Den Bibel, Inhoudende dat Oude ende Nieuwe Testament (Biestkensbijbel)

¶ Dat .lx. Capittel.

[p. 21r]

¶ Hy vermaent allen die Godts woordt beminnen, dat si haer bereet maken, met vruechden de ghenade Godts te bekennen. Maer wat hier van Ierusalem ende ander lichamelijcke dingen verhaelt wort, dat wort door een hoogher verstant vande roepinghe der Heydenen verstaen.

1

⁺MAect v op,^† wordt licht, want dijn licht coemt, ende de heerlijckheydt des HEEREN gaet op ouer v.

+ A vers 1

† Act. 26.c.17. Ephe. 5.b.8.

2

Want siet,^* duysternisse bedeckt dat Aertrijck, ende donckerheyt de volcken, Maer ouer v gaet op de HEEre, ende zijn heerlijcheyt schijnt ouer v.

* 4.Esd. 14.b.20.

3

^* Ende de Heydenen sullen in dijnen lichte wandelen, ende de Coningen in de claerheyt die ouer v opgaet.

* Apo. 21.d.24.

4

^† Heft uwe ooghen op ende siet rontom, dese alle vergadert, comen tot v. Dijne sonen sullen van verre comen, ende dijne dochteren ter zijden opghetoghen worden.

† Gene. 15.a.5. Esa. 49.d.18. Matth. 8.b.11

5

Dan sult ghy uwen wellust sien, ende wtbreken, ende dijn herte sal hem verwonderen ende wtbreyden, als haer de menichte aent Meyr tot v bekeert, ende de macht der Heydenen tot v coemt.

6

Want de menichte der Kemelen sal v bedecken, de Loopers wt Midian ende Epha.^† Sy sullen wt Saba alle comen, gout ende wieroock brenghen, ende des HEEren lof vercondighen.

† Psal. 72.b.10. Matth. 2.b.11

7

⁺Alle cudden in Kedar sullen tot v vergadert worden, ende de bocken Nebaioth sullen v dienen. Sy sullen op mijnen aenghenamen^† Altaer gheoffert worden: Wandt ick wil dat huys mijnder heerlijckheydt verchieren.

+ B vers 7

† Esai. 56.b.7. Hebr. 13.b.10.

8

Welck zijnse, die daer vliegen ghelijc de wolcken, ende ghelijck de duyuen tot hare vensters?

9

De Eylanden verwachten op my, ende de zeeschepen van lancx herwaerts, op dat si dijne kinderen van verre toebrenghen mochten, tsamen met haer gout ende siluer, den Name des HEEren dijns Godts, ende den heylighen in Israel, die v heerlijck ghemaect heeft.

10

^† Vreemde sullen uwe muerem timmeren, ende haer Coningen sullen v dienen. Wandt in mijnen toorne heb ick v gheslaghen, ende in mijnder ghenade ontferme ick dy wederom.

† Esai. 54.b.11.

11

^† Ende uwe poorten sullen gestadelijcken open staen, noch dach noch nacht toe ghesloten worden, op dat der Heydenen Macht tot v ghebracht, ende hare Coninghen tot v ghestiert worden.

† Apoc. 21.d.25.

12

Want welck Heyden oft Conincrijck v niet dienen en willen, die sullen vergaen, ende de Heydens verwoest worden.

13

⁺De heerlijckheydt Libani sal aen v comen, Dennen, Buecken ende Boschboomen, deen metten anderen, om te vercieren de plaetse mijns Heylichdoms, Want ic wil de stede mijnder voeten heerlijck maken.

+ C vers 13

14

Oock sullen gheboghen tot v comen, die v verdruct hebben,^* ende alle die v gelastert hebben, die sullen v te voet vallen, ende sullen v noemen een stadt des HEEren, een Sion des heyligen in Israel.

* Acto. 16.d.29. Apoca. 3.a.9.

15

Want daer om dat ghy verlaten ende ghehaet zijt gheweest, daer niemant en ginck, daerom wil ic v tot een eewich playsant maken, ende tot een vruechde inder eewicheyt,

16

Dat ghy sult melc vanden Heydenen suyghen,^† ende de borsten der Coninghen sullen v sooghen, op dat ghy onderuint, dat ick de HEEre ben, dijn Heylandt, ende ick de machtighe in Iacob, ben dijn verlosser.

† Esai. 49.e.23.

17

Ick wil gout inde plaetse des metaels, ende siluer in de stede des ijsers brenghen, ende metael in de stede des houts, ende ijser in de stede der steenen.^+† Ende ick wil maken dat dijne voorstanders vrede leeren sullen, ende uwe Voochden gherechticheyt prediken.

+ D vers 17

† Esai. 52.b.7. Titum. 1.b.6.

18

Men en sal geen ghewelt meer hooren in uwen Lande, noch schade oft verderuen binnen uwe Palen. Maer uwe mueren sullen Heyl, ende uwe poorten lof heeten.

19

De^† Sonne en sal v des daechs niet meer schijnen, ende dat licht der Manen en sal v niet meer lichten. Mer de HEEre sal dijn eewich licht, ende dijn God sal dijnen prijs zijn.

† Apoca. 21.f.23.

20

Dijn^† Sonne en sal niet meer ondergaen, noch dijn mane den schijn verliesen. Wandt dijn HEEre sal dijn eewich licht zijn, ende de dagen ws Rous sullen een eynde hebben.

† Apoca. 22.a.5.

21

Ende dijn volc sullen enckel rechtuaerdige zijn,^† ende sullen dat aertrijck eewelijck besitten, als de ghene die den tack mijnder plantingen, ende een werck mijnder handen zijn, tot mijnen prijse.

† Psal. 37.b.11. Math. 5.a.5. 2.Pet. 3.b.13.

22

Wt den cleynsten sullender duysent worden, ende wt den slechsten een machtich volc. Ick de HEEre wil sulcx corts tot zijnder tijt beschicken.