Den Bibel, Inhoudende dat Oude ende Nieuwe Testament (Biestkensbijbel)

¶ Dat .lxj. Capittel.

¶ Hier wort dat werc eens Propheten beschreuen, dwelck in Christo volcomelijck ende voornamelijc veruult is.

1

⁺DE^* geest des HEEren HEEren is ouer my, daerom heeft my de HEEre ghesalft. Hy heeft my gesonden den ellendighen te prediken,^† de ghebroken herten te verbinden, te prediken den gheuanghen een verlossinge, den ghebonden een ontbindinge,

+ A vers 1

* Esai. 11.a.2. Luce. 4.b.18.

† Esai. 57.c.13. 66.a.2. Psal. 34.c.19. 51.c.19.

2

Te Prediken een ghenadich iaer des HEEren, ende eenen dach der wraken onses Gods.

3

^† Om te troosten alle truerighe, Te beschicken den truerigen tot Sion, dat hen cieraet voor Assche, ende vruechden olye voor truericheyt, ende schoone cleederen voor eenen bedroefden gheest ghegeuen worde. Op dat si ghenoemt mogen worden, boomen der gherechticheyt, planten des HEEREN, tot eenen prijse. Sy sullen de oude verwoestingen bouwen, ende soo wat in voortijden verdestrueert is, oprichten.

† Matth. 5.a.4

4

Sy^† sullen de verwoeste steden die van veel gheslachten verstoort ghelegen hebben, vernieuwen.

† Esai. 58.c.12.

5

Vreemde sullen staen ende uwe cudden weyden, ende wtlanders sullen uwe ackerlieden ende wijngaerdeniers zijn.

6

Maer^† ghy sult Priesters des HEEren heeten, ende men sal v dienaers ons Gods noemen. Ende ghy sult der Heydenen goeden eten, ende in haer heerlicheyt

† Esai. 66.d.21. Iere. 33.d.21. 1.Pet. 2.a.9.

[p. 21v]

sult ghy v beroemen.

7

⁺Voor uwe versmaetheydt salder tweemael soo veel comen, ende voor de schande, sullen si vrolijck zijn op haren acker. Wandt si sullen tweemael so veel besitten in haren Lande, si sullen eewighe vruechde hebben.

+ B vers 7

8

Want ick ben de HEERE^† die dat recht lief heeft, ende hate roofsce Brandtofferen, ende ick wil beschicken, dat haren arbeyt sal gewis zijn,^† Ende eenen eewighen bondt wil ick met haer maken.

† Psal. 37.d.28.

† Esaie. 55.a.3.

9

Ende men sal haer saet kennen onder de Heydenen, ende haer nacomelinghen onder de volcken. Also dat wiese sien sal, die salse kennen, dat si een saet zijn, geseeghent vanden HEERE.

10

^† Ick verblijde my inden HEEre, ende mijne siele is vrolijck in mijnen Godt.

^* Want hy heeft my aenghetrocken met cleederen des Heyls, ende met den rock der gerechticheyt ghecleet. Ghelijc als een bruydegom in Priesterlijcke chieragie verchiert, ende ghelijck als een bruyt schijnt in haer verchieringhe.

† Luce. 1.d.46.

* Psal. 132.b.16

11

Want ghelijck als vrucht wt der aerden wasset, ende saet inden hof opgaet. Alsoo sal gherechticheyt ende lof opgaen voor alle Heydenen wt den HEERE HEERE.