullen te schanden comen.

+ B vers 5

† Luce. 21.b.15.

6

Want men sal een stemme hooren des ghedruyschs inder stadt, een stemme vanden Tempel, een stemme des HEEren, die sinen Vianden betaelt.

7

^† Sy baert, eer dat haer wee wordt, Sy is van een knechtken ghenesen, eer haer des kints noot aencoemt.

† Apoca. 12.a.6

8

Wie heeft sulcx oyt ghehoort? Wie heeft sulcx oyt ghesien? Can oock, eer dat een Landt de weedaghen crijcht, een volck tsamen ghelijck geboren worden? Nv heeft doch ymmer Sion hare kinderen sonder weedaghen ghebaert.

9

Soude ick ander laten de baermoeder breken, ende selfs ooc niet baren? Seyt de HEEre. Soude ick andere laten baren, ende selfs besloten zijn? Seyt dijn Godt.

[p. 23r]

10

Verblijt v met Ierusalem, ende weest vrolijc ouer haer, ghy alle die haer lief hebt.^† Verblijt v met haer alle ghi die om haren wille droeuich geweest zijt.

† Math. 5.a.4.

11

Want ghy sult daer voor suygen, ende sadt worden vanden borsten haers troosts. Ghy sult daer voor suygen ende v vermaken van de volheyt haerder heerlijcheyt.

12

⁺Want also spreect de HEEre: Siet, ic verbreyde den vrede by haer, gelijc als een water, ende de heerlijcheyt der Heydenen gelijc een ouervloeyende Beke. Dan sult ghy suygen, Ghi sult op de armen gedragen worden, ende op den scoot salmen v vriendelijcken houden.

+ C vers 12

13

Ic wil v troosten, gelijc eenen sine Moeder troost. Ia ghy sult te Ierusalem vertroost worden.

14

Ghy sultet sien, ende uwe herte sal hem verhuegen,^† ende uwe gebeente sal groenen ghelijc als gras. Dan salmen bekennen de hant des HEEren, aen sinen knechten, ende den toorne aen sinen Vianden.

† Ezech. 37.a.5. Prou. 11.d.28

15

^* Want siet, de HEEre sal comen met vier, ende sinen wagen als een onweder, op dat hy vergelde in verbolgentheyt zijns toorns, ende zijn schelden in vier vlammen.

* 2.Tess. 1.b.8. 2.Pet. 3.b.10.

16

Want de HEEre sal door dat vier ende door zijn^‡ sweert oordeelen, alle dat vleesch, ende der ghedooden des HEEren sal een groote menichte zijn.

‡ Apoca. 1.c.16. 19.c.15. 4.esd. 13.a.10

17

Die haer seluen heyligen ende reynigen inde Houen, deene hier, dander daer, ende eten^† Verckens vleesch, grouwelen ende Muysen, die sullen tsamen wech gheruckt worden, seyt de HEEre.

† Esai. 65.a.4. Leuit. 11.a.7. Deut. 14.a.8. 2.Mac. 6.c.18 7.a.1.

18

Want ic wil coomen ende vergaderen hare wercken^* ende gedachten, tsamen met alle Heydenen ende tongen, dat si comen ende sien mijne heerlijcheyt.

* Heb. 4.b.12

19

Ende ick wil een Teeken onder haerlieden gheuen, ende de sommige van haer die verlost zijn,^* seynden totten Heydenen aen de zee, na Phul ende Lud,⁺ totten Bogenschutters, na Thubal ende Iauan, Ende verre henen totten^† Eylanden daermen niet van my gehoort en heeft, ende die mijne heerlicheyt niet gesien en hebben, ende sullen mijne heerlijcheyt onder de Heydenen vercondigen.

* Actor. 13.a.2. 26.c.15.

+ D vers 19

† Esai. 49.a.1. 60.a.3. 65.a.1.

20

^† Ende sie sullen alle uwe broederen, wt alle Heydenen den HEEre brengen tot een Spijsoffer, op Peerden ende Waghens, op Rosbaren, op Muylen ende Loopers, na Ierusalem tot mijnen heylighen Berghe, seyt de HEERE. Ghelijck als de kinderen Israels Spijsoffer in een reyn Vat brenghen totten huyse de HEEren.

† Tob. 13.c.17.

21

Ende ic wil wt den seluen nemen^† Priesteren ende Leuiten, seyt de HEERE,

† Esai. 61.a.6. Roma. 12.a.1. 1.Pet. 2.a.9. Apoca. 1.a.6. 5.b.10. 20.b.6

22

Want ghelijc^* als de nieuwe Hemelen, ende de nieuwe Aerde, die ick make, voor my staen, seyt de HEEre, Also sal oock uwe saet ende naem staen.

* Esa. 65.c.16 2.Pet. 3.b.13. Apoca. 21.a.1.

23

Ende alle vleesch sal de eene maent nae den andere, ende den eenen^† Sabbath nae den anderen comen, om te aenbeden voor mi, spreect de HEEre.

† Esai. 56.a.2 58.c.13.

24

Ende si sullen wtgaen ende sien de Lichamen der Lieden die aen my mishandelt hebben.^† Want haren Worme en sal niet steruen, ende haer^* vier en sal niet wtgebluscht worden, ende si sullen allen vleessche eenen grouwel zijn.

† Mar. 9.e.47 Iudit. 16.c.25

* Esai. 30.f.33 Dani. 7.b.11. Apoc. 14.b.11 19.d.20.

¶ Eynde des Propheets Iesaia.