Den Bibel, Inhoudende dat Oude ende Nieuwe Testament (Biestkensbijbel)

¶ Dat .lviij. Capittel.

¶ Hy vermaent den Propheten dat sy neerstelijck ende strenghelijck haer officie waer nemen, Ende dat sy niet alleen teghen alle lasteringe des volcx en roepen, maer oock teghen dat betrouwen der menschelijcker wercken, Hier wort ooc bewesen wat dat rechte vasten is, dat Gode behaecht.

1

⁺ROept^* haest, en spaert niet, verheft dijn stemme gelijck als een^† Basuyne, ende^* vercondicht mijnen volcke haer ouertredinghe, ende den huyse Iacobs haer sonde.

+ A vers 1

* Mich. 6.a.1.

† Num. 10.a.1

* 4.Es. 1.a.4.

2

Sy soecken my daghelijcx, ende willen mijne weghen weten, recht gelijck oft een volck ware, dat gherechticheyt ghedaen, ende dat Recht haers Gods niet verlaten en hadde.^* Sy eysschen my te recht, ende willen met haren Gode rechten.

* Mala. 3.c.13.

3

Waerom vasten wy, ende ghy en sieghes niet aen? Waerom doen wy onsen lichaem wee, ende ghy en willet niet weten?

Siet, wanneer ghy vast, so doet ghy uwen wille, ende drijft alle uwe schuldenaers.

4

⁺Siet ghy vastet, dat ghy twist ende kijft, ende slaet metter vuyst ongoddelijcken. En vast niet also, ghelijck ghy lieden nv doet, datter een gheschrey van v in der hoochte ghehoort wordt.

+ B vers 4

5

Soude dat een vasten zijn, dat ick verkiesen soude, dat een mensche zijn lijf des daechs quelt, oft zijn hooft hanghe ghelijck als een biese, oft op eenen sack ende inder asschen ligghe? Wilt ghy dat een vasten heeten, ende eenen dach den HEEre aengename?

6

Maer dat is een vasten dat ick verkiese:^† Laet los die ghy met onrecht verbonden hebt.

Laet ledich die ghy beswaert.

Schelt quijt die ghy benaut.

Neemt wech alderley beswaringhe.

† Deute. 15.a.1.

7

^† Breect den hongherighen dijn broot ende die gene, die in ellende zijn, leydt int huys. Als ghy eenen naecten siet, so cleet hem, ende en ontrect v niet van dijnen vleessche.

† Mat. 25.c.35. Ezech. 18.b.16 Tob. 1.c.17.

8

^† Als dan sal dijn licht opgaen, gelijck als den dagheraet, ende dijn beteringhe sal snellijc toenemen, ende dijne gherechticheyt sal voor v henen gaen, ende de heerlijckheyt des HEEren sal v tot

† Luc. 11.d.36. Iob. 11.b.17. Psal. 37.a.6.

[p. 20v]

haer nemen.

9

^* Dan zult ghy roepen, so sal v de HEEre andtwoorden. Als ghy sult crijsschen, soo sal hy segghen, siet hier ben ick.

Indien ghy niemanden by v en sult beswaren, noch met vingheren wijsen, noch qualijck na spreken,

* Esai. 30.d.19. 65.d.23.

10

⁺Ende als ghy den hongherighen sult laten vinden dijn herte, ende de ellende sielen versadet,^† Dan sal dijn licht inder duysternisse op gaen, ende dijn donckerheyt sal zijn als den middach.

+ C vers 10

† Mat. 5.b.14.

11

Ende de HEEre sal v altijt leyden, ende uwe siele versaden inder dorheyt, ende dijn gebeente stercken, Ende ghy sult zijn als eenen ghewaterden hof, ende ghelijck als een Fonteynadere, die nemmermeer waters ghebreck en heeft.

12

^† Ende door v sal getimmert worden, wat langhe woest gheleghen heeft, ende ghy sult een fondament leggen dat altoos blijuen sal. Ende ghy sult heeten, die de Reten vertuynt, ende die de weghen verbetert, datmen daer woonen mach.

† Esai. 61.a.4.

13

^† In dien dat ghy uwen voet vanden Sabbath keeret, alsoo dat ghy niet en doet, tgene dat v behaecht in mijnen heylighen dage, so salt eenen lustighen Sabbath heeten, om den HEEre te heyligen ende te prijsen. Want so sult ghy den seluen prijsen, als ghy uwe wegen niet en doet, noch daer in gheuonden en worde, wat v behaecht, oft wat ghy spreect.

† Esaie. 56.a.2. 66.d.23.

14

Als dan sult ghy lust hebben inden HEEre,^* ende ick wil v ouer de hoochte opter Aerden laten sweuen, ende ick wil v spijsen met de erffenisse dijns Vaders Iacobs, want des HEEren mont seytet.

* Abac. 4.c.19.