Den Bibel, Inhoudende dat Oude ende Nieuwe Testament (Biestkensbijbel)

¶ Dat .lxiij. Capittel.

¶ De Propheet vermaent dat volck dat si den toecomenden Salichmaker aennemen souden ende dancbaer zijn.

1

⁺VVie is die, die van Edom coemt, met rootachtighe cleederen van Bazra, die soo verchiert is in zijn cleederen, ende daer henen treedt in zijne groote cracht? Ick bent die gherechticheyt leert, ende ben een meester om te helpen.

+ A vers 1

2

^† Waerom is dan dijn ghewaet soo rootverwich, ende dijn cleedt ghelijc als eens wijnpersen treders? Ick trede de Wijnpersse alleen, ende daer en is niemandt vanden volcke met my. Ick hebse in mijn toornicheydt gheperst, ende in mijn gramschap vertreden. Daer af is haer vermogen op mijne cleederen gesprengt, ende ick hebbe alle mijn ghewaet vuyl ghemaect.

† Apoc. 19.b.15.

4

^* Want ic hebbe eenen dach der wraken voor my genomen. Dat iaer, (de mijne te verlossen) is ghecomen.

* Esai. 34.b.8.

5

Want ick sach rontom my, ende daer en was gheen helper. Ende ick was in verschrickinghe, ende niemant en onderhielt my. Maer mijnen arm moest my helpen, ende mijn toornicheyt onderhielt my.

6

Daerom heb ick de volcken vertreden in mijnen thoorne, ende hebse droncken ghemaeckt in mijnder gramschap, ende haer vermoghen ter Aerden neder gestooten.