Den Bibel, Inhoudende dat Oude ende Nieuwe Testament (Biestkensbijbel)

¶ Dat .lxij. Capittel.

¶ De Propheet en sal niet ophouden te roepen, waerschouwen ende vermanen, tot dattet licht der ghenaden op gaet in Sion.

1

⁺OM Sions wil, soo en wil ick niet swijghen, Ende om Ierusalems wille, so en wil ick niet ophouden, tot dat hare gherechticheyt op gaet ghelijck als een claerheyt ende haer Heyl als een fackel berne,

+ A vers 1

2

Op dat de Heydenen dijn gherechticheyt sien, ende alle Coninghen dijn heerlijckheyt.^† Ende ghy sult met eenen nieuwen naem genoemt worden, den welcken des HEEREN mont noemen sal.

† Ioan. 1.a.12.

3

Ende ghy sult een schoon croone inder handt des HEEren, ende eenen Coninclijcken hoet inder hant dijns Godts zijn.

4

Men en sal v niet meer de verlatene, noch dijn lant een verwoestinge heeten, Maer ghy sult (mijnen lust aen haer) ende dijn Landt (mijn lieue boele) heeten.^* Want de HEEre heeft lust aen v, ende dijn lant heeft eenen lieuen boele.

* Esai. 54.a.5.

5

Want ghelijck als een lief boel eenen boel lief heeft, soo sullen uwe kinderen lief hebben. Ende ghelijck als hem een bruydegom verblijdt van zijnder bruyt,^† also sal hem uwe God van v verblijden.

† Soph. 3.d.17.

6

⁺O Ierusalem,^* ick wil wachters op dijne mueren bestellen, die den gheheelen dach ende den gheheelen nacht nymmermeer stille swijghen en sullen, ende die des HEEren sullen ghedencken,

+ B vers 6

* Esai. 52.b.7 Ezech. 3.a.8. 33.b.7.

7

Op datter by v gheen swijghen en sy, ende ghi van hem niet en swijcht, ter tijt toe, dat Ierusalem bereydet ende geset worde tot eenen prijs opter Aerden.

8

De HEEre heeft by zijnder rechter handt ghesworen, ende byden arm zijner macht: Ick en wil voortaen niet meer v coren uwen vianden te eten geuen, noch uwen most, dien ghy bearbeyt hebt, den vreemden niet laten drincken.

9

Maer diet vergaderen, die sullent oock eten, ende den HEERE louen. Ende dien inbrengen, die sullen hem drincken inden voorhof mijns heylichdoms.

10

⁺Gaet henen, gaet henen, door der poorten,^† bereydet den volcke den wech. Maect banen, maect banen, ruymt de steenen wech, steect op dat vaenken tegen de volcken.

+ C vers 10

† Esa. 40.a.3. 57.b.12.

11

Siet, de HEEre laet hem hooren tot aen de eynden der Werelt.^* Segghet der dochter Sion: Siet, dijn Heyl coemt, siet, sinen loon is by hem, ende sine vergheldinghe is voor hem.

* Esai. 40.b.9. Sach. 9.a.9. Matth. 21.a.5 Ioan. 12.b.15.

12

^† Men salse noemen dat Heylich volc, de verloste des HEEren. Ende men sal v heeten: Die besochte ende onuerlatene Stadt.

† Esai. 4.a.3.