Den Bibel, Inhoudende dat Oude ende Nieuwe Testament (Biestkensbijbel)

¶ Dat .lxiiij. Capittel.

¶ Als de Propheet vertelt heeft het ghewelt, ende de weldaden des Salichmakers, so seyt hi God den HEERE lof ende danck. Ende met groote suchtinghe ende heeter aendacht roept hy de toecoemst ons verlossers.

1

⁺IC wil der goedertierenheyt des HEEren ghedencken, Ende des Lofs des HEEren, in alle dat ons de HEEre gedaen heeft, ende der grooter weldaden aenden huyse Israels, die hy haer gedaen heeft door sine barmherticheyt ende groote goedertierenheyt.

+ A vers 1

2

Want hy sprack: Sy zijn ymmer mijn volck, kinderen die niet valsch en zijn, daerom was hy haren Heylandt.

3

^† Soo wie haer benaut, die benaut

† Sach. 2.b.8.

[p. 22r]

hem oock,^* Ende de Enghel die voor hem is, die halp haer.

Hy verlostese daerom, dat hyse lief hadde, ende haer spaerde.

Hy namse op,^† ende droechse altijd van outs her.

* Exodi. 13.d.21 14.d.19. 23.c.20.

† Exod. 19.a.4 Deut. 32.b.11.

4

^* Maer si verbitterden ende vertoornden sinen heyligen gheest. Daerom wert hy haer viant, ende street teghen haer.

* Num. 11.a.1 14.a.2.

5

Ende hy ghedacht weder opten voorledenen tijt, op Mosen, die onder zijn volc was.

Waer is dan nv,^† diese uyt den Meyr leyde, metten Herders zijnder cudden?

Waer is hy die sinen heyligen gheest onder haer gaf?

† Exod. 14.f.29

6

Die Mosen byder rechter hant leyde, door zijnen heerlijcken arm.

^† Die de wateren voor haer deylde, op dat hy hem eenen eewighen Naem soude maken.

† Iosue. 3.d.16.

7

⁺Diese door de diepte voerde, gelijc de peerden inder woestijne, die niet en struyckelen.

+ B vers 7

8

Ghelijc dat vee dat int velt henen gaet, dwelck den adem des HEEren drijft.

Alsoo hebt ghy oock dijn volck gheleyt, op dat ghy v eenen heerlijcken Naem sout maken.

9

So^† siet nv vanden Hemel, ende siet af van dijne heylige heerlijcke wooninge.

Waer is nv dijnen ijuer, dijne macht? Dijne groote heerlijcke bermherticheydt hout haer hert teghen my.

† Baruc. 2.c.16. Deut. 26.b.15

10

Ghy zijt doch^† onse vader, want Abraham en weet van ons niet, ende Israel en kent ons niet.

Maer ghy HEEre zijt onse vader ende onse verlosser, van outs her is dat dijnen Naem.

† Matth. 6.b.9 23.a.8.

11

^* Waerom laet ghy ons HEERE dolen van uwen weghe, ende onse herte verharden, dat wy v niet en vreesen?

Keert weder, om dijnre knechten wille, om den stamme wille dijns erfdeels.

* Psal. 119.b.10

12

Sy besitten schier gheheel ende al dijn heylich volck. Dijne vianden vertreden dijn heylichdom.

13

⁺Wy zijn ghelijck als voormaels, doen ghy ouer ons niet en domineerde, ende recht oft wy nae uwen Naem niet ghenoemt en waren.

+ C vers 13

14

^* Och oft ghi den Hemel schuerde, ende voert daer af.^† Dat de berghen voor v versmelteden, ghelijck als een Heet water, vanden crachtighen viere versiet.

* Malach. 3.a.2

† Iudic. 5.a.4 Iudit. 16.c.21.

15

Op dat dijnen Naem onder dijne vianden bekent werde, Ende dat de Heydenen voor v beuen moesten.

16

Door de wonderlijcke wercken die ghi doet, daermen niet op en vermoedet, doen ghy daer af daelde,^† ende als de berghen voor v versmelteden.

† Iudic. 5.a.5.

17

^* Wantet van aenbeghinne der werelt noyt ghehoort en is, noch met ooren ghehoort, het en heeft oock gheen ooghe ghesien, wtghenomen dy Godt, wat den ghenen gheschiet, die op hem wachten.

* 1.Cor. 2.a.9.

18

Ghy ontmoetede den vrolijcken, ende den genen die de gerechticheyt oeffenden, ende op uwe weghen dijnre ghedachten.

Siet, ghy waert wel vertoornt, doen wy sondichden, ende langhe daer in bleuen, maer ons wert nochtans geholpen.

19

Maer nv zijn wy alle gader ghelijck de onreyne, ende alle onse gherechticheyt is ghelijck een vuyl cleedt.

Wy zijn alle verwelct ghelijck bladeren, ende onse sonden voeren ons wech, ghelijck als eenen wint.

20

Niemant en roept dijnen Naem aen, oft maect hem op, dat hy hem aen v houde.

^* Want ghy verbercht v aensicht voor ons, ende laet ons in onse sonden versmachten.

* Mich. 3.a.4.

21

⁺Maer nv HEERE du bist onse vader.^† Wy zijn leem, ghy zijt onse potbacker, ende wy alle zijn dwerc uwer handen.

+ D vers 21

† Roma. 9.c.21.

22

^* HEERE en wilt doch niet te seer toornich wesen, Noch en ghedenckt der sonden niet eewelijcken. Siet doch dat aen, dat wy alle dijn volck zijn.

* Iere. 10.d.25. Psal. 79.a.5. 85.a.6.

23

^† De steden ws heylichdoms zijn tot een woestijne gheworden, Sion is tot een woestijne geworden, Ierusalem leyt verdestrueert.

† Esaie. 1.a.7.

24

^* Dat huys onser heylicheyt ende heerlijcheyt, waer in onse vaders v ghelooft hebben, dat is metten vier verbrant, Ende al wat wy schoons hadden, dat is te schande ghemaect.

* 4.Re. 25.b.9. 2.Par. 36.c.19

25

HEERE wilt ghy soo hert zijn tot sulcken, ende swijghen, ende ons soo seer neder slaen?